Dibadika 34 - Mukanda wa Nzambi Dihungila Dikulukulu ne Dihungila Dihia-dihia 2003

¹ Yehowa wakambila Mose ne,

² Wambile Bena Isalele ne, Hanuabuela mu buloba bua Kanâna (ebu mbuloba bua buhianyi buenu, buloba bua Kanâna mene ku mikalu yabo yonso)

³ mukalu wenu wa ku luseke lua sude newikale ku tshihela tshia Sina, ne ku mukalu wa Edome to ne kuinshi kua Dishiba dia Luehu ku luseke lua ku esete,

⁴ mukalu wenu neunyunguluke mukuna wa Akalabima ku luseke lua ku sude, neutuangane ne tshihela tshia Sina tô ne ku Kadeshe-bânea, tô ne ku Hasâ-adâ, to ne ku Asemona,

⁵ mukalu wenu neunyunguluke ku Asemona tô ne ku kasulu ka Ejipitu tô ne ku mai manene.

⁶ Mukalu wenu wa luseke lua ku wesete neutuangane ne muelelu wa mai manene, eu newikale mukalu wenu wa ku wesete.

⁷ Mukalu wenu wa ku luseke lua ku nôde newikale ku mai manene tô ne ku mukuna wa Hô,

⁸ ku mukuna wa Hô nenufunde tô ne ku mukalu wa Hamata ku Sedada;

⁹ mukalu newikale kabidi ku Zifelona tô ne ku mukalu wa Hasâ-enana, eu newikale mukalu wenu wa ku nôde.

¹⁰ Nenufunde mukalu wenu wa ku esete ku Hasâ-enana tô ne ku Shefama,

¹¹ mukalu neuhueke ku Shefama to ne ku Libela ku esete kua Ayina, mukalu neuhueke tô ne ku muelelu wa dishiha dia Kinelete ku esete,

¹² mukalu neuhueke tô ne ku Yadene uhueka tô ne ku Dishiba dia Luehu Ai mmikalu idi înyunguluka buloba buenu.

¹³ Mose wakambila Bena Isalele ne, Ebu mbuloba bunudi nuhiana hanuela nshobo, buloba buakuha Yehowa kudi bisamba tshitema ne tshituha tshia tshisamba tshikuabo,

¹⁴ bualu bua Bena Lubena ku nsubu ya batatuʼabo, ne Bena Gada ku nsubu ya batatuʼabo, ne tshituha tshia tshisamba tshia Manashe bakamana kuangata buhianyi buabo;

¹⁵ bisamba bibidi ne tshituha tshia tshikuabo bakamana kuangata buhianyi buabo dishiya dia Yadene, batangilangane ne Yeleko, ku esete, kudi diba dihatuka.

¹⁶ Yehowa wakambila Mose ne,

¹⁷ Au mmena a balume badi banutahuluila buloba bua buhianyi buenu, Eleazâ muakindi ne Yoshua, muana mulume wa Nuna.

¹⁸ Nenusungule mukelenge wa mu tshisamba ne tshisamba bua kunutahuluila buloba.

¹⁹ Au mmena a bakelenge aba: wa tshisamba tshia Yuda, Kaleba, muana mulume wa Yefune;

²⁰ wa tshisamba tshia Shimeona, Shemuele, muana mulume wa Amihuda,

²¹ wa tshisamba tshia Benyamina, Elidada, muana mulume wa Kiliona,

²² wa tshisamba tshia Dana, Buki, muana mulume wa Yogeli,

²³ wa tshisamba tshia Yosefe tshisamba tshia Manashe, Haniele, muana mulume wa Efoda,

²⁴ wa tshisamba tshia Efelayima, Kemuele, muana mulume wa Shifetana,

²⁵ wa tshisamba tshia Zebuluna, Elisafana, muana mulume wa Pânaka,

²⁶ wa tshisamba tshia Yisakâ, Palatiele, muana mulume wa Azana,

²⁷ wa tshisamba tshia Ashê, Ahihuda, muana mulume wa Shelomi,

²⁸ wa tshisamba tshia Nafatale, Pedahele, muana mulume wa Amihuda.

²⁹ Aba mbantu bakasungula Yehowa bua kutahulula Bena Isalele buloba bua Kanâna.