Dibadika 4 - Mukanda wa Nzambi Dihungila Dikulukulu ne Dihungila Dihia-dihia 2003

Midima Yakahabo Bena Lewi

¹ Yehowa wakambila Mose ne Alona ne,

² Balai bungi bua bana balume ba Kohata ba munkatshi mua bana balume ba Lewi ku meku abo ne ku nsubu ya batatuʼabo,

³ mu bidimu makumi asatu to ne ku bidimu makumi atanu buonso buabo badi bakuata mudimu wa mu ntenta wa kusambakena.

⁴ Eu udi mudimu wa bana balume ba Kohata udibo benza ne bintu bia tshijila mu ntenta wa kusambakena,

⁵ hayabo ku luendu Alona neabuelemu ne bana bandi balume nebatuhe tshilulu tshikudika, nebabituale hatshi mushete wa Nzambi,

⁶ nebâteke tshibuikilu tshia biseba bia nkonge ha mutu hatshi, nebâteke tshilulu tshifike ha mutu hatshi kabidi, nebabueshemu mitshi ya mushete.

⁷ Nebateke tshilulu tshia bleu ha mutu ha mesa a mampa, nebâteke ha mutu hatshi malonga ne nkutu ne mpanza ne makoho adibo balongolola nʼau, ne mampa neikalehu,

⁸ nebatekehu tshilulu tshikunze, nebâteke tshibuikidi tshia biseba bia nkonge ha mutu hatshi, nebabueshemu mitshi ya mesa.

⁹ Nebangate tshilulu tshia bleu, nebabuikile hatshi bitekelu bia minda ne minda, ne bintu bidibo bajima habi minda, ne tuhanza tua mishila ya kahia, ne bihanza bia manyi adibo bakuatshisha nʼau minda

¹⁰ nebateke minda ne malonga ne bintu ebi bionso mu tshibuikidi tshia biseba bia nkonge, nebabiteke ha mitshi ibidi idi mikuatakasha.

¹¹ Nebateke tshilulu tshia bleu ha mutu ha tshioshelu tshia or, nebâteke ha mutu hatshi tshibuikidi tshia biseba bia nkonge, nebabueshemu mitshi ya tshioshelu

¹² nebangate malonga onso adibo benza nʼau mudimu wa mu nsubu wa tshitendelelu nebâteke mu tshilulu tshia bleu, nebâbuikde ne tshibuikidi tshia biseba bia nkonge, nebâteke ha mitshi ibidi idi mikuatakasha

¹³ Nebumushe butue ku tshioshelu, nebatekehu tshilulu tshikunzubile

¹⁴ nebâteke ha mutu hatshi bintu bionso bidibo benza nʼabi mudimu watshi ne malonga a kahia ne nkobo ya munyinyi, ne nkasu, ne bihanza ne malonga onso a tshioshelu, nebâteke tshibuikilu tshia biseba bia nkonge, nebabueshemu mitshi yatshi.

¹⁵ Kushikisha Alona ne bana bandi balume kubuikila nsubu wa tshitendelelu ne bintu bionso bia mu nsubu, hayabo mu nshila, hashishe bana balume ba Kohata nebalue bua kubituala, kadi bobo kabalengi bintu bia tshijila bianza, bua kabafu. Bintu ebi mmajitu a bana balume ba Kohata mu nsubu wa tshitendelelu.

¹⁶ Bintu bidi nʼabi Eleazâ, muana mulume wa Alona, muakuidi, nebikale manyi a minda ne musenga wa manananshi, ne mulambu wa bukula, ne manyi adibo bela ha mutuyeye udi mulami wa nsubu wa tshitendelelu ne bintu bionso bidimu, ne wa muaba wa tshijila ne bintu bionso bidimu.

¹⁷ Yehowa wakambila Mose ne Alona ne,

¹⁸ Kanumushi tshisamba tshia meku a Bena Kohata munkatshi mua Bena Lewi,

¹⁹ nubenzele nunku, bua bikale ne muoyo, kabafu, haluabo ha buihi ne bintu bia tshijila Alona ne bana bandi balume nebabuelemu, nebaleshe muntu ne muntu mudimu wandi ne bujitu buandi,

²⁰ kababuedi bua kutangila bintu bia tshijila nansha kakese, bua kabafu.

²¹ Yehowa wakambila Mose ne,

²² Ubale bungi bua bana balume ba Gêshona kabidi ku nsubu ya batatuʼabo ne ku meku abo;

²³ ba bidimu makumi asatu tô ne ku bidimu makumi atanu wewe neubabale, buonso buabo badi bakuata mudimu mu ntenta wa kusambakena.

