Dielulula 2 - Mukanda wa Nzambi Dihungila Dikulukulu ne Dihungila Dihia-dihia 2003

Bidimu Biakashalabo mu Tshihela

¹ Tuakanyunguluka, tuakaya mu tshihela mu nshila wa ku Dishiba Dikunze, bu muakangambila Yehowa; tuakanyunguluka mukuna wa Sei matuku a bungi.

² Yehowa wakangambila ne,

³ Nuakunyunguluka mukuna eu musangu mule, yai bienu ku nôde.

⁴ Wambile bantu aba ne, Nenuhite mu buloba bua bana benu, bana ba Esau, badi bashikama mu Sei; bobo nebanutshine, nudimuke bienu;

⁵ kanutandanganyi nʼabo, bualu bua tshiena munuhe buloba buabo, nansha kaba ka bunene bua dikasa dia muntu; bualu bua nakamana kuha Esau mukuna wa Sei bu buhianyi buandi.

⁶ Nudi mua kudisumbila bia kudia kudibo ku argent, bua nuenu kudia; nenudisumbile mai a kunua kudibo ku argent, bua nuenu kunua.

⁷ Bualu bua Yehowa, Nzambi wenu, wakatuadishila disanka mu malu onso anuakenza ne tshianza tshienu; yeye wakamanya ngendu yenu mu tshihela etshi tshinene; mu bidimu ebi makumi anai Yehowa, Nzambi wenu, wakadi nʼenu; kanuakakengela tshintu.

⁸ Nunku tuakahita bana betu, bana ba Esau, bakadi bashikama mu Sei, mu nshila wa ku Alabâ ku Elata to ne ku Esione-gebê. Tuakanyunguluka, tuakaya mu nshila wa ku tshihela tshia Moaba.

⁹ Yehowa wakangambila ne, Kanutatshishi Bena Moaba, kanuluanganyi nʼabo nvita; bualu bua tshiena munuhe buloba buabo bu buhianyi buenu; bualu bua nakamana kuha bana ba Lota buloba bua Ala bu buhianyi buabo.

¹⁰ (Bena Eme bakashikamamu diambedi, bantu banene, bantu ba bungi, bule bua Bena Anaka:

¹¹ badi bababikila kabidi ne, Bena Lefa, bu Bena Anaka; kadi Bena Moaba bakababikila ne, Bena Eme.

¹² Bena Holi bakashikama mu Sei diambedi, kadi Bena Esau bakabalonda ku nyima; bakabashiha ku mpala kuabo, bakashikama mu muaba wabo; bu muakenza Bena Isalele ku buloba bua buhianyi buabo, buakabahebua kudi Yehowa.)

¹³ Katataka bikai bienu, nusabuke kasulu ka Zelede; tuakasabuka kasulu ka Zelede.

¹⁴ Bungi bua matuku atuakalala mu nshila ku Kadeshe-bânea tô ne ku kasulu ka Zelede akadi bidimu makumi asatu ne muanda mukulu; tô ne hakafua mulongo wonso wa bena nvita munkatshi mua tshitudilu, bu muakabalaya Yehowa.

¹⁵ Tshianza tshia Yehowa tshiakadi kudibo, bua kubashiha munkatshi mua tshitudilu, tô ne hakafuabo buonso buabo.

¹⁶ Hashishe hakajimina bena nvita bonso, hakafuabo munkatshi mua bantu,

¹⁷ Yehowa wakangambila ne,

¹⁸ Lelu nenuhite ku Ala, butshika bua Moaba:

¹⁹ hanualua ba buihi ne Bena Amona, kanubatatshishi, kanuluanganyi nʼabo; bualu bua tshiena munuhe buloba bua Bena Amona bu buhianyi buenu, bualu bua nakamana kuha bana ba Lota buloba abu bu buhianyi buabo.

