2 Samuele 15 - Mukanda wa Nzambi Dihungila Dikulukulu ne Dihungila Dihia-dihia 2003

Abashaloma Udi Utombokela Davidi

¹ Ku nyima kua bualu ebu Abashaloma wakadilongoluela dikalu ne tubalu ne bantu makumi atanu bua kuyabo ku mpala kuandi.

² Abashaloma wakabika dinda dionso, wakimana ha buihi ne nshila wa ku tshibi tshia musoko; nunku hakalua muntu ne tshilumbu bua kuyeye nʼatshi ku tshilumbuluidi tshia mukelenge, Abashaloma wakamubikila, wakamuebesha ne, Wewe udi wa ku musoko kai? Yeye wakadi umuambila ne, Muntu webe udi wa mu tshisamba tshia Bena Isalele.

³ Hashishe Abashaloma wakamuambila ne, Mona, malu ebe adi malengele ne makane, kadi kakuena muntu musungula kudi mukelenge bua kunvueye malu ebe.

⁴ Abashaloma wakamba kabidi ne, Bu meme muikale mulumbuluishi wa buloba, muntu yonso udi ne tshilumbu anyi bualu wakadi kumanya mua kulua kundi bua meme kumulumbuluila biakane.

⁵ Nunku hakasemena muntu ha buihi nʼandi bua kumukukuila, yeye wakolola tshianza tshiandi, wakamutua mishiku.

⁶ Abashaloma wakenzela Bena Isalele bonso nunku, hakaluabo ku tshilumbuluidi tshia mukelenge; nunku Abashaloma wakiba mitshima ya Bena Isalele.

⁷ Hakahita bidimu binai, Abashaloma wakambila mukelenge ne, Ndi nkusengelela ne, Witabushe bua meme kuya kushikisha kuditshiha kuanyi kunakaditshiha kudi Yehowa mu Hebelone.

⁸ Bualu bua hakadi muntu webe mushikame mu Geshû wa mu Sulia wakaditshiha mutshihu ne, Biampingisha Yehowa mu Yelushalema, meme nentendelele Yehowa.

⁹ Mukelenge wakamuambila ne, Ya biebe talalâ. Nunku wakajuka, wakaya ku Hebelone.

¹⁰ Kadi Abashaloma wakatuma batentekedi ku bisamba bionso bia Bena Isalele, benda bamba ne, Hanunvua dî dia mpungi, nenuambe ne, Abashaloma udi mukelenge mu Hebelone.

¹¹ Bantu nkama ibidi bakitaba kudi Abashaloma, bakumuka mu Yelushalema, bakaya nʼandi; bakaya bu mu mpukahuka, kabakadi bamanye bualu.

¹² Abashaloma wakatuma dî, wakabikila Ahitofele, Muena Gilo, muena lungenyi wa Davidi, ku musoko wandi, ku Gilo mene, hakadiye ufila milambu. Tshifufu tshiakatamba bukole, bualu bua bantu bakavulangana kudi Abashaloma.

¹³ Messager wakafika kudi Davidi wamba ne, Mitshima ya Bena Isalele idi kudi Abashaloma.

¹⁴ Davidi wakambila bantu bonso bakadi nʼandi mu Yelushalema ne, Jukai, tunyemai; bituashala, nansha umue wetu neahanduke mu bianza bia Abashaloma; tuyai lubilu, yeye katshetshi; biatuheteye neabenzele bibi, neabutule musoko ne miele ya nvita.

¹⁵ Bantu ba mukelenge bakamuambila ne, Mona, bantu bebe bakamana kudilongolola bua kuenzabo malu onso adi mukelenge wabo musungule.

¹⁶ Mukelenge wakumuka, ne bonso ba mu nsubu muandi bakamulonda. Mukelenge wakashiya bakashi bahika babakibue dikumi bua kulamabo nsubu.

¹⁷ Mukelenge wakumuka, ne bantu bonso bakamulonda, bakashikama mu Bete-mêhaka.

¹⁸ Bantu bandi bonso bakenda nʼandi hohamue; Bena Kelete bonso ne Bena Pelete bonso ne Bena Giti bonso, bantu nkama isambombo bakamulonda bafume mu Gata, bakadianjila ku mpala kua mukelenge.

