2 Bakalenga 8 - Mukanda wa Nzambi Dihungila Dikulukulu ne Dihungila Dihia-dihia 2003

Badi Bahingishila Mukashi wa ku Shunema Buloba Buandi

¹ Elisha wakambila mukashi, muena muana wakabisbeye ku lufu, ne, Juka, uye ne ba mu nsubu webe, ya ushikame kuonso kûdi mua kushikama, bualu bua Yehowa neatume tshiole mu buloba tô bidimu muanda mutekete.

² Mukashi wakajuka, wakenza bu muakadi dî dia muntu wa Nzambi; wakaya ne ba mu nsubu wandi, bakashikama mu buloba bua Bena Peleshete tô bidimu muanda mutekete.

³ Hakahita bidimu abi muanda mutekete, mukashi au wakafuma mu buloba bua Bena Peleshete; wakadila kudi mukelenge bua nsubu wandi ne bua buloba buandi.

⁴ Mukelenge wakadi uyikila ne Gehazi, muena mudimu wa muntu wa Nzambi, wakamuambila ne, Ndi nkusengelela ne, Ungambileku malu manene onso akenza Elisha.

⁵ Hakadiye umuambila muakabisha Elisha muana ku lufu, mukashi muena muana wakabisheye ku lufu wakadila kudi mukelenge bua nsubu wandi ne bua buloba buandi. Gehazi wakamba ne. Mukelenge wanyi, eu udi mukashi ne eu udi muana wandi wakabisha Elisha ku lufu.

⁶ Hakebesha mukelenge mukashi bualu ebu, yeye wakamuambilabu. Mukelenge wakambila umue wa ba tuhita tuandi ne, Umuhingishile bintu bionso biakadiye nʼabi diambedi ne bintu bionso biakadiunda mu madimi andi katshia umukamu tô ne katataka.

Hazaele Udi Ubuela mu Bukelenge bua Sulia

⁷ Elisha wakaya ku Damaseke. Bene-hadada, mukelenge wa Bena Sulia, wakadi usama; bakamuambila ne, Muntu wa Nzambi wakulua.

⁸ Mukelenge wakambila Hazaele ne, Wangate tshintu mu tshianza tshiebe, uye kusangakena ne muntu wa Nzambi; yeye ebeshe Yehowa bualu buanyi ne, Meme nensangale ku disama edi, anyi?

⁹ Nunku Hazaele wakaya kusangakena nʼandi, wakaya ne kuha kua bintu biakane bionso bia mu Damaseke bikumbane bujitu buakadi tumelo makumi anai mua kutuala, wakimana ku mesu kuandi, wakamba ne, Muanʼebe Benehadada, mukelenge wa Sulia, wakuntuma kûdi bua kukuebesha ne, Meme nensangale ku disama edi, anyi?

¹⁰ Elisha wakamuambila ne, Ya umuambile ne, Wewe neusangale bulelela, kadi Yehowa wakundesha ne, Yeye neafue bulelela.

¹¹ Yeye wakamutangila talalâ tô ne bakamukuata bundu. Muntu wa Nzambi wakadila.

¹² Hazaele wakamuebesha ne, Mukelenge wanyi, udi udidila tshinyi? Yeye wakamuambila ne. Bualu bua ndi mumanye malu mabi audi muenzele Bena Isalele; wewe newoshe misoko yabo idi ne ngumbu ne kahia, wewe neushihe bansongalume babo ku miele ya nvita, wewe neukosolole bana babo bakese bituha bituha, neuhande bakashi babo badi ne mafu.

¹³ Hazaele wakamba ne, Kadi muntu webe udi mbua bua yeye udi mua kuenza bualu ebu bunene, anyi? Elisha wakamuitaba ne, Yehowa wakundesha ne, Wewe newikale mukelenge ku mutu kua Bena Sulia.

