2 Samuele 11 - Mukanda wa Nzambi Dihungila Dikulukulu ne Dihungila Dihia-dihia 2003

Davidi ne Beta-sheba

¹ Ku tshibangidilu tshia tshidimu tshikuabo hakadi bakelenge baluhuka bua kuluanganabo, Davidi wakatuma Yoaba ne bantu bandi bakadi nʼandi ne Bena Isalele bonso, bakahaula bintu bia Bena Amona; bakatshintshimika musoko wa Laba. Kadi Davidi wakashala mu Yelushalema.

² Dilolo dikuabo hakabika Davidi ku bulalu buandi, yeye wakadi wendakana ku mutu kua nsubu wa mukelenge; hakadiye ku mutu kua nsubu, yeye wakatangila mukashi wowa mai; wakadi mukashi mulengele kumona.

³ Davidi wakatuma dî, wakebesha bualu bua mukashi eu. Muntu mukuabo wakamba ne, Yeye udi Beta-sheba, muana wa Eliyama, mukashi wa Uliya, Muena Hiti.

⁴ Davidi wakatuma bantu bakamuangata, yeye wakabuela kudiye, wakalala nʼandi (bualu bua yeye wakamana kuhatuka ku bukoya buandi). Yeye wakahingana ku nsubu wandi.

⁵ Mukashi eu wakimita difu; wakatumina Davidi dî ne, Ndi ne difu.

⁶ Hashishe Davidi wakatumina Yoaba dî ne, Untumine Uliya, Muena Hiti. Nunku Yoaba wakatuma Uliya kudi Davidi.

⁷ Hakafika Uliya kudiye, Davidi wakamukonka bualu bua Yoaba ne bua bantu ne bua nvita.

⁸ Davidi wakambila Uliya ne, Ya ku nsubu kuebe, wowe mai ku makasa ebe. Uliya wakumuka ku nsubu wa mukelenge; mukelenge wakamutumina bia kudia.

⁹ Kadi Uliya wakalala anu ku mbelu kua nsubu wa mukelenge ne bantu bonso ba mukelenge wandi, kakaya ku nsubu kuandi.

¹⁰ Hakambilabo Davidi ne, Uliya kakaya ku nsubu kuandi, Davidi wakebesha Uliya ne, Wewe kuakulua ku luendu, anyi? Nunku wakahidia kuya ku nsubu kuebe bua tshinyi?

¹¹ Uliya wakambila Davidi ne, Mushete wa Yehowa ne Bena Isalele ne Bena Yuda bidi mu ntenta; ne mukelenge wanyi Yoaba ne bantu bonso ba mukelenge wanyi badi ne tshitudilu tshiabo mu madimi, nunku bundi nʼabu mbua kubuela mu nsubu wanyi bua kudia ne bua kunua ne bua kulala ne mukashi wanyi, anyi? Bu mudi wewe ne muoyo ne bu mudi mutshima webe ne muoyo tshiena ngenza bualu ebu.

¹² Davidi wakambila Uliya ne, Ushale kunoko lelu kabidi, ne makelela nengitabushe bua wewe uye. Nunku Uliya wakashala mu Yelushalema dituku adi tô ne hakatshiabu.

¹³ Hakamubikila Davidi, yeye wakadia, wakanua ku mpala kuandi; Davidi wakamunuisha maluvu, wakakuatshika; kadi dilolo wakahatuka bua kulala ha bulalu buandi ne bantu ba mukelenge wandi, kakaya ku nsubu kuandi.

¹⁴ Hakatshiabu Davidi wakafundila Yoaba mukanda, wakautuma mu bianza bia Uliya.

¹⁵ Wakafunda mu mukanda nunku ne, Uteke Uliya ku mpala hadi nvita mikole, umushiyeku, bamushihe, afue biandi.

¹⁶ Hakadi Yoaba utentekele musoko, yeye wakateka Uliya ha muaba hakadi bena bukitu.

¹⁷ Bena musoko bakaluhuka, bakaluangana ne Yoaba; bantu bakuabo ba Davidi bakafua; Uliya, Muena Hiti, wakafua kabidi.

¹⁸ Hashishe Yoaba wakatuma di, wakamanyisha Davidi malu onso a nvita;

¹⁹ yeye wakambila messager bikole ne, Hawashikisha kuambila mukelenge malu onso a nvita,

²⁰ ne biakuata mukelenge tshiji, biakonkeye ne, Bualu kai nuakasemena ha buihi ne musoko bua kuluangana? Kanuakamanya ne bakadi bela mikete anu ku lumbu lua musoko?

²¹ Wakashiha Abimeleke, muana wa Yelubesheta, nganyi? Mukashi wakadi ku mutu kua lumbu kakamutaha dibue dia mpelu, bua yeye wakafua mu Tebese, anyi? Bualu kai nuakasemena ha buihi ne lumbu nunku? Hashishe bûdi nʼabu mbua kuamba ne, Muntu webe, Uliya, Muena Hiti, wakafua kabidi.

²² Nunku messager wakaya, wakafika kudi Davidi, wakanumanyisha malu onso akamuambila Yoaba.

²³ Messager wakambila Davidi ne, Bantu aba bakamba kutuhita bakole; bakaluhuka kutudi mu madimi; tuakaluangana nʼabo tô ne ku mbelu kua tshibi tshia ku musoko.

²⁴ Bedi ba mikete bakela bantu bebe mikete ku mutu kua lumbu mene; bantu ba mukelenge bakuabo bakafua ne muntu webe Uliya, Muena Hiti, wakafua kabidi.

²⁵ Hashishe Davidi wakambila messager ne, Bûdi nʼabu mbua kuambila Yoaba ne, Bualu ebu kabunyingalashi mutshima webe, bualu bua muele wa nvita udi ushiha muntu ne muntu; anji kukolesha nvita yebe ku musoko, ubutule; ukoleshe mutshima wandi nunku.

²⁶ Hakunvua mukashi wa Uliya ne, Bayebe Uliya udi mufue, yeye wakashila bayandi madilu.

²⁷ Hakashika madilu, Davidi wakatuma bantu, bakalua nʼandi ku nsubu kuandi; yeye wakalua mukashi wandi, wakamulelela muana. Kadi bualu ebu buakenza Davidi kabuakasankisha mutshima wa Yehowa.