Dibadika 2 - Mukanda wa Nzambi Dihungila Dikulukulu ne Dihungila Dihia-dihia 2003

Tshitudilu ne Balombodi ba Bisamba

¹ Yehowa wakambila Mose ne Alona ne,

² Muntu ne muntu wa munkatshi mua Bena Isalele nenshimike ntenta wandi hehi ne dibendele diandi, didi ne bimanyinu bia nsubu ya batatuʼabo bifundahu, nebashimike ntenta yabo minyunguluke tshitendelelu mitangile ku tshitendelelu.

³ Bantu badi ne bimanyinu bia dibendele dia tshisamba tshia Yuda ku tshisumbu ne ku tshisumbu nebashikame ku luseke lua ku esete kudi diba dihatuka. Nashona muana mulume wa Aminadaba neikale mukelenge wa bana ba Yuda.

⁴ Bantu bandi bakamubadilabo bakadi binunu makumi muanda mutekete ne binai ne nkama isambombo.

⁵ Bantu ba mu tshisamba tshia Yisakâ nebashikame hehi nʼandi. Netanele muana mulume wa Sua neikale mukelenge wa bana ba Yisakâ.

⁶ Bantu bandi bakamubadilabo bakadi binunu makumi atanu ne binai ne nkama mai.

⁷ Tshisamba tshia Zebuluna, Eliaba muana mulume wa Helona neikale mukelenge wa bana ba Zebuluna.

⁸ Bantu bandi bakamubadilabo bakadi binunu makumi atanu ne muanda mutekete ne nkama mai.

⁹ Bantu bonso bakabalabo ba mu tshitudilu tshia Yuda bakadi binunu lukama ne makumi muanda mukulu ne bisambombo ne nkama mai ku bisumbu biabo Bobo nebaye ku mpala.

¹⁰ Nebateke dibendele dia tshitudilu tshia Lubena ku luseke lua ku sude. Elisu muana mulume wa Shedeu neikale mukelenge wa bana ba Lubena.

¹¹ Bantu bandi bakamubadilabo bakadi binunu makumi anai ne bisambombo ne nkama itanu.

¹² Bantu ba mu tshisamba tshia Shimeona nebashikame hehi nʼandi Shelumiele muana mulume wa Sulishadai neikale mukelenge wa bana ba Shimeona.

¹³ Bantu bandi bakamubadilabo bakadi binunu makumi atanu ne tshitema ne nkama isatu.

¹⁴ Tshisamba tshia Gada, Eleyasafa muana mulume wa Luele neikale mukelenge wa bana ba Gada.

¹⁵ Bantu bandi bakamubadilabo bakadi binunu makumi anai ne bitanu ne nkama isambombo ne makumi atanu.

¹⁶ Bantu bonso bakabalabo ba mu tshitudilu tshia Lubena bakadi binunu lukama ne makumi atanu ne tshimue ne nkama mai ne makumi atanu Bobo nebatonde ku nyima, tshisumbu tshibidi.

¹⁷ Nunku nebaye ne ntenta wa kusambakena ne tshisumbu tshia Bena Lewi tshikala munkatshi mua bisumbu bikuabo bu mudibo bashikama mu bitudilu, nebaye ku mpala nunku, muntu mu muaba wandi mundi mu muaba wandi ku mabendele abo.

¹⁸ Nebateke dibendele dia tshitudilu tshia Efelayima ku luseke lua ku wesete ku bisumbu biabo Elishama muana mulume wa Amihuda neikale mukelenge wa bana ba Efelayima

¹⁹ Bantu bandi bakamubadilabo bakadi binunu makumi anai ne nkama itanu.

²⁰ Bantu ba mu tshisamba tshia Manashe nebashikame hehi nʼandi. Gamaliele muana mulume wa Pedasu neikale mukelenge wa bana ba Manashe.

²¹ Bantu bakamubadilabo bakadi binunu makumi asatu ne bibidi ne nkama ibidi.

²² Tshisamba tshia Benyamina Abidana muana mulume wa Gideoni neikale mukelenge wa bana ba Benyamina.

²³ Bantu bandi bakamubadilabo bakadi binunu makumi asatu ne bitanu ne nkama mai.

²⁴ Bantu bonso bakabalabo ba mu tshitudilu tshia Efelayima bakadi binunu lukama ne muanda mukulu ne lukama lumue ku bisumbu biabo. Bobo nebabalonde ku nyima, tshisumbu tshisatu.

²⁵ Nebateke dibendele dia tshitudilu tshia Dana ku luseke lua ku nôde. Ahiezê muana mulume wa Amishadai neikale mukelenge wa bana ba Dana.

²⁶ Bantu bandi bakamubadilabo bakadi binunu makumi asambombo ne bibidi ne nkama muanda mutekete.

²⁷ Bantu ba mu tshisamba tshia Ashe nebashikame hehi nʼandi Pagiele muana mulume wa Okelana neikale mukelenge wa bana ba Ashe.

²⁸ Bantu bandi bakamubadilabo bakadi binunu makumi anai ne tshimue ne nkama itanu.

²⁹ Tshisamba tshia Nafatale Ahila muana mulume wa Enana neikale mukelenge wa bana ba Nafatale.

³⁰ Bantu bandi bakamubadilabo bakadi binunu makumi atanu ne bisatu ne nkama mai.

³¹ Bantu bonso bakabalabo ba mu tshitudilu tshia Dana bakadi binunu lukama ne makumi atanu ne muanda mutekete ne nkama isambombo. Bobo nebalonde ku nyima kua bonso ku mabendele abo.

³² Aba mbantu bakabalabo ba Bena Isalele ku nsubu ya batatu abo, bungi bua bantu bakabalabo ba mu bitudilu biabo ku bisumbu biabo buakadi binunu nkama isambombo ne bisatu ne nkama itanu ne makumi atanu.

³³ Kadi kabakabala Bena Lewi munkatshi mua Bena Isalele, bu muakambila Yehowa Mose.

³⁴ Bena Isalele bakenza nunku, mu malu onso akambila Yehowa Mose, nunku bakashikama ku mabendele abo, ne bakaya ku mpala ku meku abo ne ku nsubu ya batatuʼabo.