2 Samuele 1 - Mukanda wa Nzambi Dihungila Dikulukulu ne Dihungila Dihia-dihia 2003

Davidi Udi Unvua Lumu lua Lufu lua Shaula

¹ Ku nyima kua lufu lua Shaula, Davidi wakahingana ku dishiha dia Bena Amaleka, wakashikama mu musoko wa Sikelaga matuku abidi;

² hakatshiabu dituku disatu, mundi muhanduke mu tshitudilu tshia Shaula wakalua kudiye ne bilulu biandi bihandike ne buloba buela mu mutu muandi; hakafikeye kudi Davidi, yeye wakatua mpala wandi hanshi, wakamukukuila.

³ Davidi wakamuebesha ne, Wakufuma kudi kunyi? Yeye wakamukudimuna ne, Nakahanduka mu tshitudilu tshia Bena Isalele.

⁴ Davidi wakamuebesha ne, Bualu budi munyi? Ndi nkusengelela ne, Ubungambile. Yeye wakamuambila ne, Bantu bakanyema mu nvita ne bantu ba bungi bakafua; Shaula ne muanʼandi mulume Yonatana bakafua kabidi.

⁵ Davidi wakebesha nsongalume wakamuambila bualu ebu ne, Udi mumanye ne, Shaula ne muanʼandi mulume Yonatana bakafua munyi?

⁶ Nsongalume wakamuambila ne, Meme nakalua ku mukuna wa Gileboa ku mpukahuka, ne mona, Shaula wakadi mushindamine ku difuma diandi; ne mona, bena makalu ne bantu bakadi benda ha nyima ha tubalu bakadi bamutshintshimike ha buihi.

⁷ Hakatshungulukeye ku nyima, wakuntangila, wakambikila. Nakamukudimuna ne, Ndiku.

⁸ Wakangebesha ne, Wewe udi nganyi? Nakamukudimuna dî ne, Ndi Muena Amaleka.

⁹ Yeye wakangambila ne, Ndi nkusengelela ne, Wimane biebe aha, unshihe; mutshima wanyi udi unyingalala bualu bua ntshidi mushale ne muoyo.

¹⁰ Nunku nakimana ha buihi nʼandi, nakamushiha, bualu bua nakamanya bianyi ne, Yeye kena mua kuikala ne muoyo hakadishindeye hanshi nunku; nakangata tshifulu tshiandi tshia butumbi tshiakadi ku mutu kuandi ne lukanu lua ku diboko diandi, nakalua nʼabi kudi mukelenge wanyi.

¹¹ Hashishe Davidi wakakuata bilulu biandi, wakabihanda, bantu bonso bakadi nʼandi bakenza nunku kabidi;

¹² bakajinga Shaula ne muanʼandi mulume Yonatana ne bantu ba Yehowa ne Bena Isalele, bakajila bia kudia tô ne hakabuela diba, bualu bua bobo bakafua ku miele ya nvita.

¹³ Davidi wakebesha nsongalume wakamuambila bualu ebu ne, Wewe wakafuma kudi kunyi? Yeye wakamukudimuna ne, Ndi muenyi kunoko, ndi Muena Amaleka.

¹⁴ Davidi wakamuebesha ne, Wewe kuakutshina kulenga muntu wakela Yehowa manyi ha mutu bua kumushiha bua tshinyi?

¹⁵ Davidi wakabikila umue wa bansongalume bandi, wakamuambila ne, Semena ha buihi nʼandi, umushihe. Yeye wakamutua muele, ne yeye wakafua.

¹⁶ Davidi wakamuambila ne, Mashi ebe ikale ha mutu hebe bualu bua mukana muebe muakukuhisha, muamba ne, Nakashiha muntu wakela Yehowa manyi ha mutu.

Davidi Udi Ujinga Shaula ne Yonatana

¹⁷ Davidi wakajinga Shaula ne muanʼandi mulume Yonatana ne kujinga eku:

¹⁸ wakela mukenji bua kuyishabo Bena Yuda musambu wa buta bua mikete; monai, bakaufunda mu Mukanda wa Yashâ.

¹⁹ Butumbi buenu, Bena Isalele, buakashihibua ha mutu ha mikuna! Monai bu muakashihibua bena bukitu!

²⁰ Kabambi bualu ebu mu Gata, lumu elu kalumanyibu mu misesu ya Ashekelona; bua bana bakashi ba Bena Peleshete kabasanki, bua bana bakashi ba bantu badi kabayi batengula kabatambi bukole.

²¹ Nuenu, mikuna ya Gileboa, mume ne nvula kabinumatshidi, madimi kikadi ne bia kudia. Bualu bua bakimashaku ngabu wa muena bukitu, ngabu wa Shaula mene, bu muntu wakadi kayi ne manyi mela ha mutu.

²² Buta bua Yonatana kabuakahanga ku mashi a bantu bafue, anyi ku mafuta a bena bukitu, muele wa nvita wa Shaula kawakahingana hatuhu.

²³ Shaula ne Yonatana bakadi bakane, bakadi banyishibua kudi bantu mu mioyo yabo, kabakadi bahanduluke mu lufu luabo; bakahita nyunyu ya mikanku lubilu, bakatamba nyama ya ntambue bukole.

²⁴ Nuenu, bana bakashi ba Bena Isalele, nujinge Shaula, wakanuluatshisha bilulu bikunze bia mushinga mukole, wakalengesha bilulu bienu ne bintu bia or.

²⁵ Monai bu muakafua bena bukitu munkatshi mua nvita! Yonatana udi mushihibue ha mutu ha mikuna yenu.

²⁶ Mutshima wanyi udi munyingalale bualu buebe, muanʼetu Yonatana, wewe wakatamba kunsankisha; dinanga diebe kundi meme diakankemesha, diakahita dinanga dia bakashi bulengele.

²⁷ Monai bu mudi bena bukitu bashihibue, ne bintu bia nvita bijimishibue!