2 Samuele 14 - Mukanda wa Nzambi Dihungila Dikulukulu ne Dihungila Dihia-dihia 2003

Yoaba Udi Ukeba Kuhingisha Abashaloma

¹ Yoaba, muana wa Seluya, wakatangila bu muakadi mutshima wa mukelenge muikale kudi Abashaloma.

² Yoaba wakatuma dî ku Tekoa, wakabikilaku mukashi wakadi ne lungenyi lule, wakamuambila ne, Ndi nkusengelela ne, Udifuanyishe bu muena madilu, uluate bilulu bia muena madilu, kulabi manyi hamʼbidi nansha, kadi wikale bu mukashi wakadi ne madilu a bafue musangu mule;

³ uye kudi mukelenge, umuambile nunku. Yoaba wakateka mei mukana muandi.

⁴ Hakadi mukashi wa ku Tekoa uyikila ne mukelenge, yeye wakatua mpala wandi hanshi ha buloba, wakamukukuila, wakamba ne, Mukelenge, unkuatshishe.

⁵ Mukelenge wakamuebesha ne, Bualu kai budi bukutatshisha? Yeye wakamukudimuna dî ne, Bulelela, ndi mukashi wa mu lufuila, bayanyi wakafua.

⁶ Muntu webe wakadi ne bana balume babidi, bubidi buabo bakaluangana hakadibo mu budimi, nansha muntu wakadiku bua kubasunga, nunku umue wakakuma mukuabo, wakamushiha.

⁷ Nunku, mona, bantu bonso ba mu diku dietu bakadisangisha kudi muntu webe bamba ne, Ufile wakashiha muanʼabo bua tuetu tumushihe bua muoyo wa muanʼabo wakashiheye; nunku nebashihe muhianyi kabidi; nunku nebajimishe dikala dianyi dia kahia didi dishala, nebashiye bayanyi kayi ne dina hanshi ha buloba.

⁸ Mukelenge wakambila mukashi ne Ya ku nsubu kuebe, nendonde tshilumbu tshiebe.

⁹ Mukashi wa ku Tekoa wakambila mukelenge ne, Mukelenge, bualu ebu bubi buikale kundi ne ku nsubu wa tatu wanyi; mukelenge ne nkuasa wandi wa butumbi kabikadi ne bualu.

¹⁰ Mukelenge wakamba ne, Biakuambila muntu dî dimue, alue nʼandi kundi, ne yeye kena ukulenga tshianza kabidi.

¹¹ Hashishe yeye wakamuambila ne, Mukelenge avuluke Yehowa, Nzambi wandi, bua musombuedi wa mashi kashihi kabidi, kabashihi muanʼanyi. Yeye wakamba ne, Bu mudi Yehowa ne muoyo, lusuki lumue lua ku mutu kua muanʼebe kaluena luhona hanshi.

¹² Hashishe mukashi wakamba ne, Ndi nkusengelela ne, Witabushe bua muntu webe ambile mukelenge wandi dî. Yeye wakamuambila ne, Ambaku.

¹³ Mukashi wakamba ne, Wewe wakelangana meji bua kuenzela bantu ba Nzambi nunku bualu kai? Bualu bua hamba mukelenge dî edi, yeye udi mudihishe bualu bua mukelenge kena uhingisha muntu wakihateye ku mbelu kuandi kabidi.

¹⁴ Bualu bua butudi nʼabu mbua kufua; tudi bu mai akelabo ha buloba, kabena bamanye mua kuasuna kabidi; Nzambi kena unyenga muoyo wa muntu, kadi udi ulongolola bua muntu udibo bihata kikadi bu muntu mubengibue kudiye.

¹⁵ Nunku nakulua bua kuambila mukelenge dî edi, bualu bua bantu bakamba kuntshinyisha; nunku muntu webe mukashi wakamba ne, Nengambile mukelenge bualu ebu; bumue mukelenge neitabushe kuenza kulomba kua muntu wandi.

¹⁶ Mukelenge neunvue biandi bua kusungila muntu wandi mu tshianza tshia muntu udi ukeba kungumusha hohamue ne muanʼanyi mu buhianyi bua Nzambi.

¹⁷ Hashishe muntu webe mukashi wakamba ne, Ndi nkusengelela ne, Dî dia mukelenge wanyi dinsambe; bualu bua mukelenge udi bu muanjelo wa Nzambi bua kujingululeye malu mimpe ne malu mabi. Yehowa, Nzambi webe, ikale nʼebe.