¹⁹ Hashishe mukelenge wakambila Itai, Muena Giti ne, Wewe uyaya nʼetu kabidi bua tshinyi? Walukile, ushikame ne mukelenge; bualu bua wewe udi muntu wa bende, wakihatabo kabidi; uhingane ku muaba webe.

²⁰ Bualu bua wewe wakalua anu makelela eu, bûdi nʼabu mbua kubanda nʼetu ne kuhueka nʼetu lelu, anyi? Bualu bua meme nyaya kundi mua kuya; hingana biebe, uye ne bana benu, luse ne bulelela bikale nʼebe.

²¹ Itai wakakudimuna mukelenge dî ne, Bu mudi Yehowa ne muoyo ne bu mudi mukelenge wanyi ne muoyo, bulelela, mu miaba yonso idi mukelenge wanyi uya, nansha mu muaba wa lufu nansha mu muaba wa muoyo, muntu wandi neikaleku kabidi.

²² Davidi wakambila Itai ne, Ya, hita ku mpala. Itai, Muena Giti, wakahita ku mpala ne bantu bandi bonso ne bana bakese bonso bakadi nʼandi.

²³ Bena buloba bonso bakadila ne dî dikole; bantu bonso bakahita; mukelenge biandi kabidi wakasabuka kasulu ka Kidilona ne bantu bonso bakasabuka, bakaya mu nshila wa mu tshihela.

²⁴ Monai, Sadoka ne Ebayatâ bakatua ne Bena Lewi bonso bakadi nʼabo, batuale mushete wa tshihungidi tshia mei a Nzambi; bakateka mushete wa Nzambi hanshi; Ebeyatâ wakayaku tô ne hakumuka bantu bonso mu musoko.

²⁵ Mukelenge wakambila Sadoka ne, Hingisha mushete wa Nzambi mu musoko; binasangana luse ku mesu kua Yehowa, yeye neampingishe kabidi, neaundeshe ne musoko wandi kabidi;

²⁶ kadi biangambileye ne, Tshiena nʼebe disanka kabidi, mona, meme ndiku, angenzele budi buimpe kudiye.

²⁷ Mukelenge wakambila Sadoka muakuidi kabidi ne, Wewe kuena mumonyi wa malu, anyi? Hingana ku musoko talalâ, wewe ne bana bebe balume babidi, Ahimasa, muana webe, ne Yonatana, muana wa Ebeyatâ.

²⁸ Meme nenshale mu mpata ya tshihela tô ne hangunvua dî kûdi dia kummanyisha malu.

²⁹ Sadoka ne Eyebatâ bakaya ne mushete wa Nzambi ku Yelushalema kabidi: bakashikamaku.

³⁰ Davidi wakabanda mukuna wa Olive, wenda udila; wakabuikila mutu wandi, wakashiya makasa andi hatuhu, bantu bonso bakadi nʼandi bakabuikila mitu yabo, badile hakabandabo.

³¹ Bakambila Davidi ne, Ahitofele udi munkatshi mua bena tshifufu ba Abashaloma. Davidi wakamba ne, Yehowa, ndi nkusengelela ne, Kudimuna lungenyi lua Ahitofele lulue luhote.

³² Hakafika Davidi ku mutu kua mukuna kuakadibo batendelela Nzambi, monai, Hushai, Muena Aka, wakalua kusangakena nʼandi ne tshikowelu tshiandi tshihandika ne buloba mu mutu wandi.

³³ Davidi wakamuambila ne, Biwaya nʼanyi, wewe newikale bu bujitu kundi;

³⁴ kadi biwahingana ku musoko, biwambila Abashaloma ne, Mukelenge, nengikale muntu webe, bu munakadi muntu wa tatu webe diambedi, nunku nengikale muntu webe katataka; hashishe udi mumanye mua kukuatshisha bua kukudimuna lungenyi lua Ahitofele.

³⁵ Sadoka ne Ebeyatâ, bakuidi, kabena nʼebe, anyi? Nunku mei onso audi unvua mu nsubu wa mukelenge, wâmbile Sadoka ne Ebeyatâ, bakuidi.

³⁶ Mona, badiku ne bana babo balume babidi, Ahimasa, muana wa Sadoka, ne Yonatana, muana wa Ebeyatâ; nunku nudi bamanye mua kubatuma kundi ne mei onso anudi nunyua.

³⁷ Nunku Hushai, mulunda wa Davidi, wakalua mu musoko; ne Abashaloma wakabuela mu Yelushalema.