2 Samuele 2 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bavuisha Davidi Mukelenge wa Yuda

¹ Ku nyima kua bualu ebu Davidi wakebesha Yehowa ne, Nenye ku umue wa misoko ya Bena Yuda, anyi? Yehowa wakamuambila ne, Ya biebe. Davidi wakamuebesha ne, Nenye ku musoko kai? Wakamuambila ne, Ku Hebelone.

² Davidi wakayaku ne bakashi bandi babidi, Ahinoama, Muena Yizelele, ne Abigayila, wakadi mukashi wa Nabala, Muena Kâmele.

³ Davidi wakaya ne bantu bonso bakadi nʼandi, muntu ne bantu bonso ba mu nsubu wandi, muntu ne bantu bonso ba mu nsubu wandi; bakashikama mu misoko ya Hebelone.

⁴ Bena Yuda bakadisangishaku, bakela Davidi manyi ha mutu bua kumuteka mukelenge wa Bena Yuda. Bakambila Davidi ne, Bena Yabesha-gilada bakajika Shaula.

⁵ Davidi wakatuma miloho yandi kudi Bena Yabesha-gilada, yakabambila ne, Nuenu nusankishibue kudi Yehowa, bualu bua nuenu nuakalesha mukelenge wenu Shaula malu a kalolo, nuakamujika.

⁶ Yehowa anuleshe luse lujalame ne bulelela; meme kabidi nennufute bua kalolo kenu, bualu bua nuenu nuakenza bualu ebu.

⁷ Nunku nukoleshe maboko enu, nuikale bena dikima; bualu bua Shaula, mukelenge wenu udi mufue, kadi Bena Yuda bakangela manyi bua meme ngikale mukelenge ku mutu kuabo.

Davidi Udi Uluangana ne Masalayi a Shaula

⁸ Abinê, muana wa Nê, kapitene ka masalayi a Shaula, wakamana kuangata Ishi-boshete, muana wa Shaula, wakalua nʼandi ku Mahanayima;

⁹ wakamuteka mukelenge ku mutu kua Bena Gilada ne Bena Ashehû ne Bena Yizelele ne Bena Efelayima ne Bena Benyamina ne ku mutu kua Bena Isalele bonso.

¹⁰ (Ishi-boshete, muana wa Shaula, wakadi ne bidimu makumi anai hakabangeye kukokesha Bena Isalele, wakabakokesha bidimu bibidi.) Kadi Bena Yuda bakalamata Davidi.

¹¹ Bungi bua bidimu biakakokesha Davidi Bena Yuda mu Hebelone buakadi bidimu muanda mutekete ne ngondo isambombo.

¹² Abinê, muana wa Nê, ne bantu ba Ishi-boshete, muana wa Shaula, bakumuka mu Mahanayima, bakaya ku Gibeona.

¹³ Yoaba, muana wa Seluya, ne bantu bakuabo ba Davidi bakaluhuka, bakasambakena nʼabo hehi ne dishiha dia mu Gibeona; bakashikama hanshi, bakuabo ku muelelu umue wa dishiha, bakuabo ku muelelu mukuabo wa dishiha.

¹⁴ Abinê wakambila Yoaba ne, Bansongalume babike, banaye ku mpala kuetu. Yoaba wakamba ne, Babike.

¹⁵ Hashishe bakabika, bakadisangisha. Bena Benyamina dikunu ne babidi ne ba Ishi-boshete ne bantu ba Davidi dikumi ne babidi.

¹⁶ Bakelangana tuima ku mitu, bakaluangana miele mu mbale; bakadishinda hanshi hohamue; nunku badi babikila muaba au ne, Helekatahasulima, udi mu Gibeona.

¹⁷ Bakaluangana nvita bikole dituku adi; bantu ba Davidi bakahita Abinê ne Bena Isalele bukole.

¹⁸ Bana balume basatu ba Seluya bakadiku, mena abo Yoaba ne Abishai ne Asahele: Asahele wakadi ne makasa mahehele bu ngulungu.

¹⁹ Asahele wakalonda ku nyima kua Abinê; hakadiye ulonda Abinê, yeye kakasesuka ku tshianza tshia balume anyi ku tshianza tshia bakashi.

²⁰ Hashishe Abinê wakatshunguluka, wakamukonka ne, Nguewe Asahele, anyi? Wakamukudimuna ne, Mmeme.

²¹ Abinê wakamuambila ne, Usesuke nansha ku tshianza tshia balume nansha ku tshianza tshia bakashi, ukuate umue wa bansongalume banyi, umunyenge bintu biandi bia nvita. Kadi Asahele wakahidia kusesuka, wakadi anu umulonda.

²² Abinê wakambila Asahele tshiakabidi ne, Usesuke, lekela kundonda; bundi nʼabu mbua kukushiha, anyi? Bingenza nunku, ndi mua kumonangana ne mukuluʼebe Yoaba mpala ne mpala bishi?

²³ Kadi yeye wakahidia kusesuka; hashishe Abinê wakamutua muinshi mua mbale ne mutondo wa difuma, wakamusompoka kabidi; nunku yeye wakadishinda hanshi, wakafua ha muaba au; hakalua bantu ha muaba wakadishindila Asahele mufue, bakimanaku.

²⁴ Kadi Yoaba ne Abishai bakalonda Abinê ku nyima; hakafikabo ku mukuna wa Ama udi ku mpala kua Gia mu nshila wa ku tshihela tshia Gibeona, diba diakabuela.

²⁵ Bena Benyamina bakadisangisha kudi Abinê, bakatua tshisumbu tshimue, bakimana ha mutu ha mukuna.

²⁶ Hashishe Abinê wakebesha Yoaba ne, Muele wa nvita neushihe bantu tshiendelele, anyi? Kuena mumanye ne kunfudilu kua bualu ebu nekuikale anu ne kanyinganyinga? Nunku wewe neubidie kukanda bantu bua kulondabo bana babo musangu bule munyi?

²⁷ Yoaba wakamuambila ne, Bu mudi Nzambi ne muoyo, bu wewe kuyi nulambe nunku, bulelela, bantu kabakadi kualukila hatshiabu, kabakadi kulekela kulonda bana babo.

²⁸ Nunku Yoaba wakela mpungi ne bantu bonso bakimana talalâ, bakalekela kulonda Bena Isalele, kabakaluangana nʼabo kabidi.

²⁹ Abinê ne bantu bandi bakenda butuku bujima, bakahitshila mu buloba bua Alabâ, bakasabuka dishiya dia Yadene, bakahitshila mu buloba bua Bitelona tô ne hakafikabo ku Mahanayima.

³⁰ Yoaba wakalekela kulonda Abinê; hakasangisheye bantu bonso, bantu ba Davidi dikumi ne tshitema ne Asahele kabakadiku.

³¹ Kadi bantu ba Davidi bakashiha Bena Benyamina ne bantu ba Abinê nkama isatu ne makumi asambombo.

³² Bakambula tshitalu tshia Asahele, bakatshijika mu lukita lua tatu wandi luakadi mu Beteleheme. Yoaba ne bantu bandi bakenda tô butuku bujima; hakatshiabu bakafika ku Hebelone.