²⁴ Eu mmudimu wa meku a Bena Gêshona udibo benza ne majitu adibo batuala

²⁵ nebabidie bilulu bidi binyunguluka nsubu wa tshitendelu, ne ntenta mene wa kusambakena, ne tshilulu tshia ha mutu, ne tshibuikidi tshia biseba bia nkonge tshidi ha mutu hatshi, ne tshilulu tshidi ku mbelu kua nsubu,

²⁶ ne bilulu bia ku luhangu, ne tshilulu tshidi ku tshibi tshia luhangu tshidi hehi ne nsubu wa tshitendelelu tshidi tshinyunguluka tshioshelu tshia kahia, ne nshinga ya ku luhangu, ne bintu bionso bidibo benza nʼabi mudimu, bobo nebenze mudimu eu.

²⁷ Bu mu dî dia Alona ne bana bandi balume Bena Gêshona nebenze mudimu wabo, nebatuale majitu abo; nuenu nenubaleshe majitu abo.

²⁸ Eu udi mudimu wa meku a bana balume ba Bena Gêshona mu ntenta wa kusambakena ne bintu bidibo nʼabi bualu nebikale mu tshianza tshia Itamâ, muana mulume wa Alona muakuidi.

²⁹ Wewe neubale bana balume ba Bena Melali ku meku abo ne ku nsubu ya batatuʼabo,

³⁰ ba bidimu makumi asatu tô ne ku bidimu makumi atanu, wewe neubabale, muntu yonso udi akuata mudimu mu ntenta wa kusambakena.

³¹ Ebi mbintu bidibo ne bualu bua kutuala, mu mudimu udibo benza mu ntenta wa kusambakena mabaya a nsubu ne mitshi yandi ne makunshi andi ne nkanu yandi,

³² ne makunshi a ku luhangu ne nkanu yau ne milonda yau ne nshinga yau ne bintu biau bionso bidibo benza nʼabi mudimuku mena abi wewe neubaleshe bintu bia majitu abo.

³³ Eu udi mudimu wa meku a bana balume ba Melali, udibo benza mu ntenta wa kusambakena, ku tshianza tshia Itamâ, muana mulume wa Alona muakuidi.

³⁴ Mose ne Alona ne bakelenge ba mu tshisumbu tshia Bena Isalele bakabala bana balume ba Bena Kohata ku meku abo ne ku nsubu ya batatuʼabo,

³⁵ ba bidimu makumi asatu to ne ku makumi atanu, muntu yonso wakadi ubuela mu mudimu wa mu ntenta wa kusambakena

³⁶ bakabalabo ku meku abo bakadi binunu bibidi ne nkama muanda mutekete ne makumi atanu.

³⁷ Aba mbantu bakabalabo mu meku a Bena Kohata bakadi benza mudimu mu ntenta wa kusambakena, bakababala kudi Mose ne Alona, bu muakambila Yehowa Mose.

³⁸ Bungi bua bana balume ba Gêshona bakabalabo ku meku abo ne ku nsubu ya batatuʼabo,

³⁹ ba mu bidimu makumi asatu tô ne ku bidimu makumi atanu, buonso buabo bakadi benza mudimu mu ntenta wa kusambakena,

⁴⁰ bakabalabo ku meku abo ne ku nsubu ya batatuʼabo bakadi binunu bibidi ne nkama isambombo ne makumi asatu.

⁴¹ Aba mbana balume ba Gêshona bakabalabo ku meku abo, buonso buabo bakenza mudimu mu ntenta wa kusambakena, bakabalabo kudi Mose ne Alona bu muakamba Yehowa.

⁴² Bana balume ba Melali bakabalabo ku meku abo ne ku nsubu ya batatuʼabo,

⁴³ ba bidimu makumi asatu to ne ku bidimu makumi atanu, buonso buabo bakadi benza mudimu mu ntenta wa kusambakena,

⁴⁴ bakabalabo ku meku abo bakadi binunu bisatu ne nkama ibidi.

⁴⁵ Aba mbana balume ba Melali bakabalabo ku meku abo, bakabalabo kudi Mose ne Alona bu muakambila Yehowa Mose.

⁴⁶ Bungi bua Bena Lewi bakabalabo kudi Mose ne Alona ne kudi bakelenge ba mu Isalele, ku meku abo ne ku nsubu ya batatuʼabo,

⁴⁷ ba bidimu makumi asatu tô ne ku bidimu makumi atanu, buonso buabo bakadi benza mudimu ne bakadi batuala majitu a ntenta wa kusambakena,

⁴⁸ bakabalabo bakadi binunu muanda mukulu ne nkama itanu ne makumi muanda mukulu.

⁴⁹ Bu muakadi dî dia Yehowa bakabalabo kudi Mose, muntu yonso ku mudimu wandi ne ku bujitu buandi, bakabalabo kudiye bu muakambila Yehowa Mose.