2 Samuele 21 - Mukanda wa Nzambi Dihungila Dikulukulu ne Dihungila Dihia-dihia 2003

Badi Basombuela Bena Gibeona

¹ Tshiole tshiakadi ku buloba mu matuku a Davidi bidimu bisatu bilondangane; Davidi wakebesha Yehowa bualu ebu. Yehowa wakamba ne, Bualu ebu buakalua bua Shaula ne bua mashi akamatshishabo mu nsubu wandi, bualu bua wakashiha Bena Gibeona.

² Mukelenge wakabikila Bena Gibeona, wakayikila nʼabo. Bena Gibeona kabakadi ba mu bisamba bia Bena Isalele mene, bakadi ba mu tshisamba tshia Bena Amole; diambedi Bena Isalele bakahunga nʼabo tshihungidi, kadi Shaula wakakeba kubashiha bua lukunukunu biakadiye nʼalu kudi Bena Isalele ne Bena Yuda.

³ Davidi wakakonka Bena Gibeona ne, Nennuenzele tshinyi? Nendengeshe nʼenu ne tshinyi bua nuenu nuvudishile buhianyi bua Yehowa disanka?

⁴ Bena Gibeona bakamuambila ne, Ebu kambualu bua argent anyi or hankatshi hetu ne Shaula ne ba mu nsubu wandi; ne kambualu bua tuetu tushiheshe muntu wa Bena Isalele. Yeye wakamba ne, Tshinudi nuamba, nennuenzeletshi.

⁵ Bakambila mukelenge ne, Muntu wakatushiha, wakabelela tshifufu bua kutûmusha munkatshi mua Bena Isalele,

⁶ bimpe ufile bana bandi muanda mutekete mu bianza bietu, tuetu netubowe ku mesu kua Yehowa mu Gibea wa Shaula wakadi musungula kudi Yehowa. Mukelenge wakamba ne, Nembafile.

⁷ Kadi mukelenge wakasungila Mefibosheta, muana wa Yonatana, muana wa Shaula, bualu bua kuditshiha kuakaditshiheye nʼaku kudi Yehowa bualu buabo, kuakadi hankatshi ha Davidi ne Yonatana, muana wa Shaula.

⁸ Kadi mukelenge wakangata bana balume babidi ba Lisepa, muana mukashi wa Aya, bakaleleleye Shaula, mena abo Amoni ne Mefibosheta; ne bana balume batanu ba Melaba, muana mukashi wa Shaula, bakaleleleye Adaliele, muana wa Bâsilai, Muena Meholata;

⁹ wakabafila mu bianza bia Bena Gibeona, bakabowela ku mukuna ku mesu kua Yehowa; bakahona hanshi buonso buabo muanda mutekete; bakabashiha mu matuku a kunowa, mu matuku a tshibangidilu tshia kunowa kua orge.

¹⁰ Lisepa, muana mukashi wa Aya, wakangata tshilulu tshikayabala, wakatshibikila ha mutu ha dibue ku tshibangidilu tshia kunowa tô ne hakabalokela nvula ya mu diulu; yeye kakitabusha bua nyunyu yikilehu mu munya, anyi bua nyama ya mu tshisuku isemene ha buihi butuku.

¹¹ Bakambila Davidi bualu buakenza Lisepa, muana mukashi wa Aya, umue wa mu bakashi bahika babakibue kudi Shaula.

¹² Davidi wakaya, wakangata mifuba ya Shaula ne ya Yonatana muanʼandi kudi Bena Yabesha-gilada, bakayiba mu misesu ya Bete-shana kuakabowa Bena Peleshete ku dituku diakashiha Bena Peleshete Shaula mu Gileboa.

¹³ Wakasaku ne mifuba ya Shaula ne ya Yonatana muanʼandi mulume; bakayisangisha ne mifuba ya bantu bakowabo.

¹⁴ Bakajika mifuba ya Shaula ne ya Yonatana muanʼandi mu lukita lua Kishi, tatu wandi, mu Sela mu buloba bua Benyamina. Bakenza malu onso akabambila mukelenge. Ku nyima kua bualu ebu Nzambi wakasengeledibua bualu bua buloba.

Abishai Udi Usungila Davidi mu Bianza bia Muntu wa Nfiondo

¹⁵ Bena Peleshete bakaluangana ne Bena Isalele kabidi; Davidi wakahueka ne bantu bandi bakadi nʼandi, bakaluangana ne Bena Peleshete; Davidi wakahungila.

¹⁶ Yishebi-benoba, wakadi wa bana ba bantu bale ba nfiondo, bujitu bua difuma diandi buakadi bua nshekele ya tshiamu tshia mitaku nkama isatu; wakadi mubueshe muele wa nvita muhia-muhia ku mukaba, wakela meji bua kushiha Davidi.

¹⁷ Kadi Abishai, muana wa Seluya, wakanusungila, wakataha Muena Peleshete, wakamushiha. Hashishe bantu ba Davidi bakaditshiha kudiye ne, Wewe kuyi nʼetu mu nvita kabidi bua wewe kujimishi muinda wa Isalele.

Bena Nfiondo Badi Bashihibua kudi Bena Davidi

¹⁸ Ku nyima kua bualu ebu bakaluangana ne Bena Peleshete mu Gobo; Sibekai, Muena Husha, wakashiha Safa, wakadi wa bana ba bantu bale ba nfiondo.

¹⁹ Bakaluangana ne Bena Peleshete ku Gobo kabidi; Elehanana, muana wa Yâle-olezima, Muena Beteleheme, wakashiha muanʼabo ne Goleyata, Muena Giti; mutondo wa difuma diandi wakadi bu mbungu wa madiba.

²⁰ Bakaluangana ku Gata kabidi; muntu munene wa nfiondo wakadiku, wakadi ne minu ya nonu isambombo ku tshianza ne tshianza ne bana ba nkasa basambombo ku dikasa ne dikasa, kusangisha makumi abidi ne inai; yeye kahidi wakadi muledibue kudi bantu bale ba nfiondo.

²¹ Hakahendeye Bena Isalele, Yonatana, muana wa Shimei, muanʼabo ne Davidi, wa kamushiha.

²² Aba banai bakaledibua mu Gata kudi bantu bale ba nfiondo, bakashihibua ku bianza bia Davidi ne bia bantu bandi.