2 Samuele 13 - Mukanda wa Nzambi Dihungila Dikulukulu ne Dihungila Dihia-dihia 2003

Amenona ne Tamâ

¹ Ku nyima kua bualu ebu Abashaloma, muana wa Davidi, wakadi ne muanʼabo wa bakashi mulengele kumona, dina diandi diakadi Tamâ; Amenona, muana wa Davidi, wakamunanga.

² Amenona wakatamba kunyingalasha mutshima tô ne bakalueye bu musami, bualu bua muanʼabo wa bakashi, Tamâ; bualu bua yeye wakatshidi kamama ne bualu buakadi bukole kudi Amenona bua kumuenzeleye bualu bubi.

³ Kadi Amenona wakadi ne mulunda, dina diandi Yonadaba, muana wa Shimea, muanʼabo ne Davidi; Yonadaba wakadi ne budimu bukole.

⁴ Yeye wakebesha Amenona ne, Wewe, muana wa mukelenge, mûdi unyana nunku ku dituku ku dituku munyi? Kuena ungambila meme, anyi? Amenona wakamuambila ne, Ndi munange Tamâ, muanʼabo wa bakashi ne muanʼetu Abashaloma.

⁵ Yonadaba wakamuambila ne, Lala ha bulalu buebe bu muntu udi ne disama; halua tatu webe kukutangila, umuambile ne, Ndi nkusengelela ne, Anji kuitabusha bua muanʼetu wa bakashi Tamâ alue bua kundisheye bidia, alongolole bia kudia anu ku mesu kuanyi, bua meme mbitangile, mbidie anu ku tshianza tshiandi.

⁶ Nunku Amenona wakalala hanshi, wakadifuanyisha bu muena disama; hakabuela mukelenge bua kumutangila, Amenona wakambila mukelenge ne, Ndi nkusengelela ne, Anji kuitabusha bua muanʼetu Tamâ andambile mikata ibidi ku mesu kuanyi bua meme nyidie anu ku tshianza tshiandi.

⁷ Hashishe Davidi wakatuma dî ku nsubu kuakadi Tamâ ne, Uye biebe ku nsubu wa muanʼenu Amenona, umulambile bia kudia.

⁸ Nunku Tamâ wakaya ku nsubu wa muanʼabo Amenona, wakamusangana mulale hanshi. Yeye wakangata bukula, wakabulongolola, wakenza mikata ku mesu kuandi, wakalamba mikata.

⁹ Yeye wakangata dilonga, wakayiteka ku mesu kuandi, kadi yeye wakahidia kuyidia. Amenona wakamba ne, Bantu bonso bakuabo bumuke kundi. Bantu bonso bakumuka kudiye.

¹⁰ Amenona wakambila Tamâ ne, Ulue ne mikata ai mu nsubu wa bulalu bua meme kuyidia ku tshianza tshiebe. Tamâ wakangata mikata yakeleye, wakaya nʼai mu nsubu wa bulalu kudi muanʼabo Amenona.

¹¹ Hakalueye nʼai kudiye bua kumudisha, yeye wakamukuata, wakamuambila ne, Lua, muanʼetu mukashi, ulale nʼanyi.

¹² Yeye wakamukudimuna dî ne, Nansha, muanʼetu mulume, kunkuatshi ku bukole nunku, bualu ebu kabuena mua kuenjibua mu Isalele; kuenji bualu ebu buhote.

¹³ Meme nenteke bundu buanyi kudi kunyi? Ne bua bualu buebe wewe newikale bu umue wa bahote mu Isalele. Nunku ndi nkusengelela ne, Webeshe mukelenge bualu ebu, yeye kena uhidia kunfila kûdi.

¹⁴ Kadi yeye kakunyua dî diandi; kadi bualu bua yeye wakamuhita bukole, yeye wakamukuata ku bukole, wakalala nʼandi.

¹⁵ Hashishe Amenona wakatamba kumukina ne lukinu lukole, lukinu luakamukineye nʼalu tuakahita dinanga diakadiye nʼadi kudiye bukole. Amenona wakamuambila ne, Juka, ya biebe.

¹⁶ Yeye wakamuambila ne, Nansha, tshiena nya, bualu ebu bua kungumusha nunku budi butamba bukuabo buwakungenzela bubi. Kadi yeye kakunyua dî diandi.

¹⁷ Hashishe yeye wakabikila muena mudimu wandi wakadi umukuatshila mudimu, wakamuambila ne, Umushe mukashi eu kundi, wele nsahi ku tshibi.

¹⁸ Yeye wakadi muluate bilulu bia bibaka bibaka, bualu bua bana ba bakashi ba mukelenge bakatshidi tumama bakadi ne tshilele tshia kuluata bilulu nunku. Hashishe muena mudimu wandi wakamûmusha, wakela nsahi ku tshibi.

