Dibadika 3 - Mukanda wa Nzambi Dihungila Dikulukulu ne Dihungila Dihia-dihia 2003

Bungi bua Bena Lewi ne Midima Yabo

¹ Ebi mbikondo bia Alona ne Mose mu dituku diakasomba Yehowa ne Mose mu mukuna wa Sinai.

² Au mmena a bana ba balume ba Alona Nadaba muanʼa bute ne Abihu ne Eleazâ ne Itamâ.

³ Au mmena a bana ba balume ba Alona bakuidi bakadi ne manyi mela ha mitu, bakajidilabo bua kuenza mudimu wa buakuidi.

⁴ Nadaba ne Abihu bakafua ku mpala kua Yehowa, hakaluabo ne kahia kakadi kakayi kajidila ku mpala kua Yehowa, mu tshihela tshia Sinai, bobo kabakadi ne bana, ne Eleazâ ne Itamâ bakenza mudimu wa buakuidi ku mesu kua Alona tatuʼabo.

⁵ Yehowa wakambila Mose ne,

⁶ Ulue biebe ne tshisamba tshia Lewi, ubateke ku mpala kua Alona muakuidi, bua bobo bamuenzele mudimu.

⁷ Bobo nebalame bintu biandi ne bintu bia bantu bonso ku mpala kua ntenta wa kusambakena, bua kuenzelabo mudimu wa mu nsubu wa tshitendelelu.

⁸ Bobo nebalame bintu bia mu nsubu wa tshitendelelu, ne bintu bia Bena Isalele, bua kuenzelabo mudimu wa mu ntenta wa kusambakena.

⁹ Wewe neufue Bena Lewi kudi Alona ne kudi bana bandi balume bobo badi bafidibue kudi Alona, bua kukuatshishabo Bena Isalele.

¹⁰ Wewe neusungule Alona ne bana bandi balume, ne bobo nebashale ne mudimu wa buakuidi, bialua muenyi ha buihi nebamushihe.

¹¹ Yehowa wakambila Mose ne,

¹² Mona, meme nakudiangatshila Bena Lewi munkatshi mua Bena Isalele mu miaba ya banʼa bute bonso bakalelabo munkatshi mua Bena Isalele, Bena Lewi nebikale banyi:

¹³ bualu bua banʼa bute bonso mbanyi, mu dituku dinakashiha banʼa bute bonso mu buloba bua Ejipitu, nakadijidila banʼa bute bonso ba mu Isalele, ne ba bantu ne ba nyama, bobo mbanyi, meme ndi Yehowa.

¹⁴ Yehowa wakambila Mose mu tshihela tshia Sinai ne,

¹⁵ Ubale bana ba Lewi ku nsubu ya batatuʼabo ne ku meku abo ubale bana ba balume bonso ba mu ngondo umue tô ne ha mutu.

¹⁶ Mose wakababala bu mu dî dia Yehowa.

¹⁷ Aba mbana ba balume ba Lewi ku mena abo Gêshona ne Kohata ne Melali.

¹⁸ Au mmena a bana ba balume ba Gêshona ku meku abo Libini ne Shimei.

¹⁹ Bana ba balume ba Kohata ku meku abo Amalama ne Yisehâ ne Hebelone ne Uziele

²⁰ Bana ba balume ba Melali ku meku abo Mali ne Mushi. Au mmeku a Bena Lewi ku nsubu ya batatuʼabo.

²¹ Mu Gêshona muakadi diku dia Bena Libini ne diku dia Bena Shimei, au mmeku a bena Gêshona.

²² Bantu bakabalabo, bana balume ba mu ngondo umue tô ne ha mutu, bakadi binunu muanda mutekete ne nkama itanu.

²³ Meku a Bena Gêshona nebashikame ku nyima kua nsubu wa tshitendelelu ku wesete.

²⁴ Eleyasafa muana mulume wa Laele neikale mukelenge wa nsubu wa batatu ba Bena Gêshona.

²⁵ Bintu bia mu nsubu wa tshitendelelu bidi bana balume ba Gêshona balama nebikale ntenta, ne tshilulu tshidibo bateka ha mutu, ne bilulu bia ku bibi bia ntenta wa kusambakena,

²⁶ ne bilulu bia luhangu ne bilulu bidibo bateka ku mbelu kua luhangu, hehi ne nsubu wa tshitendelelu, ne hehi ne tshioshelu, ne nshinga ya ku luhangu bua mudimu wa tshitendelelu.

²⁷ Mu Kohata muakadi diku dia Bena Amalama ne dia Bena Yisehâ ne dia Bena Hebelone ne dia Bena Uziele au mmeku a Bena Kohata.