¹⁴ Hashishe yeye wakumuka kudi Elisha, wakahingana kudi mukelenge wandi. Yeye wakamuebesha ne, Elisha wakukuambila tshinyi? Wakamuitaba ne, Yeye wakungambila ne, Wewe neusangale bulelela.

¹⁵ Hakatshiabu, Hazaele wakangata tshilulu tshia ha bulalu, wakatshina mu mai, wakatshibuikila ha mpala ha Bene-hadada tô ne hakafueye. Hazaele wakakokesha mu muaba wandi.

Bukokeshi bua Yeholama wa mu Yuda

¹⁶ Mu tshidimu tshitanu tshia bukelenge bua Yolama, muana wa Ahaba, mukelenge wa Isalele, hakadi Yehoshafata mukelenge wa Yuda, Yeholama, muana wa Yehoshafata, mukelenge wa Yuda, wakabanga kukokesha.

¹⁷ Wakadi ne bidimu makumi asatu ne bibidi hakabangeye kukokesha; wakakokesha mu Yelushalema bidimu muanda mukulu.

¹⁸ Yeye wakenda mu nshila ya hakelenge ba Isalele bu muakenza ba mu nsubu wa Ahaba, bualu bua muana wa Ahaba wakadi mukashi wandi; yeye wakenza malu mabi ku mesu kua Yehowa.

¹⁹ Kadi Yehowa wakabenga bua kubutula Bena Yuda, anu bualu bua muntu wandi Davidi, bualu bua wakamulaya bua kumushileye bana bandi muinda tshiendelele.

²⁰ Mu matuku andi Bena Edome bakatombokela Bena Yuda, bakadisunguila mukelenge.

²¹ Hashishe Yolama wakahitshila ku Saî ne makalu andi onso; bakabika butuku, bakashiha Bena Edome bakadi babanyunguluka ne tupitene tua makalu; bantu bakanyema ku ntenta yabo.

²² Nunku Bena Edome bakatombokela Bena Yuda tô ne ku difuku edi. Mu tshikondo atshi tshimue Bena Libena bakatomboka kabidi.

²³ Bienzedi bia Yolama biakenzeye kabiena bifunda mu mukanda wa kulondolola kua malu a bakelenge ba Yuda, anyi?

²⁴ Yolama wakalala tulu ne bankambua bandi, bakamujika ne bankambua bandi mu musoko wa Davidi. Ahazaya, muanʼandi, wakakokesha mu muaba wandi.

Bukokeshi bua Ahazaya

²⁵ Mu tshidimu tshia dikumi ne bibidi tshia bukelenge bua Yolama, muana wa Ahaba, mukelenge wa Isalele, Ahazaya, muana wa Yeholama, mukelenge wa Yuda, wakabanga kukokesha.

²⁶ Ahazaya wakadi ne bidimu makumi abidi ne bibidi hakabangeye kukokesha; wakakokesha mu Yelushalema tshidimu tshimue. Dina dia mamu wandi diakadi Atalaya, muana wa Omeli, mukelenge wa Isalele.

²⁷ Wakenda mu nshila wa ba mu nsubu wa Ahaba, wakenza malu mabi ku mesu kua Yehowa bu muakenza ba mu nsubu wa Ahaba, bualu bua yeye wakadi bayandi-tshina wa ba mu nsubu wa Ahaba.

²⁸ Yeye wakaya ne Yolama, muana wa Ahaba, bua kuluanganabo ne Hazaele, mukelenge wa Sulia, ku Lamota-gilada; Bena Sulia bakataha Yolama mputa.

²⁹ Mukelenge Yolama wakaya ku Yizelele bua kumuondahabo mputa yakamutaha Bena Sulia mu Lama, hakaluanganeye ne Hazaele, mukelenge wa Sulia. Ahazaya, muana wa Yeholama, mukelenge wa Yuda, wakayaku bua kutangila Yolama, muana wa Ahaba, mu Yizelele, bualu bua yeye wakadi usama.