Dielulula 7 - Mukanda wa Nzambi Dihungila Dikulukulu ne Dihungila Dihia-dihia 2003

Mose Udi Ubadimusha bua Mpingu ya Bena Kanâna

¹ Halua Yehowa nʼenu mu buloba bunudi nuya bua kubuhiana, hanuihatshileye bisamba bia bungi ku mpala kuenu, Bena Hiti ne Bena Gîgashi ne Bena Amole ne Bena Kanâna ne Bena Pelizi ne Bena Hiwi ne Bena Yebuse, bisamba muanda mutekete bidi binuhita bunene ne bukole;

² habafila Yehowa, Nzambi wenu, mu bianza bienu, nenubashihe; hashishe nenubajimishe ha buloba: kanuhungi nʼabo tshihungidi, kanubaleshi luse,

³ kanubakanganyi nʼabo, kanubakishi muanʼenu mukashi kudi muana wabo mulume, kanuangatshidi muana wenu mulume mukashi kudibo.

⁴ Bualu bua bobo nebakudimune mutshima wa muanʼenu mulume, bua yeye kandondi meme bua kukuatshileye nzambi mikuabo mudimu: nunku Yehowa neanukuatshile tshiji, neanujimishe lubilu.

⁵ Kadi nenubenzele nunku: nushihe bishihelu biabo, nuele mabue abo hanshi adibo batendelela, nutahe Bashela babo, nuoshe mpingu yabo ne kahia.

Bantu ba Tshijila ba Yehowa

⁶ Bualu bua nuenu nudi bantu ba tshijila kudi Yehowa, Nzambi wenu; Yehowa, Nzambi wenu, wakanusungula munkatshi mua bisamba bionso bidi hanshi ha buloba, bua nuenu nuikale bantu ba buhianyi buandi.

⁷ Yehowa kakateka luse luandi kunudi, kakanusungula bualu bua nuenu nuakahita bantu bakuabo bungi; nuenu nuakatamba bantu bonso bukese;

⁸ kadi bualu bua Yehowa udi munusue ne bualu bua yeye utu watumikila mulayi wakalayeye batatu benu, Yehowa wakanuhatula ne tshianza tshikole, wakanuhikula mu nsubu wa lukanu, ne mu tshianza tshia Palô, mukelenge wa Ejipitu.

⁹ Numanye bienu ne Yehowa, Nzambi wenu, udi Nzambi mene; Nzambi utu walamata dî diandi, utu watumikila tshihungidi tshiandi ne luse luandi kudi bantu badi bamusue ne batu batumikila mikenji yandi tô ne ku bihungu tshinunu;

¹⁰ utu wafuta bantu badi nʼandi lukuna difutu diabo ku mesu kuabo, bua kubashiha: yeye kena uhanga muntu udi nʼandi lukuna, neamufute ku mesu kuandi.

¹¹ Nunku nutumikile mikenji ne malu ne mei binakunuambila lelu, nubienze.

Masanka Alualua kudi Batumikidi ba Yehowa

¹² Binunvua mikenji ei, binuayenza, hashishe Yehowa, Nzambi wenu, nênze tshihungidi ne luse biakalayeye batatu benu:

¹³ yeye neanusue, neanusankishe, neanuvudishe, yeye neasankishe bana benu kabidi, ne bintu bidi bidiunda mu buloba buebe, midioko yenu, ne nvinyo yenu mihia-mihia, ne manyi enu ne bana ba ngombe yenu ne bana ba mikoko yenu, mu buloba buakalayeye batatu benu bua kunuhabu.

¹⁴ Nuenu nenusankishibue ku mutu kua bantu bonso: nansha mulume nansha mukashi munkatshi muenu anyi munkatshi mua bimuna bienu nebikale nkumba.

¹⁵ Yehowa neanumushile masama onso: kena unusamisha masama mabi a mu Ejipitu, anudi bamanye, kadi yeye neasamishe badi nʼenu lukuna masama au.

¹⁶ Nujimishe bantu bonso badi Yehowa, Nzambi wenu, ufila mu bianza bienu; kanubafuidi luse, kanutendeledi nzambi yabo; bualu ebu nebuikale bu buteyi kunudi.

¹⁷ Binuamba mu mitshima yenu ne, Bisamba ebi bidi bituhita bunene, nembihate munyi?

¹⁸ Kanubatshinyi: nuvuluke malu akenzela Yehowa, Nzambi wenu, Palô ne Bena Ejipitu bonso;

¹⁹ mateta makole anuakatangila ku mesu, ne bimanyinu, ne malu a kukema, ne tshianza tshikole ne diboko diolola wakanuhatula nʼabi Yehowa, Nzambi wenu; ne Yehowa, Nzambi wenu, nênzele bantu bonso banudi nutshina nunku.

²⁰ Bualu bukuabo kabidi, Yehowa neatume matembue munkatshi muabo, bantu badi bashala nebasokome, tô ne hafuabo ku mpala kuenu.

²¹ Kanutshinyi ku mesu kuabo, bualu bua Yehowa, Nzambi wenu, udi munkatshi muenu, udi Nzambi munene udi uvuisha ditshina dikole.

²² Yehowa, Nzambi wenu, neanuihatshile bisamba abi ku mpala kuenu bituha bituha: kanubashihi tshikondo tshimue, bualu bua nyama ya muitu neyikumbane munkatshi muenu.

²³ Kadi Yehowa, Nzambi wenu, neabafile mu bianza bienu, neabakengeshe ne makenga makole, tô ne hajiminabo.

²⁴ Yeye neafile bakelenge babo mu bianza bienu, nuenu nenjimishe mena abo hanshi ha buloba; kakuena muntu umue udi mua kuimana ku mpala kuenu tô ne hanuabashiha bonso.

²⁵ Nuoshe mpingu yabo yakasongabo ne kahia: kanukumi mitshima yenu kudi argent anyi or idi ha mutu hai, kanuyidiangatshidi, kanudionyi mu buteyi ebu; bualu ebu budi butonda mutshima wa Yehowa, Nzambi wenu.

²⁶ Kanulu ne tshintu tshidi tshitonda Yehowa mu nsubu muenu bua kufuanangana nʼatshi: nuhidie tshintu atshi, nuikale nʼatshi lukuna; atshi ntshintu tshibihe tshia tshijila.