²⁸ Bungi bua bana ba balume ba mu ngondo umue tô ne ha mutu buakadi binunu muanda mukulu ne nkama isambombo, bakadi balama bintu bia nsubu wa tshitendelelu.

²⁹ Bantu ba mu meku a bana balume ba Kohata nebashikame ku luseke lua ku sude.

³⁰ Elisafana muana wa balume wa Uziele neikale mukelenge wa nsubu wa batatu ba Bena Kohata.

³¹ Bobo nebalame mushete wa Nzambi ne mesa ne minda ne bioshelu ne malonga adibo benza nʼau mudimu mu nsubu wa tshitendelelu, ne tshilulu tshidibo bateka ku mpala kua muaba wa tshijila.

³² Eleazâ muana mulume wa Alona, muakuidi, neikale ku mutu kua bakelenge ba Bena Lewi, ne ku mutu kua bantu badi balama bintu bia mu nsubu wa tshitendelelu.

³³ Mu Melali muakadi diku dia Bena Mali ne dia Bena Mushi au mmeku a Melali.

³⁴ Bungi bua balume ba mu ngondo umue tô ne ha mutu buakadi binunu bisambombo ne nkama ibidi.

³⁵ Suliele, muana mulume wa Abihayila, neikale mukelenge wa nsubu wa batatu ba meku a Melali bobo nebashikame ku luseke lua nsubu wa tshitendelelu lua ku nôde.

³⁶ Bintu bidi bana balume ba Melali balama bidi mabaya a nsubu wa tshitendelelu, ne mitshi ne makunshi ne nkanu ne bintu biabi bionso;

³⁷ ne makunshi a ku luhangu ne nkanu yai ne mitanda yai ne nshinga yai.

³⁸ Mose ne Alona ne bana bandi balume nebashikame ku mpala kua ntenta wa kusambakena ku luseke lua ku esete kudi diba dihatuka, bua kulama nsubu wa tshitendelelu ne bintu bia Bena Isalele; bialua muenyi ha buihi nebamushihe.

³⁹ Bungi bua Bena Lewi bakabalabo kudi Mose ne Alona bu muakambila Yehowa, ku meku abo, balume bonso ba mu ngondo umue tô ne ha mutu, buakadi binunu makumi abidi ne bibidi.

Kuhikula kua Banʼa Bute

⁴⁰ Yehowa wakambila Mose ne, Ubale banʼa bute balume bonso ba Bena Isalele ba mu ngondo umue to ne ha mutu, funda bungi bua mena abo.

⁴¹ Wewe newangatshile Bena Lewi (meme ndi Yehowa) mu miaba ya banʼa bute ba munkatshi mua Bena Isalele, ne bimuna bia Bena Lewi mu miaba ya banʼa bute ba bimuna bia Bena Isalele.

⁴² Mose wakabala banʼa bute bonso ba munkatshi mua Bena Isalele, bu muakamuambila Yehowa.

⁴³ Bungi bua banʼa bute balume ba mu ngondo umue tô ne ha mutu buakabalabo buakadi binunu makumi abidi ne bibidi ne nkama ibidi ne makumi muanda mutekete ne basatu.

⁴⁴ Yehowa wakambila Mose ne,

⁴⁵ Angata Bena Lewi mu miaba ya banʼa bute ba munkatshi mua Bena Isalele, ne bimuna bia Bena Lewi mu miaba ya bimuna biabo, Bena Lewi nebikale banyi meme ndi Yehowa

⁴⁶ Bua kuhikula banʼa bute ba Bena Isalele, nkama ibidi ne makumi muanda mutekete ne basatu, badi bahita balume ba Bena Lewi bungi,

⁴⁷ newangate nshekele itanu ku muntu ne ku muntu bu nshekele wa mu nsubu wa Nzambi (nshekele udi bu guéras makumi abidi):

⁴⁸ wewe neufue nshekele ya bungi buabo buakahikulabo, kudi Alona ne kudi bana bandi balume.

⁴⁹ Mose wakangata argent ya buhikudi bua bantu bakahita Bena Lewi bungi;

⁵⁰ yeye wakangata nshekele kudi banʼa bute ba Bena Isalele bu tshinunu tshimue ne nkama isatu ne makumi asambombo ne itanu, bu nshekele udibo bafile mu nsubu wa tshitendelelu.

⁵¹ Mose wakafua argent ya buhikudi buabo kudi Alona ne bana bandi balume bu muakadi dî dia Yehowa, bu muakambila Yehowa Mose.