2 Samuele 3 - Mukanda wa Nzambi Dihungila Dikulukulu ne Dihungila Dihia-dihia 2003

¹ Nvita yakadi hankatshi ha ba bu nsubu wa Shaula ne ba mu nsubu wa Davidi musangu mule; Davidi wakakohola, ne ba mu nsubu wa Shaula bakateketateketa.

Bana ba Davidi Baledibue ku Hebelone

² Davidi wakalela bana ba balume mu Hebelone: muanʼa bute wandi wakadi Amenona, muana wa Abinoama, Muena Yizelele;

³ muana wandi muibidi wakadi Kileaba, muana wa Abigayila wakadi mukashi wa Nabala, Muena Kâmele; muisatu wakadi Abashaloma, muana wa Mâka, muana mukashi wa Talemai, mukelenge wa mu Geshû;

⁴ muinai wakadi Adoniya, muana mulume wa Hagita; muitanu wakadi Shefataya, muana wa Abitala;

⁵ muisambombo wakadi Yitelama, muana wa Egala, mukashi wa Davidi. Aba mbana bakalela Davidi mu Hebelone.

Abinê Udi Utombokela Ishi-boshete

⁶ Hakadi ba mu nsubu wa Shaula ne ba mu nsubu wa Davidi baluangana nvita, Abinê wakadikolesha mu nsubu wa Shaula.

⁷ Diambedi Shaula wakadi ne mukashi mukuabo, dina diandi Lizepa, muana wa Aya; Ishi-boshete wakebesha Abinê ne, Bualu kai wewe wakalala ne mukashi wa tatu wanyi?

⁸ Hashishe Abinê wakadi ne tshiji tshikole bua mei akamuambila Ishi-boshete; yeye wakamukonka ne, Meme ndi bu mutu wa mbua wa Muena Yuda, anyi? Tô ne ku dituku edi Bakafuila ba mu nsubu wa Shaula, tatuʼebe, ne bana benu ne balunda bandi luse, tshiakakufila wewe mu bianza bia Davidi; kadi wewe wakunkanda bualu bubi ne mukashi eu lelu.

⁹ Nzambi atambe kuela Abinê mulau binahanga kuenzela Davidi malu onso akamulaya Yehowa;

¹⁰ bua kunyenga bukelenge mu nsubu wa Shaula ne bua kujadika nkuasa wa butumbi wa Davidi ku mutu kua Bena Isalele ne Bena Yuda ku Dana tô ne ku Bê-sheba.

¹¹ Yeye kakamanya mua kukudimuna Abinê dî dikuabo, bualu bua yeye wakamutshina.

¹² Abinê wakatumina Davidi ba-messager, bakamukonka ne, Buloba ebu mbua nganyi? Bakamuambila kabidi ne, Uhunge nʼanyi tshihungidi ne mona, tshianza tshianyi netshikale kûdi bua kulua ne Bena Isalele bonso kûdi.

¹³ Davidi wakamba ne, Mbimpe, netuhunge nʼebe tshihungidi, kadi bualu bumue bûdi ne bua kuenza budi nunku: kuena mua kutangila mpala wanyi diambedi kuyi muanze kulua ne Mikala, muana mukashi wa Shaula; hashishe neumanye mua kuntangila.

¹⁴ Davidi wakatumina Ishi-boshete, muana wa Shaula, ba-messager, bakamuambila ne, Untumine mukashi wanyi Mikala unakafidila tukoba tua Bena Peleshete lukama bualu buandi.

¹⁵ Ishi-boshete wakatuma bantu, bakamunyenga kudi bayandi, Palatiele mene, muana mulume wa Layisha.

¹⁶ Bayandi wakaya nʼandi, wenda udila; wakamulonda tô ne ku Bahulima. Hashishe Abinê wakamuambila ne, Ya, alukila; nunku yeye wakalukila.

¹⁷ Abinê wakayikila ne bakulu ba mu Isalele, wakabambila ne, Mu matuku akashala ku nyima nuenu nuakasua Davidi bua kuikaleye mukelenge ku mutu kuenu.

¹⁸ Katataka nushikishe bualu ebu: bualu bua Yehowa wakamba bua Davidi ne, Nensungile bantu banyi Bena Isalele mu bianza bia Bena Peleshete ne mu bianza bia bantu bonso badi nʼabo lukuna ku tshianza tshia muntu wanyi Davidi.

¹⁹ Abinê wakamba mei â kabidi mu matshu a Bena Benyamina; Abinê wakaya ku Hebelone bua kuambileye Davidi mu matshu andi mei mimpe onso akamba Bena Isalele ne bonso ba mu nsubu wa Benyamina.

²⁰ Nunku Abinê Wakafika kudi Davidi mu Hebelone ne bantu makumi abidi bakadi nʼandi. Davidi wakalambishila Abinê ne bantu bakadi nʼandi bidia bia disanka.

