2 Samuele 4 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bashiha Ishi-boshete

¹ Kakunyua Ishi-boshete, muana wa Shaula, ne, Abinê wakafua mu Hebelone, maboko andi akateketa ne Bena Isalele bonso bakadi ne lutatu.

² Ishi-boshete, muana wa Shaula, wakadi ne bantu bahidi bakadi tupitene tua masalayi andi; dina dia mukuabo diakadi Bana, ne dina dia mukuabo Lekaba, bana balume ba Limona, Muena Bêlota, wa mu tshisamba tshia Benyamina (bualu bua Bêlota udi wa tshisamba tshia Benyamina;

³ diambedi Bena Belota bakanyemena mu Gitayima, bakashikamamu kale tô ne katataka).

⁴ Yonatana, muana wa Shaula, wakadi ne muana mulume, wakadi mulema. Yeye wakadi ne bidimu bitanu hakunvuabo lumu lua Shaula ne Yonatana ku Yizelele; mulami wandi wakamuambula ku lubese, wakanyema; hakadiye unyema nunku, muana wakadishinda, nunku wakalua mulema. Dina diandi diakadi Mefibosheta.

⁵ Bana balume ba Limona, Muena Bêlota, Lekaba ne Bana, bakalua ku nsubu wa Ishi-boshete munda munya, hakadiye mulale tulu.

⁶ Bakabuela munda mua nsubu bu bantu bakadi bangata blé; bakamutua muele muinshi mua mbale; Lekaba ne muakunyʼandi Bana bakanyema.

⁷ Hakabuelabo mu nsubu, yeye wakadi mulale tulu ha bulalu buandi mu nsubu wandi wa bulalu; bobo bakamutua muele, bakamushiha, bakamukosa mutu, bakaya nʼau; bakenda tô butuku bujima mu nshila wa ku Alabâ.

⁸ Bakalua ne mutu wa Ishi-boshete kudi Davidi mu Hebelone, bakambila mukelenge ne, Tangila, mutu wa Ishi-boshete, muana wa Shaula, muena lukuna webe wakakeba muoyo webe; Yehowa wakasombuela mukelenge wetu lelu bua Shaula ne bana bandi.

⁹ Davidi wakambila Lekaba ne muakunyʼandi Bâna, bana balume ba Limona, Muena Bêlota ne, Bu mudi Yehowa ne muoyo, wakusungila muoyo wanyi mu makenga onso,

¹⁰ hakalua muntu kundi, wamba ne, Shaula udi mufue wela meji munda muandi ne, Nakalua ne lumu luimpe, hashishe nakamukuata, nakamushiha mu Sikelaga bu difutu dia lumu luakalueye nʼalu.

¹¹ Nunku halua bantu babi kundi bakashiha muntu muakane mulale mu nsubu muandi ha bulalu, bualu kabuena butambe kunkuata bua kusombuela mashi andi adi ha bianza bienu bua kunûmusha ha buloba, anyi?

¹² Davidi wakela bansongalume bandi dî, bakabashiha, bakabakosa bianza biabo ne makasa abo, bakabisuika hehi ne dishiba dia mu Hebelone. Kadi bakambula mutu wa Ishi-boshete, bakaujika mu lukita lua Abinê mu Hebelone.