Dielulula 33 - Mukanda wa Nzambi Dihungila Dikulukulu ne Dihungila Dihia-dihia 2003

Mose Udi Uvudishila Bisamba bia Bena Isalele Masanka

¹ Â mmasanka akavudishila Mose, muntu wa Nzambi, Bena Isalele, diambedi yeye kayi muanze kufua.

² Yeye wakamba ne, Yehowa wakahueka ha mukuna wa Sinai, wakabika munkatshi muabo ku Sei, wakatemena ku mukuna wa Palana, wakamueneka munkatshi mua binunu makumi bia bantu bandi ba tshijila, wakalua kudibo ne mikenji mitema kahia mu tshianza tshiandi tshia bukole.

³ Bulelela, yeye udi unanga bantu bonso, bantu bandi bonso ba tshijila hadi mu tshianza tshiebe: bobo bakashikama hanshi ku makasa ebe, bua kunvua mei ebe.

⁴ Mose wakalelela mikenji bu buhianyi bua tshisambakena tshia Yakoba.

⁵ Yeye wakadi mukelenge wa mu Yeshuluna, hakasangishabo bakadi ku mutu kua bantu ba bisamba bionso bia Bena Isalele.

⁶ Lubena ikale biandi ne muoyo, kafu nansha, bantu bandi kabikadi banya-banya.

⁷ Edi ndisanka dia Yuda; wakamba ne, Yehowa, unvua dî dia Yuda, ulue nʼandi kudi bantu bandi: bianza biebe bimukoleshe, wikale mukuatshishi wandi kudi bena lukuna.

⁸ Bua Lewi yeye wakamba ne, Tumima ne Ulima biebe bikale kudi ûdi musue, uwakateta ku Masa, uwakaluangana nʼandi ku mai a Meliba.

⁹ Wakambila tatu wandi ne mamu wandi ne, Tshiena mumumone; kena mumanye bana babo, kena mumanye bana bandi, bualu bua bobo bakatumikila dî diebe ne tshihungidi tshiebe.

¹⁰ Bobo nebayishe bana ba Yakoba mei ebe, ne Bena Isalele mikenji yebe; nebateke musenga wa manananshi ku mpala kuebe, ne milambu ya kuosha ha kahia ha tshioshelu tshiebe.

¹¹ Yehowa avudishile bintu biandi disanka, itabushe mudimu wa bianza biandi: atshibule nyima ya bantu badi bahika ku mpala kuandi, ne ya badi nʼandi lukuna bua kababiki kabidi.

¹² Bua Benyamina yeye wakamba ne, Munangi wa Yehowa neashikame nʼandi talalâ, utu wamubuikila matuku onso, udi ushikama hankatshi ha makaya andi.

¹³ Bua Yosefe yeye wakamba ne, Yehowa avudishile buloba buandi disanka, bua bintu bia mushinga mukole bia mu diulu, bua mume, ne bua mai adi muinshi mua buloba;

¹⁴ ne bua bintu biakakuama mamuma bualu bua diba, ne bua bintu bidi belangana ku ngondo ku ngondo;

¹⁵ bua bintu bimpe bia mu mikuna, ne bua mabue a mushinga mukole a mu mikuna ya tshiendelele;

¹⁶ ne bua bintu bimpe bia ha buloba ne tshiuwidi tshiabu, ne bua diakalengele dia bantu badi bashikama muitu. Disanka edi nedilue ha mutu ha Yosefe, ne ku lubombo lua mutu wa muntu wakadi mutahuluke kudi bana babo.

¹⁷ Butumbi buandi budi bu muanʼa bute wa ngombe, nsengu yandi idi bu nsengu ya ngombe wa mu mpata; yeye neatue bantu bonso ba ha buloba nsengu yandi, ne ba binunu makumi bia bantu ba mu Efelayima ne binunu bia bantu ba mu Manashe.

¹⁸ Bua Zebuluna yeye wakamba ne, Usanke mu kuluhuka kuebe; ne Yisakâ, usanke mu ntenta yebe.

¹⁹ Bobo nebabikile bantu ku mikuna, nebashiheleku milambu ya buakane: bua bobo nebadie bintu bia bungi bia mu mai manene, ne bintu bimpe bidi bisokoma muinshi mua nsenga.

²⁰ Bua Gada yeye wakamba ne, Muntu wavudishila Gada disanka udi ne disanka: yeye udi walamina bu mukashi wa nyama wa ntambue, yeye udi utula diboko ne lubombo lua ku mutu kabidi.

²¹ Yeye udi udianjila kudisunguila tshituha tshiandi, bualu bua etshi ntshituha tshia mukokeshi, wakalua nʼatshi kudi ba ku mutu kua bantu; yeye udi ujadika dilumbulula diakane dia Yehowa, ne mikenji yandi kudi Bena Isalele.

²² Bua Dana yeye wakamba ne, Dana udi bu muana wa nyama wa ntambue: udi muhika mumuke ku Bashana.

²³ Bua Nafatale yeye wakamba ne, Nafatale wakadiukutshisha ne diakalengele, udi mûle tente ne disanka dia Yehowa. Uhiane biebe buloba bua ku dishiha ne bua ku sude.

²⁴ Bua Ashe yeye wakamba ne, Ashe asanke biandi ne bana, ikale ne diakalengele kudi bana babo: atue dikasa diandi mu manyi.

²⁵ Milonda yebe ya bibi bia musoko neyikale ya tshiamu tshifike ne tshiamu tshia mitaku, bukole buebe nebuikale bule bua matuku ebe onso.

²⁶ Yeshuluna, kakuena mukuabo bu Nzambi, udi ushikama biandi mu diulu bua kukukuatshisha: bulengele buandi budi ku mutu kua matutu.

²⁷ Nzambi wa kashidi udi muaba webe wa kushikama talalâ, ne maboko andi a tshiendelele atu akubisha: yeye wakihata bena lukuna ku mesu kuebe, ne yeye wakamba ne, Bashihai.

²⁸ Isalele udi ushikama biandi talalâ, mpokolo wa Yakoba udi ha nkayandi mu madimi a blé ne a nvinyo mihia-mihia: ne matutu andi adi amatshisha dibungi.

²⁹ Bena Isalele, nuenu nudi ne disanka, banganyi badi bu nuenu basungidibue kudi Yehowa! Yeye udi bu ngabu wa dikuatshisha dienu; udi bu muele wa nvita unudi nutamba nʼau bakuabo! Bantu badi nʼenu lukuna nebanukokele, nuenu nenudiate mikuna yabo mu makasa enu.