Dibadika 30 - Mukanda wa Nzambi Dihungila Dikulukulu ne Dihungila Dihia-dihia 2003

Mikenji ya Kuditshiha

¹ Mose wakambila bakadi ku mutu kua bisamba bia Bena Isalele ne, Edi ndî diakutuambila Yehowa.

² Haditshiha mulume kudi Yehowa, anyi halayeye mulayi wandi, yeye kena mumanye mua kulekela dî diandi, yeye nênze mei onso akaluhuka mukana muandi.

³ Haditshiha mukashi kudi Yehowa, anyi halayeye mulayi wandi, hatshidiye mu nsubu wa tatuʼandi, ku bunsongakashi buandi,

⁴ biunvua tatu wandi kuditshiha kuandi, biahuwa tatu wandi kudiye, nunku kuditshiha kuandi kuonso ne mei andi onso nebijalame.

⁵ Kadi bikala tatu wandi mumukande mu dituku diakunvueye kuditshiha kuandi, nunku kuditshiha kuandi ne mei andi onso kabiena bijalama: Yehowa neamubuikidile bualu ebu bua tatuʼandi wakamuitaba.

⁶ Bikaleye mubaka kudi mulume hatshidiye ne kuditshiha kuandi anyi mei makuabo akaditshiheye nʼau

⁷ ne biunvua mulume wandi ne biahuweye mu dituku diakunveye kuditshiha kuandi, nunku kuditshiha kuandi ne mei andi onso nebijalame.

⁸ Kadi bikala mulume wandi mumukande mu dituku diakunvueye kuditshiha, nunku kuditshiha kuandi ne mei andi onso nebikale tshianana, Yehowa neamubuikidile bualu abu.

⁹ Kadi kuditshiha kua mukashi wa mu lufuila, anyi mukashi udi muhidia kudi mulume wandi, mei andi onso akaditshiheye nʼau neajalame.

¹⁰ Bikaleye mudi tshihe mu nsubu wa mulume wandi, anyi mulaye mulayi wandi,

¹¹ ne bikala mulume wandi munvue, muhuwe biandi kayi mumukande nansha, nunku kuditshiha kuandi ne mei andi onso nebijalame.

¹² Kadi bikala mulume wandi mumukande mu dituku diakunvueye, nunku kuditshiha kuandi ne mei andi onso kabiena bualame, mulume wandi wakavuisha malu au bu malu a hatuhu, Yehowa neamubiukidile bualu abu.

¹³ Mulume wandi udi mumanye mua kujadika kudi tshiha kuandi kuonso anyi mei andi onso, anyi udi mua kumusha malu au ne malu a hatuhu.

¹⁴ Biahuwa mulume wandi ku dituku diakunvueye kuditshiha kuandi anyi mei makuabo akaluhuka mukana muandi, nunku yeye udi ujadika kuditshiha kuandi kuonso ne mei andi onso, bualu bua yeye wakuhuwa ku dituku diakakunvueye.

¹⁵ Bikaleye muvuishe malu au bu malu a hatuhu, hakunvueye, nunku yeye neamutuadile bubi buandi.

¹⁶ Ei idi mikenji yakela Yehowa kudi Mose bua mulume ne mukashi wandi, ne bua tatu ne muanʼandi mukashi udi mu nsubu wandi mu bunsongakashi buandi.