Dibadika 13 - Mukanda wa Nzambi Dihungila Dikulukulu ne Dihungila Dihia-dihia 2003

Badi Batuma Batentekedi Dikumi ne Babidi ku Kanâna

¹ Yehowa wakambila Mose ne,

² Utume bantu, bua bobo batentekele buloba bua Kanâna, bundi mpa Bena Isalele, usungule mundi ku tshisamba ku tshisamba, mundi yonso udi bu mukelenge munkatshi muabo.

³ Mose wakabatuma ku Kanâna bumuke ku tshihela tshia Palana, muakamba Yehowa buonso buabo bakadi balume ba ku mutu kua Bena Isalele.

⁴ Au mmena abo wa mu tshisamba tshia Lubena, Shamua, muana mulume wa Zaku.

⁵ Wa mu tshisamba tshia Shimeona, Shafata, muana mulume wa Holi.

⁶ Wa mu tshisamba tshia Yuda, Kaleba, muana mulume wa Yefune.

⁷ Wa mu tshisamba tshia Yisakâ, Igala, muana mulume wa Yosefe.

⁸ Wa mu tshisamba tshia Efelayima, Hoshea, muana mulume wa Nuna.

⁹ Wa mu tshisamba tshia Benyamina, Palati, muana mulume wa Lafu.

¹⁰ Wa mu tshisamba tshia Zebuluna, Gadadiele, muana mulume wa Sodi.

¹¹ Wa mu tshisamba tshia Yosefe ne wa mu tshisamba tshia Manashe, Gadi, muana mulume wa Susi.

¹² Wa mu tshisamba tshia Dana, Amiele, muana mulume wa Gemali.

¹³ Wa mu tshisamba tshia Ashe, Setû, muana mulume wa Mikaele.

¹⁴ Wa mu tshisamba tshia Nafatale, Nabi, muana mulume wa Wofesi.

¹⁵ Wa mu tshisamba tshia Gada, Gewele, muana mulume wa Maki.

¹⁶ Au mmena a balume bakatuma Mose bua kutentekelabo buloba Mose wakidika Hoshea, muana mulume wa Nuna ne, Yoshua.

¹⁷ Mose wakabatuma bua kutentekela buloba bua Kanâna, wakabambila ne, Yilai ku nshila wa luseke lua Sude, yai bienu mu buloba bua mikuna

¹⁸ nutangile buloba ne budi munyi, bantu badimu badi bakole anyi badi batekete, badi banya-banya anyi badi ba bungi:

¹⁹ buloba budi munyi budibo bashikama, budi buimpe anyi budi bubi, misoko idibo bashikamamu idi ya hatuhu anyi idi ya mpangu ya mabue,

²⁰ nutangile buloba ne budi ne bufunfule anyi budi busenguluke, mitangile ne mudi metu, anyi kaenamu. Nukoleshe mitshima yenu, nulue ne mamuma a mu buloba abu Hakayabo nunku, mamuma a nvinyo akabanga kulua.

²¹ Bakaya nunku, bakatentekela buloba ku tshihela tshia Sina tô ne ku Lehoba udi mu nshila wa ku Hamata.

²² Bakayila ku luseke lua sude, bakafua ku Hebelone, ne Ahimana ne Sheshai ne Talemai, bana ba Anaka bakadimu. (Bakasa Hebelone bidimu muanda mutekete ku mpala kua Soana mu Ejipitu.)

²³ Bakalua mu tshibanda tshia Eshekola, bakakosamu ditamba diakadi ne tshisumbu tshia mamuma a nvinyo, bakadituala ku mutshi babidi, balualua ne mamuma makuabo a grenade ne a nfigi.

²⁴ Muaba au wakidikibua ne, Tshibanda tshia Eshekola, bualu bua tshisumbu tshia mamuma tshiakakosamu Bena Isalele.

²⁵ Hakatentekelabo buloba nunku matuku makumi anai, bakahingana.

²⁶ Hakafikabo, bakalua kudi Mose ne kudi Alona ne kudi tshisumbu tshionso tshia Bena Isalele mu tshihela tshia Palana ku Kadesha, bakalua kudibo ne kudi tshisumbu tshionso ne dî diabo, bakabalesha mamuma a buloba abu.

²⁷ Bakamuambila ne, Tuakuya mu buloba buwakatutuma, bulelela, buloba abu budi bûle tente ne mabele ne buitshi, â mmamuma a buloba.

²⁸ Kadi bantu badi mu buloba abu badi bakole, misoko yabo idi ne mpangu ya mabue, ne idi minene be; ne bualu bukuabo, tuakamonamu bana ba Anaka.

²⁹ Bena Amaleka badi ku luseke lua ku Sude, Bena Hiti ne Bena Yebuse ne Bena Amole badi ku luseke lua ku mikuna, Bena Kanâna badi hehi ne mai manene ne kukala kua musulu wa Yadene.

³⁰ Kaleba wakakolesha bantu ku mesu kua Mose ne, Tuyai katataka, tunyenge buloba abu, tudi bamanye mua kuhita bena buloba abu bukole.

³¹ Kadi bantu bakaya nʼandi bakamba ne, Katuena bamanye mua baluangana ne bantu aba, bualu bua badi batutamba bukole.

³² Bakalua kudi Bena Isalele ne lumu lubi lua buloba buakatentekelabo, bakamba ne, Buloba abu butuakutentekela buta buadia bantu badi bikalamu, bantu bonso batuakamonamu badi bantu ba mibidi minene.

³³ Tuakamona bantu ba nfiondo, bana balume ba Anaka, hakalelabo kudi Nefilima hatuakaditangila, tuakadi bu mpasu, tuakadi nunku ku mesu kuabo kabidi.