2 Samuele 18 - Mukanda wa Nzambi Dihungila Dikulukulu ne Dihungila Dihia-dihia 2003

Lufu lua Abashaloma

¹ Davidi wakabala bantu bakadi nʼandi, wakateka tupitene ku mutu kua binunu bia bantu ne ku mutu kua nkama ya bantu.

² Davidi wakatuma bantu ku nvita, tshituha tshisatu tshia kumudilu mu bianza bia Yoaba, ne tshituha tshisatu tshikuabo mu bianza bia Abishai, muana wa Seluya, muanʼabo ne Yoaba, ne tshituha tshisatu tshikuabo mu bianza bia Itai, Muena Giti. Mukelenge wakambila bantu ne, Bulelela, meme bianyi nenye nʼenu kabidi.

³ Kadi bantu bakamuambila ne, Kuyi nansha; bualu bua bituanyema, kabena nʼetu bualu; biashihabo tshituha tshia buonso buetu, kabena nʼetu bualu nansha; wewe udi uhita binunu bietu dikumi mushinga mukole; bidi bitamba buimpe bua wewe kudilongolola bua kutukuatshisha ku musoko.

⁴ Mukelenge wakabambila ne, Nengenze tshinudi basue. Mukelenge wakimana ku luseke lua tshibi, ne bantu bakaluhuka ku nkama ku nkama, ku binunu ku binunu.

⁵ Mukelenge wakambila Yoaba ne Abishai ne Itai ne, Kanuenzedi nsongalume Abashaloma bibi bua bualu buanyi. Bantu bonso bakunvua mukenji wakelela mukelenge tupitene tuonso bualu bua Abashaloma.

⁶ Nunku bantu bakaluhuka bua kuya mu mpata bua kuluanganabo ne Bena Isalele; bakadi baluila mu ditu dia Efelayima.

⁷ Bantu ba Davidi bakahita Bena Isalele bukole; kushiha kunene kua bantu binunu makumi abidi kuakadiku dituku adi.

⁸ Bualu bua nvita yakadi ku nseke yonso ya buloba; bantu bakafua mu ditu bakahita bantu bakashihibua ku miele ya nvita bungi.

⁹ Abashaloma wakasangila ne bantu ba Davidi ku mpukahuka. Abashaloma wakadi wenda ha nyima ha nyama wandi wa mpunda; nyama wandi wakabuela muinshi mua matamba a mutshi munene wa telebinta; mutu wandi wakakuata ku ditamba dia mutshi, ne yeye wakakanana hankatshikatshi kulu kule, hanshi hale, ne nyama wakadiye nʼandi wakahita.

¹⁰ Muntu mukuabo wakatangila bualu ebu, wakamanyisha Yoaba ne, Mona, nakatangila Abashaloma mulembelele ku mutshi.

¹¹ Yoaba wakambila muntu wakamuambila ne, Mona, wakatangila bualu ebu, kuakamushiha, kuakamuhonesha bua tshinyi? Meme nakadi kukuha argent dikumi ne mukaba.

¹² Muntu au wakambila Yoaba ne, Nansha wewe mumpe binunu dikumi bia argent mu tshianza tshianyi, tshiakadi kulenga tshianza tshianyi hamʼbidi ha muana wa mukelenge; bualu bua mukelenge wakanuambila ne Abishai ne Itai mu matshu etu ne, Dimukai, kanulengi nsongalume Abashaloma tshianza.

¹³ Bu meme muenze nunku, nakadi kudinga muoyo wanyi (kakuena bualu bubi busokoka kudi mukelenge), hashishe wewe nkayebe wakadi kuluangana nʼanyi.

¹⁴ Yoaba wakamba ne, Tshiena mua kujanguluka nʼebe bua bualu ebu. Yeye wakangata mikete isatu mu tshianza tshiandi, wakayasa ha muoyo wa Abashaloma hakadiye mulembelele mutshikale ne muoyo munkatshi mua matamba a mutshi.

¹⁵ Bansongalume dikumi bakadi batuala bintu bia nvita bia Yoaba, bakela Abashaloma munkatshi, bakamuasa, bakamushiha.

¹⁶ Yoaba wakela mpungi ne bantu bakalekela kulonda Bena Isalele, bualu bua Yoaba wakakanda bantu.