²¹ Abinê wakambila Davidi ne, Nenjuke, nenye bianyi, nensangishe Bena Isalele bonso kudi mukelenge wanyi, bua bobo bahunge nʼandi tshihungidi, bua yeye akokeshe bantu bonso badiye musue mu mutshima wandi. Davidi wakatuma Abinê; wakaya biandi talalâ.

Yoaba Udi Ushiha Abinê

²² Monai, bantu ba Davidi ne Yoaba bakahingana mu kuhaula kua bintu, bakalua ne bintu bia bungi; kadi Abinê kakadi ne Davidi mu Hebelone, bualu bua yeye wakamana kumutuma, wakaya biandi talalâ.

²³ Hakahingana Yoaba ne bantu bonso bakadi nʼandi, bakambila Yoaba ne, Abinê, muana wa Nê, wakalua kudi mukelenge ne yeye wakamutuma, wakaya biandi talalâ.

²⁴ Hashishe Yoaba wakalua kudi mukelenge, wakamuebesha ne, Wewe Wakenza tshinyi? Mona, Abinê wakalua kûdi; wewe wakamutuma ne yeye wakamana kuya bua tshinyi?

²⁵ Wewe udi mumanye ne Abinê, muana wa Nê, wakalua kûdi anu bua kukushima ne bua kumanyeye kûdi uya ne kûdi ufuma ne bua kumanyeye malu onso audi wenza.

²⁶ Hakaluhuka Yoaba ku mesu kua Davidi, yeye wakatuma bantu ku nyima kua Abinê, banahingana nʼandi ku dina dia mai dia mu Sila; kadi Davidi kakadi mumanye bualu ebu.

²⁷ Hakahingana Abinê ku Hebelone, Yoaba wakaya nʼandi ku tshibi tshia musoko ha nkayandi bua kuyikileye nʼandi talalâ; wakamutua muele muinshi mua mbale yandi bualu bua lukuna lua mashi a Asahele, muakunyʼandi; yeye wakafua.

²⁸ Hakunyua Davidi lumu elu, yeye wakamba ne, Meme ne bantu bonso ba mu bukelenge buanyi tuakubingishibua ku mesu a Yehowa tshiendelele bua mashi a Abinê, muana wa Nê:

²⁹ mashi andi ikale ha mutu ha Yoaba ne bonso ba mu nsubu wa tatu wandi; ne ba mu nsubu wa Yoaba bikale ne munda mashi, bikale bena nsudi anyi bendedi ba ku mitshi batebuke, bafue ku miele ya nvita, kabikadi ne bia kudia!

³⁰ Nunku Yoaba ne muakunyʼandi Abishai bakashiha Abinê bualu bua yeye wakashiha muanʼabo Asahele mu nvita ya mu Gibeona.

³¹ Davidi wakambila Yoaba ne bantu bonso bakadi nʼandi ne, Nulonde bilulu bienu, nuangate bilulu bikayabala, nudivuadikabi, nujinge Abinê. Mukelenge Davidi wakalonda tshituadilu tshia tshitalu tshiandi.

³² Bakajika Abinê mu Hebelone; mukelenge wakabandisha di diandi, wakadila muadi ku lukita lua Abinê; ne bantu bonso bakadila.

³³ Mukelenge wakajinga Abinê, wakamba ne, Abinê wakadi ne bua kufua bu mudi muhote mua kufua, anyi?

³⁴ Bianza biebe kabiakadi bisuikibue, ne makasa ebe kakadi mabueshibue mu nkanu; bu mudi muntu mushihibue ku mpala kua bena lukinu, wewe wakadishinda hanshi. Bantu bonso bakamudila kabidi.

³⁵ Hashishe bantu bonso bakalua kudi Davidi bua adie biandi, diba ditshidi mulu; kadi Davidi wakaditshiha ne, Nzambi atambe kungela mulau binalabula bidia anyi bintu bikuabo diambedi diba kadiyi dianze kubuela.

³⁶ Bantu bonso bakatangila bualu ebu, bakasanka; malu onso akenza mukelenge akasankisha bantu bonso.

³⁷ Nunku bantu bandi bonso ne Bena Isalele bonso bakajingulula dituku adi ne, Mukelenge kakadi ne bualu bua kushiheye Abinê, muana wa Nê.

³⁸ Mukelenge wakakonka bantu bandi ne, Kanuena bamanye ne muenyampala ne muntu munene wakashihibua mu Isalele lelu, anyi?

³⁹ Ndi mukelenge muedibue manyi ha mutu kadi bualu ebu budi buntekesha lelu; bantu aba, bana ba Seluya, badi bampite bukole; Yehowa afute muenji wa malu mabi bu mudi bubi buandi.