2 Samuele 23 - Mukanda wa Nzambi Dihungila Dikulukulu ne Dihungila Dihia-dihia 2003

Mei a Kunshikidilu a Davidi

¹ Â adi mei a kunshikidilu a Davidi: Davidi, muana wa Yishai, nyeye muntu wakabandishibua, wakedibua manyi ha mutu kudi Nzambi wa Yakoba, muimbi wa misambu mimpe wa mu Isalele, udi wamba ne,

² Nyuma wa Yehowa wakungakuila, dî diandi diakadi ha ludimi luanyi.

³ Nzambi wa Isalele wakamba, dibue dia Isalele diakangambila ne, Udi ukokesha bantu ne buimpe, udi ukokesha mu ditshina dia Nzambi,

⁴ neikale bu munya wa misasa habanda diba, mbu dinda didi kadiyi ne matutu kulu, hamena mashinde a lutende ha buloba, hakenka diba hakumuka nvula.

⁵ Bulelela, nsubu wanyi kena nunku ku mesu kua Nzambi, kadi yeye wakahunga nʼanyi tshihungidi tshia tshiendelele, tshilongolodibue mu malu onso, ne tshijadikibue, bualu bua tshidi luhandu luanyi luoso ne disua dianyi dionso, yeye kena ubidiundisha, anyi?

⁶ Kadi bantu babi bonso nebikale bu meba adibo bimasha, bualu bua kabena bamanye mua kuakuata ne tshianza.

⁷ Kadi muntu udi walenga, udi ne bua kuluata biamu ne difuma, bobo neboshibue ne kahia mu muaba wabo.

Bena Bukitu ba Davidi

⁸ Â adi mena a bena nvita ba bukitu bakadi nʼabo Davidi: Yoshebashebeta, Muena Takemona, wakadi ku mutu kua tupitene tuonso; dina diandi dikuabo Adino, Muena Esene, wakela bantu nkama muanda mukulu difuma diandi, wakabashiha tshikondo tshimue.

⁹ Eleazâ, muana wa Dodai, Muena Ahoa, wakamulonda, umue wa bena bukitu basatu bakadi nʼabo Davidi, hakafuna Bena Peleshete bulobo bakadi badisangisha bua kuluangana nvita, hakumuka Bena Isalele;

¹⁰ yeye wakajuka, wakashiha Bena Peleshete tô ne bakateketa diboko diandi, ne tshianza tshiandi tshiakala mata tshilabi tshia muele wandi wa nvita: Yehowa wakabayuisha luhandu lunene dituku adi; bantu bakalonda ku nyima kuandi anu bua kuhaula bintu.

¹¹ Shama, muana wa Age, Muena Halala, wakamulonda. Bena Peleshete bakadisangisha mu tshisumbu mu budimi bua nkunde; bantu bakanyema Bena Peleshete.

¹² Kadi yeye wakimana munkatshi mua budimi, wakabusungila, wakashiha Bena Peleshete; Yehowa wakabayuisha luhandu lunene.

¹³ Bantu basatu bakuabo ba munkatshi mua bena bukitu makumi asatu bakaya kudi Davidi hakadiye mu lubuebue lua Adulama mu tshikondo tshia kunowa; Bena Peleshete bakasa tshitudilu tshiabo mu tshibanda tshia Lefayima.

¹⁴ Ku tshikondo atshi Davidi wakadi mu musoko wa lumbu, ne masalayi Bena Peleshete akadi mu Beteleheme.

¹⁵ Mutshima wa Davidi wakamusamina bua mai a kunua; wakamba ne, Bampeku mai a kunua a dî mu dina dia mu Beteleheme, didi ha buihi ne tshibi!

¹⁶ Bena bukitu basatu bakahita munkatshi mua ma salayi a Bena Peleshete, bakasuna mai mu dina dia mu Beteleheme diakadi ha buihi ne tshibi, bakalua nʼau kudi Davidi. Yeye wakabenga bua kunueye mai a, kadi wakâhongolola ku mesu kua Yehowa.

¹⁷ Yeye wakamba ne, Yehowa, bualu ebu kabuikadi kundi, bua meme kuenza nunku: ndi mua kunua mashi a bantu bakamba kujimisha mioyo yabo, anyi? Nunku yeye wakabenga kuanua, A mmalu akenza bena bukitu basatu.

¹⁸ Abishai, muanʼabo ne Yoaba muana wa Seluya, wakadi ku mutu kua bantu basatu. Yeye wakela bantu nkama isatu difuma diandi, wakabashiha; nunku wakadi ne dina dinene munkatshi mua aba basatu,

¹⁹ Yeye kakadi ne dina dia butumbi munkatshi mua aba makumi asatu, anyi? Nunku bakamusungula kapitene kabo; kadi yeye kakadi wa mu mulongo wa basatu ba ku mpala.

²⁰ Benaya, muana wa Yehoyada, muana wa muena bukitu wa mu Kabesele, Wakenza biandi malu manene, wakashiha bana balume babidi ba Aliele wa mu Moaba. Yeye wakahueka kabidi, wakashiha nyama wa ntambue mu lubuebue mu tshikondo tshia neige.

²¹ Yeye wakashiha Muena Ejipitu, wakadi muena bukitu; Muena Ejipitu wakadi ne difuma mu tshianza tshiandi; kadi Benaya wakaya kudiye ne mulangala, wakanyenga difuma dia Muena Ejipitu mu tshianza tshiandi, wakamushiha ne difuma diandi mene.

²² A mmalu akenza Benaya, muana wa Yehoyada, ne wakadi ne dina dinene munkatshi mua bantu basatu ba bukitu.

²³ Yeye wakahita bantu aba makumi asatu butumbi, kadi yeye kakadi wa mu mulongo wa basatu ba ku mpala. Davidi wakamuteka ku mutu kua balami bandi.

²⁴ Asahele, muanʼabo ne Yoaba, wakadi wa bantu aba makumi asatu; ne Elehanana, muana wa Dodo, wa mu Beteleheme,

²⁵ Shama, Muena Haloda, ne Elika, Muena Haloda,

²⁶ Helese, Muena Palati, ne Ila, muana wa Ikeshe, Muena Tekoa,

²⁷ Abiesê, Muena Anatota, ne Mebunai, Muena Husha,

²⁸ Salemona, Muena Ahoa, ne Mahalai, Muena Netofa,

²⁹ Helebe, muana wa Bana, Muena Nefota, ne Itai, muana wa Libai wa mu Gibea wa Bena Benyamina,

³⁰ Benaya, Muena Pilatona, ne Hidai wakafuma ku tusulu tua mu Gâsha,

³¹ Abi-alabona, Muena Âba, ne Asemaweta, Muena Bâhuma,

³² Eliaba, Muena Shâlebona, bana ba Yashena, Yonatana,

³³ Shama, Muena Halala, ne Ahiyama, muana wa Shala, Muena Alala,

³⁴ Elifelete, muana wa Ahasabai, muana wa Mâka, ne Eliyama, muana wa Ahitofele, Muena Gilona,

³⁵ ne Heselo Muena Kâmele, ne Pâlai, Muena Âba,

³⁶ Igala, muana wa Natana wa mu Soba, ne Bani, Muena Gada,

³⁷ ne Seleke, Muena Amona, ne Nahalai, Muena Bêlota, batuadi ba ngabu wa Yoaba, muana wa Seluya,

³⁸ ne Ha, Muena Yitela, ne Galeba, Muena Yitela,

³⁹ ne Uliya, Muena Hiti: buonso buabo bakadi bantu makumi asatu ne muanda mutekete.