²⁰ (Buloba ebu buakadi buloba bua Bena Lefa: Bena Lefa bakashikamamu diambedi; kadi Bena Amona badi bababikila ne, Bena Zamazuma,

²¹ bantu bakole, bantu ba bungi, bule bua Bena Anaka; kadi Yehowa wakabashiha ku mpala kuabo, bobo bakabalonda ku nyima, bakashikama mu muaba wabo;

²² bu muakenzeleye bana ba Esau, bakadi bashikama mu Sei, hakashiheye Bena Holi ku mpala kuabo; bobo bakabalonda ku nyima, badi bashikama mu muaba wabo tô ne ku dituku edi.

²³ Bena Awa bakadi bashikama mu misoko tô ne ku Gaza ne Bena Kafetô bakafuma ku Kafetô, bakabashiha, bakashikama mu muaba wabo.)

²⁴ Bikai bienu, yai, nuhite mu tshibanda tshia mai a Ânona: monai, nakafila Sihona, Muena Amole, mukelenge wa Heshebona, ne buloba buandi mu tshianza tshienu; nubange kuhiana buloba, nuluangane nʼandi nvita.

²⁵ Lelu nembange kubuesha buowa ne ditshina mu mitshima ya bantu bonso badi muinshi mua diulu, badi bunvua lumu luenu: ne hunvuabo, nebazakale ne mitshima yabo nebanyingalale bualu buenu.

Bena Isalele Badi Bahita Sihona Bukole

²⁶ Nakatuma bamessager mu tshihela tshia Kedemota kudi Sihona, mukelenge wa Heshebona, ne mei a ditalala ne,

²⁷ Witabushe bua tuetu tuhite mu buloba buebe: netuye anu mu musesu munene, katuena tusesuka ku tshianza tshia balume anyi ku tshianza tshia bakashi.

²⁸ Wewe neutusumbishe bia kudia ku argent bua tuetu kudia; Utuhe mai a kunua ku argent, bua tuetu kunua, anji kuitabusha bua tuetu tuhite ku makasa;

²⁹ bu muakatuenzela bana ba Esau ne Bena Moaba badi bashikama mu Ala, tô ne hatuasabuka Yadene mu buloba buakatuha Yehowa, Nzambi wetu.

³⁰ Kadi Sihona, mukelenge wa Heshebona, wakahidia bua tuetu tuhite mu buloba; bualu bua Yehowa, Nzambi wenu, wakanyengabasha meji andi, wakakolesha mutshima wandi, bualu bua kumufila mu tshianza tshienu, bu muakenzeye lelu.

³¹ Yehowa wakangambila ne, Mona, nakubanga kufila Sihona ne buloba buandi mu tshianza tshienu, bua nuenu nuhiane buloba buandi.

³² Hashishe Sihona wakalua kutudi ne bantu bandi bonso bua kuluangana nʼetu nvita ku Yahasa.

³³ Yehowa, Nzambi wetu, wakamufila mu tshianza tshietu; tuakabashiha ne yeye ne bana bandi balume ne bantu bandi bonso.

³⁴ Tuakanyenga misoko yandi yonso tshikondo atshi, tuakahaula musoko ne musoko muakadi bantu, ne bakashi ne bana bakese: katuakashiya nansha muntu;

³⁵ kadi tuakadiangatshila bimuna, ne bintu biakadi mu misoko ituakanyenga.

³⁶ Ku Aloê udi ku muelelu wa tshibanda tshia Ânona ne ku musoko mukuabo udi mu tshibanda tô ne ku Gilada, katuakasangana musoko umue wakatuhita bukole bua kûnyenga; Yehowa, Nzambi wetu, wakafua misoko yonso mu tshianza tshietu;

³⁷ anu buloba bua Bena Amona, katuakalua ha buihi nʼabu; buloba buonso bua dishiya dia kasulu ka Yaboka, ne misoko ya ku mikuna ne miaba yonso yakatukanda Yehowa, Nzambi wetu.