¹⁷ Bakangata Abashaloma, bakamuha mu lubuebue lunene luakadi muitu, bakamungushila mushiki munene wa mabue; Bena Isalele bonso bakanyema muntu ne muntu ku ntenta wandi.

¹⁸ Hakadi Abashaloma ne muoyo, yeye wakadishimikila dibue dinene mu tshibanda tshia mukelenge, wamba ne, Tshiena ne muana mulume bua kujadikeye dina dianyi; yeye wakidika dibue adi dina diandi; badi badibikila ne, Tshivulukidi tshia Abashaloma tô ne katataka.

¹⁹ Hashishe Ahimasa, muana wa Sadoka, wakamba ne, Nye lubilu bua kumanyisha mukelenge ne, Yehowa wakakusombuela kudi bena lukuna bebe.

²⁰ Yoaba wakamuambila ne, Kuena uya ne lumu elu lelu eu, kadi neuye nʼalu dituku dikuabo, bualu bua muana wa mukelenge wakafua.

²¹ Yoaba wakambila Muena Kushi ne, Ya biebe, Wambile mukelenge malu awakatangila. Muena Kushi wakakukuila Yoaba, wakaya.

²² Hashishe Ahimasa, muana wa Sadoka, wakambila Yoaba kabidi ne, Bialua malu onso kundi, anji kuitabusha bua meme ndonde Muena Kushi. Yoaba wakamuebesha ne, Muanʼanyi, wewe udi musue kumulonda bua tshinyi? Kuena mua kuangata difutu dia lumu, anyi?

²³ Kadi yeye wakamba ne, Bialua malu onso kundi, nyaya. Yeye wakamuambila ne, Ya. Ahimasa wakayila mu nshila wa mu Mpata, wakahita Muena Kushi lubilu.

²⁴ Davidi wakadi mushikame hankatshi ha bibi bibidi; mutentekedi wakabanda ha mutu ha tshibi tshia lumbu, wakabanduluka, ne monai, muntu udi ulua lubilu nkayandi.

²⁵ Mutentekedi wakela dî, wakambila mukelenge. Mukelenge wakamba ne, Bialueye nkayandi, udi ne lumu mukana muandi. Yeye wakamba kufika ha buihi.

²⁶ Mutentekedi wakatangila muntu mukuabo ulua lubilu; mutentekedi wakambila mulami wa tshibi ne, Mona muntu mukuabo udi ulua lubilu nkayandi. Mukelenge wakamba ne, Yeye udi ulua ne lumu kabidi.

²⁷ Mutentekedi wakamba ne, Ndi ngelangana meji ne luendu lua muntu udi ku mpala ludi bu lua Ahimasa, muana wa Sadoka. Mukelenge wakamba ne, Yeye udi muntu muimpe, udi ulua ne lumu luimpe.

²⁸ Ahimasa wakela dî, wakambila mukelenge ne, Malu onso adi talalâ. Wakatua mpala wandi hanshi ku mesu kua mukelenge, wakamba ne, Yehowa, Nzambi webe, wakafila bantu bakatombokela mukelenge mu bianza bia mukelenge, avudishibue disanka.

²⁹ Mukelenge wakamuebesha ne, Nsongalume Abashaloma udi talalâ, anyi? Ahimasa wakakudimuna ne, Hakatuma Yoaba muntu webe kûdi, nakunvua diyoyo dinene, kadi tshiakamanya muakadi bualu.

³⁰ Mukelenge wakamba ne, Semena, wimane aha. Yeye wakasemena, wakimana.

³¹ Monai, Muena Kushi wakafika; Muena Kushi wakamba ne, Ndi ne lumu lua kuambila mukelenge, bualu bua Yehowa wakakusombuela lelu kudi bonso bakabika bua kukutombokela.

³² Mukelenge wakebesha Muena Kushi ne, Nsongalume Abashaloma udi talalâ, anyi? Muena Kushi wakamukudimuna ne, Bena lukuna ba mukelenge wanyi ne bonso bakabika bua kukuenzela bibi bikale bu nsongalume au.

³³ Kanyinganyinga kakole kakakuata mukelenge, yeye wakabanda ku nsubu wakadi ku mutu kua tshibi, wakadila; hakadiye uya, wakamba ne, Muanʼanyi Abashaloma, muanʼanyi, muanʼanyi Abashaloma! Meme nakadi kukufuila, Abashaloma, muanʼanyi, muanʼanyi!