2 Samuele 9 - Mukanda wa Nzambi Dihungila Dikulukulu ne Dihungila Dihia-dihia 2003

Davidi Udi Ufuila Mefibosheta Luse

¹ Davidi wakakonka ne, Muntu mukuabo wa mu nsubu wa Shaula udi mushaleku bua meme kumufuila luse bualu bua Yonatana, anyi?

² Muhika mukuabo wa mu nsubu wa Shaula wakadiku, dina diandi Siba; bakamubikila kudi Davidi; mukelenge wakamuebesha ne, Wewe udi Siba, anyi? Yeye wakamukudimuna ne, Muntu webe nyeye.

³ Mukelenge wakamukonka ne, Kakuena muntu mukuabo udi mushale mu nsubu wa Shaula bua meme kumufuila luse lua Nzambi, anyi? Siba wakambila mukelenge ne. Muana mukuabo wa Yonatana udi mushale, yeye udi mulema.

⁴ Mukelenge wakamuebesha ne, Yeye udi kudi kunyi? Siba wakambila mukelenge ne, Mona, yeye udi mu nsubu wa Maki, muana wa Amiele, mu Lo-debâ.

⁵ Hashishe mukelenge Davidi wakatuma bantu bakamûmusha mu nsubu wa Makî, muana wa Amiele, wa mu Lo-debâ.

⁶ Mefibosheta, muana wa Yonatana, muana wa Shaula, wakalua kudi Davidi, wakatua mpala wandi hanshi, wakamukukuila. Davidi wakamba ne, Mefibosheta. Yeye wakamukudimuna dî ne, Tangila, muntu webe!

⁷ Davidi wakamuambila ne, Kutshinyi; bulelela, nenkufuile luse bualu bua Yonatana, tatu webe; nenkuhingishile buloba buonso bua Shaula, kaku webe; wewe neudie bidia ku mesa anyi matuku onso.

⁸ Yeye wakamukukuila. Yeye wakakonka ne, Muntu webe udi bu nganyi bua wewe udi utangila mbua mufue bu meme?

⁹ Hashishe Davidi wakabikila Siba, muhika wa Shaula, wakamuambila ne, Nakafila bintu bionso, biakadi kudi Shaula ne kudi ba mu nsubu wandi bonso, kudi muana wa mukelenge webe.

¹⁰ Wewe ne bana bebe balume ne bena mudimu bebe bonso nenumudimine budimi buandi; bûdi nʼabu mbua kulua ne bintu biudi uhuola, bua muana wa mukelenge webe ikale ne bia kudia; kadi Mefibosheta, muana wa mukelenge webe, neadie bidia ku mesa anyi tshiendelele. Siba wakadi ne bana ba balume dikumi ne batanu ne bahika makumi abidi.

¹¹ Hashishe Siba wakambila mukelenge ne, Muntu webe nênze malu onso akamuambila mukelenge wandi. Kadi Mefibosheta, bu muakuamba mukelenge, yeye neadie bidia ku mesa anyi bu umue wa bana ba mukelenge.

¹² Mefibosheta wakadi ne muana wa balume, nsongalume, dina diandi Mika. Bantu bonso bakadi mu nsubu wa Siba bakadi bahika ba Mefibosheta.

¹³ Nunku Mefibosheta wakashikama mu Yelushalema; wakadia bidia ku mesa a mukelenge matuku onso: yeye wakadi mulema.