Dibadika 17 - Mukanda wa Nzambi Dihungila Dikulukulu ne Dihungila Dihia-dihia 2003

Mulangala wa Alona

¹ Yehowa wakambila Mose ne,

² Ela dî kudi bana ba Isalele, usungule bantu dikumi ne babidi badi bakelenge ba nsubu ya batatuʼabo, wewe wangata milangala kudibo, muntu ne mulangala wandi muntu ne mulangala wandi, wewe ufunde dina dia muntu ne muntu ha mulangala wandi.

³ Wewe neufunde dina dia Alona ha mulangala wa tshisamba tshia Lewi, bualu bua wewe neusungule mulangala umue kudi muntu ne muntu udi ku mutu kua nsubu ya batatuʼabo.

⁴ Wewe neuyiteke mu ntenta wa kusambakena ku mpala kua mushete kundi ndimuenesha, muaba utudi tusangakana nʼebe.

⁵ Hashishe mulangala wa muntu unakusungula newele ntonga, meme nenshikishe kutontolola kua Bena Isalele kudibo bakutontolola.

⁶ Mose wakamanyisha Bena Isalele, bakelenge babo bakamuha milangala dikumi ne ibidi, mukelenge mulangala wandi mukelenge mulangala wandi, bu mu nsubu ya batatuʼabo, ne mulangala wa Alona wakadi munkatshi mua milangala yabo.

⁷ Mose wakateka milangala ku mpala kua Yehowa mu ntenta wa kusambakena.

⁸ Hakatshiabu Mose wakabuela mu ntenta wa kusambakena, ne monai, mulangala wa Alona wa mu nsubu wa Lewi wakadi muele ntonga ne bilongo, wakakuama tumuma tukese tua amandes.

⁹ Mose wakaluhuka ku mpala kua Yehowa ne milangala yonso kudi Bena Isalele bobo bakatangila ne muntu yonso wakangata mulangala wandi.

¹⁰ Yehowa wakambila Mose ne, Hingasha mulangala wa Alona ku mpala kua mushete, bu tshivulukidi kudi bantu badi basue kutomboka, neumanye mua kushikisha kutontolola kudibo bantontolola nʼaku bua bobo kabafu nansha.

¹¹ Mose wakenza nunku bu muakamuambila Yehowa, mbu muakenzeye.

¹² Bena Isalele bakambila Mose ne, Mona! tudi bafue, ditu tuahanga, ditu tuahanga bonso.

¹³ Muntu yonso udi ulua ha buihi ne nsubu wa Yehowa utu wadia: buonso buetu netulue, anyi?