¹⁹ Tamâ wakela butue mu mutu wandi, wakadihanda bilulu biandi bia bibaka bibaka biakadiye muluate; yeye wakateka tshianza tshiandi ha mutu handi, wakaya wenda udila bikole.

Abashaloma Udi Usombuela Amenona, Udi Unyema

²⁰ Abashaloma, muanʼabo mulume, wakamuebesha ne, Muanʼetu Amenona wakadi nʼebe, anyi? Udiholeshe, muanʼetu mukashi, yeye udi muanʼenu mulume, kuteki bualu ebu mu mutshima webe. Nunku Tamâ wakashala ne kanyinganyinga mu nsubu wa muanʼabo Abashaloma.

²¹ Kadi hakunvua mukelenge Davidi malu â onso, wakadi ne tshiji tshikole.

²² Abashaloma kakambila Amenona mei mimpe anyi mei mabi; Abashaloma wakadi ne Amenona lukuna bualu bua yeye wakakuata muanʼabo mukashi Tamâ ku bukole.

²³ Hakahita bidimu bibidi bijima, Abashaloma wakasangisha bakoshi ba miosa ya mikoko ku Bâla-hasô, udi hehi ne Efelayima; Abashaloma wakabikilaku bana balume bonso ba mukelenge.

²⁴ Abashaloma wakaya kudi mukelenge, wakamuambila ne, Mona, muntu webe udi ne bakoshi ba miosa ya mikoko, ndi nkusengelela ne, Mukelenge ne bantu bandi baye ne muntu wandi.

²⁵ Mukelenge wakambila Abashaloma ne, Nansha, muanʼanyi, bituaya buonso buetu bualu ebu nebuikale bu bujitu kûdi. Yeye wakamusengelela, kadi yeye kakitabusha kuya; kadi wakamuvudishila disanka.

²⁶ Hashishe Abashaloma wakamba ne, Biwahidia kuya, ndi nkusengelela ne, Witabushe bua muanʼetu Amenona aye nʼetu. Mukelenge wakamuebesha ne, Yeye udi ne bua kuya nʼebe bua tshinyi?

²⁷ Abashaloma wakamusengelela tô; nunku yeye wakitabusha, bua Amenona ne bana balume bonso ba mukelenge baye nʼandi.

²⁸ Abashaloma wakelela bantu bandi mukenji ne, Nutangile Amenona bimpe ne hasanka mutshima wandi mu kukuatshika kua maluvu. Hananuambila ne, Nutahe Amenona, bimpe nu mushihe, kanutshinyi; meme tshiakunuambila dî, anyi? Nukoleshe mitshima, nuikale ne dikima.

²⁹ Bantu ba Abashaloma bakenzela Amenona bu muakabambila Abashaloma. Hashishe bana balume bonso ba mukelenge bakabika, bakabanda ha nyima ha nyama ya mpunda, bakanyema.

³⁰ Hakatshidibo baya mu nshila, lumu luakafika kudi Davidi ne, Abashaloma wakashiha bana balume bonso ba mukelenge, nansha umue wabo udi mushale.

³¹ Hashishe mukelenge wakabika, wakahanda bilulu biandi, wakalala hanshi mu buloba; bantu bandi bonso bakimana ha buihi nʼandi ne bilulu biabo bihanda.

³² Yonadaba, muana wa Shimea, muanʼabo ne Davidi, wakamuambila ne, Mukelenge kedi meji ne, Bakashiha bansongalume bonso, bana ba mukelenge, bualu bua anu Amenona nkayandi wakafua; bualu bua Abashaloma wakahangidisha bualu ebu ku didiku diakakuateye muanʼabo mukashi Tamâ ku bukole.

³³ Nunku mukelenge kateki bualu ebu mu mutshima wandi bua kuelangana meji ne, Bana balume bonso ba mukelenge bakafua; bualu bua anu Amenona nkayandi wakafua.

³⁴ Kadi Abashaloma wakanyema. Nsongalume wakadi mutentekedi, wakabanduluka, wakatangila ne, monai, bantu ba bungi balualua mu nshila wa ku mukuna ku nyima kuandi.

³⁵ Yonadaba wakambila mukelenge ne, Tangila, bana balume ba mukelenge bakulua bu muakamba muntu webe.

³⁶ Hakashikisheye kuamba dî edi, monai, bana ba mukelenge bakafika, bakabandisha mei abo, bakadila; mukelenge ne bantu bandi bonso bakadila bikole kabidi.

³⁷ Kadi Abashaloma wakanyema, wakaya kudi Talemai, muana wa Amihû, mukelenge wa mu Geshû. Davidi wakajuka muanʼandi ku dituku ku dituku.

³⁸ Abashaloma wakanyema nunku, wakaya ku Geshû, wakashikamaku bidimu bisatu.

³⁹ Mutshima wa mukelenge Davidi wakasua kuya kudi Abashaloma: bualu bua yeye wakasambibua bualu bua Amenona, bua yeye wakafua.