¹⁸ Hashishe mukelenge wakambila mukashi ne, Ndi nkusengelela ne, Kunsokoki bualu bundi musue kukuebesha. Mukashi wakamba ne, Mukelenge wanyi ambe dî diandi.

¹⁹ Mukelenge wakamuebesha ne, Tshianza tshia Yoaba tshidi nʼebe mu bualu ebu buonso, anyi? Mukashi wakamukudimuna dî ne, Mukelenge wanyi, bu mudi mutshima webe ne muoyo kakuena muntu udi mua kusesuka ku tshianza tshia balume anyi ku tshianza tshia bakashi ku dî diakunkonka mukelenge wanyi; bualu bua Yoaba muntu webe wakantuma, wakateka mei â onso mukana mua muntu webe mukashi;

²⁰ muntu webe Yoaba wakenza nunku bua kukudimuneye bualu ebu; ne mukelenge wanyi udi ne lungenyi lule bu mudi muanjelo wa Nzambi nʼalu bua kujingululeye malu onso adi hanshi ha buloba.

²¹ Mukelenge wakambila Yoaba ne, Mona, nakuitabusha bualu ebu; nunku uye biebe, uhingishe nsongalume Abashaloma.

²² Yoaba wakatua mpala wandi hanshi, wakamukukuila, wakavudishila mukelenge disanka; Yoaba wakamba ne, Lelu muntu webe udi mumanye ne yeye wakasangana luse ku mesu kua mukelenge wandi bualu bua yeye wakunyua kulomba kua muntu wandi.

²³ Nunku Yoaba wakajuka, wakaya ku Geshû, wakahingana ne Abashaloma ku Yelushalema.

²⁴ Mukelenge wakamba ne, Aye biandi ku nsubu kuandi, katangidi mpala wanyi. Nunku Abashaloma wakaya ku nsubu wandi, kakatangila mpala wa mukelenge.

²⁵ Kakuakadi muntu mukuabo wakatumbishabo mu Isalele bua bulengele buandi bu Abashaloma; bualu bua yeye kakadi ne katoba kakese mu lubombo lua mutu wandi tô ne munda mua makasa andi.

²⁶ Hakabeyeye nsuki ya ku mutu (bualu bua yeye wakadi ne tshilele tshia kubeya nsuki yandi ku tshidimu ku tshidimu, bualu bua bujitu buai), hakidikisheye bujitu bua nsuki yandi buakadi bu nshekele nkama ibidi, bu mudi tshidikishilu tshia mukelenge.

²⁷ Abashaloma wakalela bana ba balume basatu ne muana wa bakashi umue, dina diandi Tamâ, wakadi mukashi mulengele kumona.

²⁸ Abashaloma wakashikama mu Yelushalema bidimu bibidi bijima, yeye kakatangila mpala wa mukelenge.

²⁹ Hashishe Abashaloma wakabikila Yoaba bua kumutumeye kudi mukelenge; kadi yeye wakahidia kulua kudiye; yeye wakamubikila tshiakabidi, kadi yeye wakahidia kulua.

³⁰ Nunku yeye wakambila bantu bandi ne, Budimi bua Yoaba budi ha buihi ne buanyi, yeye udi ne orge mikunamu; yai, nuyoshe ne kahia. Bantu ba Abashaloma bakayosha ne kahia.

³¹ Hashishe Yoaba wakajuka, wakaya kudi Abashaloma ku nsubu kuandi, wakamuebesha ne, Bualu kai bantu bebe bakosha budimi buanyi?

³² Abashaloma wakakudimuna Yoaba dî ne, Mona, nakakubikila ne, Lua kunoko, bua kukutuma kudi mukelenge bua kumuebesha ne, Wakumbikidila ku Geshû bua tshinyi? Biakadi bimpe bua meme kushalaku. Nunku witabushe bua meme kutangila mpala wa mukelenge; ne bingikala ne bualu bubi, anshihe.

³³ Nunku Yoaba wakaya kudi mukelenge, wakamuambila mei â. Hakabikileye Abashaloma, yeye wakaya kudi mukelenge, wakatua mpala wandi hanshi ku mpala kua mukelenge; mukelenge wakatua Abashaloma mishiku.