Abakuke 1 - Mukanda wa Nzambi Dihungila Dikulukulu ne Dihungila Dihia-dihia 2003

Habakuka Udi Udila ne, Kulumbulula Kuakane Kakuenaku

¹ Dî dia Yehowa diakunvua muprofete Habakuka.

² Yehowa, nendile kûdi musangu bule bishi bua wewe unkuatshishe? Kuena ungunvuila, anyi? Ndi ndila kûdi bua tshimbambila tshidiku, ne wewe kuena utuhandisha.

³ Bualu kai udi ummueneshisha bienzedi bibi ne utangishisha mesu anyi ku dikengeshangana dia bantu? Kubutuka ne malu makole bidi ku mpala kuanyi; nvita ne kufuilangana bidi bijuka.

⁴ Bua malu â diyisha dia mikenji diakuteketa, ne kulumbulula kuakane kakuenaku. Bualu bua bantu babi badi basesuisha muntu muakane, nunku kulumbulula kua bilumbu kudi kunyanguka.

Bena Kasada Nebakengeshe Bena Yuda

⁵ Tangilai bienu munkatshi mua bisamba bia bantu. Monai, ne kemai bikole! Bualu bua ndi ngenza bualu mu matuku enu bunuakadi kanuyi mua kuitabusha bikalabo banuambilebu.

⁶ Monai, ndi mbisha Bena Kasada, tshisamba atshi tshia bantu badi ne luonji ne benji ba malu lukasa lukasa, badi bahitshila mu buloba bujima bua kunyengabo miaba ya kushikama idi kayiyi yabo.

⁷ Badi bazakasha mitshima ya bantu ne badi babakuatshisha buowa; dikosa diabo dia bilumbu ne kudibandisha kuabo bidi bifuma munda muabo nkayabo.

⁸ Tubalu tuabo tudi tuhita nyama ya nkashama lubilu, tudi ne luonji luhite lua bimungu bidi bimueneka bufuku; bena tubalu babo badi benda ne didisua; e, bena tubalu babo badi bafuma kule; badi baya lubilu bu mudi nyunyu wa mukanku wauka ha tshintu bua kutshidieye.

⁹ Buonso buabo badi balua bua kuenza tshimbambila; badi batangisha mesu abo ku mpala, badi basangisha bena lukanu bakuatshibue mu nvita bu nsenga ya mu mai.

¹⁰ Badi bahetula bakelenge, badi baseka bakokeshi. Badi baseka ngumbu yonso ya nvita; bualu bua badi bela mishiki ya buloba bua kubandilahu bua kuhita musoko bukole.

¹¹ Hashishe, badi bahita mu nshila bu luhehele, badi baya ku mpala benza malu mabi, badi bavuisha bukole buabo bu nzambi wabo mene.

Habakuka Udi Udila kudi Yehowa

¹² Yehowa Nzambi wanyi, wewe kuena wanyi Wa Tshijila kale tô ne mpindiu, anyi? Katuena tufua! Wewe Yehowa, wakumusungula bua kulumbuluisheye bantu; wewe Dibue, wakumujadika bua kukengesheye bantu.

¹³ Wewe udi ne mesu mahite buakane adi kâyi mua kutangila malu mabi, ne kuena mua kutangila bienzedi biabo bibi tshianana. Nunku bualu kai udi utangila bantu aba hadi benza malu mabi abo a bunsonge, ne udi uhuwa talalâ halua muntu mubi kumina mukuabo udi umuhita buakane?

¹⁴ Wewe udi uvuisha bantu bu minyinyi ya mu mai manene, bu bintu bidi bidikoka hanshi, bidi kabiyi ne mukokeshi ha mutu habi.

¹⁵ Yeye udi ukuata buonso buabo ne ndobo; udi ubakoka munda mua kahamba kandi bua kuya nʼabo, udi ubasangisha mu bukuondo buandi; nunku udi usanka ne udi utumba.

¹⁶ Bua malu â yeye udi ushihela kahamba kandi milambu, udi woshila bukuondo buandi musenga wa manananshi; bualu bua luseke luandi lua bintu ludi luvulangana ne bia kudia biandi bidi bikumbane bia bungi.

¹⁷ Yeye neananukile kuhumuna kahamba kandi tshiendelele ne kena ulekela kushiha ba mu bisamba bia bantu, anyi?