Balombodi 3 - Mukanda wa Nzambi Dihungila Dikulukulu ne Dihungila Dihia-dihia 2003

Bisamba Biakashala bua Kuteta Bena Isalele

¹ Ebi mbisamba bia bantu biakashiya Yehowa biakateteye nʼabi Bena Isalele, bonso bakadi kabayi bamanye nvita ya Bena Kanâna;

² anu bua bikondo bikuabo bia Bena Isalele kumanyabi nvita, bungi buabo kabuakadi bumanye nvita diambedi;

³ â mmena abo: bakelenge batanu ba Bena Peleshete, ne Bena Kanâna bonso ne Bena Sidona, ne Bena Hiwi bakadi bashikama ku mukuna wa Lebanona, ku mukuna wa Bâla-hêmona tô ne ku mukalu wa Hamata.

⁴ Bakabashiya bua kutetabo nʼabo Bena Isalele, bua kumanya ne bobo nebatumikile mikenji ya Yehowa yakeleye batatuʼabo kudi Mose.

⁵ Bena Isalele bakashikama munkatshi mua Bena Kanâna ne Bena Hiti ne Bena Amole ne Bena Pelizi ne Bena Hiwi ne Bena Yebuse;

⁶ bakangata bana babo bakashi bu bakashi babo, ne bakafua bana babo bakashi kudi bana babo balume, bakakuatshila nzambi yabo mudimu.

Oteniele Udi Usungila Bena Isalele mu Bianza bia Kushana-lishatayima

⁷ Bena Isalele bakenza malu mabi ku mesu kua Yehowa, bakahua Yehowa, Nzambi wabo, muoyo, bakakuatshila Bâla ne Ashelota mudimu.

⁸ Nunku tshiji tshia Yehowa tshiakadi kudi Bena Isalele, yeye wakabahana mu bianza bia Kushana-lishatayima, mukelenge wa mu Mesopotamia; Bena Isalele bakakuatshila Kudihana-lishatayima mudimu bidimu muanda mukulu.

⁹ Kakadila Bena Isalele kudi Yehowa, Yehowa wakabisha Bena Isalele musunyi di, nguakabasungila, Oteniele mene, muana wa Kenaza, muakunyi wa Kaleba.

¹⁰ Nyuma wa Yehowa wakamutulukila, yeye wakalumbuluila Bena Isalele; yeye wakaya kuluangana nvita, ne Yehowa wakafila Kushana-lishatayima, mukelenge wa mu Mesopotamia, mu tshianza tshiandi; tshianza tshiandi tshiakahita Kushana-lishatayima bukole.

¹¹ Buloba buakadi talalâ bidimu makumi anai. Oteniele, muana wa Kenaza, wakafua.

Ehuda Udi Usungila Bena Isalele mu Bianza bia Bena Moaba

¹² Bena Isalele bakenza malu mabi ku mesu kua Yehowa tshiaku bidi; ne Yehowa wakakolesha Egelona, mukelenge wa Moaba, kudi Bena Isalele, bualu bua bobo bakenza malu mabi ku mesu kua Yehowa.

¹³ Yeye wakasangisha Bena Amona ne Bena Amaleka kudiye yeye wakaya, bakashiha Bena Isalele, bakanyenga musoko wakadi ne mabue a ngashi.

¹⁴ Bena Isalele bakakuatshila Egelona, mukelenge wa Moaba, mudimu bidimu dikumi ne muanda mukulu.

¹⁵ Kadi bakadila Bena Isalele kudi Yehowa, Yehowa wakababishila musungidi, Ehuda, muana wa Gela, Muena Benyamina, muena luboko; Bena Isalele bakafila milambu mu bianza biandi bua kuyeye nʼai kudi Egelona, mukelenge wa Moaba.

¹⁶ Ehuda wakatula muele wa nvita musakisha nseke ibidi, bule buau buakadi coudée umue; yeye wakaubuesha mu mukaba muinshi mua bilulu biandi ha lukundu lua ku tshianza tshia bukole.

¹⁷ Yeye wakafila milambu kudi Egelona, mukelenge wa Moaba: Egelona wakadi ne mafuta a bungi.

¹⁸ Hakashikisheye kufila milambu, yeye wakahingasha bambudi ba milambu kuabo.

¹⁹ Yeye wakamba kuya, kadi wakatangila ku muaba wakadibo basongela mpingu ya mabue wakadi mu Gilegala, wakamba ne, Mukelenge, ndi ne dî dia kukuambila mu musokoko. Yeye wakamba ne, Anji kuhuwa. Bantu bonso bakadi bimana nʼandi bakumuka.

²⁰ Ehuda wakabuela muakadiye; yeye wakadi mushikame nkayandi mu nsubu wakadi kulu mu muaba mialala. Ehuda wakamba ne, Ndi ne dî dia Nzambi dia kukuambila. Yeye wakabika mu nkuasa wandi.

²¹ Ehuda wakolola tshianza tshiandi tshia luboko, wakatula muele wakadi ha lukundu luandi lua ku tshianza tshia buhote; wakamu tua mu difu diandi;

²² tshilabi tshia muele tshiakajibikidibua, ne mafuta andi akajimisha muele, bualu bua yeye kahatula muele ku difu diandi, ne muele wakahatuka ha nyima handi.

²³ Hashishe Ehuda wakahatuka mu tubanda, wakamuinshidila bibi bia ku nsubu wa kulu, wakela nsahi.

²⁴ Hakaluhukeye, bena mudimu ba mukelenge bakatua, bakatangila, ne monai, bibi bia ku nsubu wa kulu biakadi bihanga; Bakambilangana ne, Bulelela, yeye udi ubuikila makasa andi mu nsubu wa kulu.

²⁵ Bakamuindila tô ne bakabatuala bundu; kadi monai, yeye kakunzulula bibi bia ku nsubu wa kulu; hashishe bakangata luvunguia, ne hakunzululabo bibi, monai, mukelenge wabo wakadi muhone hanshi mufue.

²⁶ Kadi Ehuda wakahatuka hakadibo bamuindila, wakahitshila muaba wakadibo basongela mpingu ya mabue, wakanyema tô ne ku Seila.

²⁷ Hakahinganeye, yeye wakela mpungi ku mikuna ya mu Efelayima: ne Bena Isalele bakahueka nʼandi bafume ku mikuna, yeye wakaya ku mpala kuabo.

²⁸ Yeye wakabambila ne, Nundonde; bualu bua Yehowa wakafila bena lukuna benu, Bena Moaba, mu bianza bienu. Bobo bakahueka bamulonde, bakanyenga malobo a mu Yadene akadi kudi Bena Moaba, kabakitabusha bua muntu umue asabukeku.

²⁹ Ku tshikondo atshi bakashiha balume ba Bena Moaba bu binunu dikumi; buonso buabo bakadi bakole ne ba dikima; nansha muntu umue wakahanduka.

³⁰ Nunku Bena Moaba bakateketa dituku adi ku tshianza tshia Bena Isalele; buloba buakadi talalâ bidimu makumi muanda mukulu.

Shamagâ Udi Usungila Bena Isalele mu Bianza bia Bena Peleshete

³¹ Shamagâ, muana mulume wa Anata, wakabika ku nyima kuandi, yeye wakashiha Bena Peleshete nkama isambombo ne mutshi wa kusaka nʼau ngombe; yeye wakasungila Bena Isalele kabidi.