2 Bakalenga 5 - Mukanda wa Nzambi Dihungila Dikulukulu ne Dihungila Dihia-dihia 2003

Nâmana Udi Wondahibua ku Nsudi Yandi

¹ Nâmana, kapitene ka masalayi a mukelenge wa Bena Sulia, wakadi muntu munene wa butumbi ku mesu kua mukelenge wandi, bualu bua Yehowa wakalesha Bena Sulia luhandu ku tshianza tshiandi; yeye kabidi wakadi muena bukitu, kadi wakadi muena nsudi.

² Diambedi Bena Sulia bakamuangalaka mu matunga, bakafuma ku buloba bua Isalele ne nsongakashi mukese bu muhika; yeye wakakuatshila mukashi wa Nâmana mudimu.

³ Yeye wakambila mukelenge wandi mukashi ne, Bu mukelenge wanyi muikale ne muprofete udi mu Samalea, yeye wakadi kumuondaha disama diandi dia nsudi.

⁴ Muntu mukuabo wakaya kudi mukelenge wandi, wakamuambila ne, Nsongakashi wa mu buloba bua Isalele udi Wamba mei nunku.

⁵ Mukelenge wa Sulia wakamba ne, Nentumine mukelenge wa Isalele mukanda. Bakaya ne ntalanta dikumi ya argent ne nshekele ya or binunu bisambombo ne bilulu dikumi bitambe buimpe.

⁶ Wakaya ne mukanda kudi mukelenge wa Isalele, wamba ne, Hawabala mukanda eu, Umanye ne, Nakakutumina muntu wanyi Nâmana, bua wewe kumuondaha disama diandi dia nsudi.

⁷ Hakabala mukelenge wa Isalele mukanda eu, wakahanda bilulu biandi, wakamba ne, Meme ndi Nzambi bua kushiha ne bua kubishangana ku lufu bua muntu eu udi untumina muntu wandi bua meme kumuondaha disama diandi dia nsudi, anyi? Ndi ngelangana meji ne, Yeye udi ukeba kuntekela diyoyo.

⁸ Hakunvua Elisha, muntu wa Nzambi, lumu ne, Mukelenge wa Isalele wakahanda bilulu biandi, yeye wakatumina mukelenge dî ne, Wakuhandila bilulu biebe tshinyi? Alue biandi kundi, amanye biandi ne muprofete udi mu Isalele.

⁹ Nunku Nâmana wakalua ne tubalu tuandi ne makalu andi, wakimana ku mbelu kua nsubu wa Elisha.

¹⁰ Elisha wakatuma messager wandi kudiye ne, Ya, wowe mai mu Yadene misangu muanda mutekete, musunyi webe neulue kûdi kabidi; wewe newikale muakane.

¹¹ Kadi Nâmana wakadi ne tshiji, wakasumba, wakamba ne, Nakuelangana meji ne, Bulelela, yeye neahatuke kundi, neimane, neabiele dina dia Yehowa, Nzambi wandi, nealenge tshianza tshiandi ha muaba udi usama, neangondahe nsudi.

¹² Abana ne Pâpâ, misulu ya mu Damaseke, kayena mihite mai onso a mu Isalele buakane, anyi? Tshiena mumanye mua kuowamu mai, ngikale muakane, anyi? Wakasumba ne tshiji tshikole.

¹³ Hashishe bantu bandi bakasemena ha buihi nʼandi, bakamukonka ne, Tatu wetu, bu muprofete mukuambile bua wewe kuenza bualu bunene, kuakadi kubuenza, anyi? Bualu budi butamba kukutonda muakuambeye ne, Wowe mai, wikale muakane, munyi?

¹⁴ Hashishe wakahueka, wakadila mu mai a Yadene misangu muanda mutekete bu muakadi dî dia muntu wa Nzambi; musunyi wakahingana bu wa muana mukese, wakadi muakane.

¹⁵ Nunku wakahingana kudi muntu wa Nzambi, yeye ne tshisumbu tshiandi tshionso, bakimana ku mpala kuandi; wakamuambila ne, Katataka ndi mumanye ne, Kakuena Nzambi mukuabo ha buloba buonso anu mu Isalele; nunku ndi nkusengelela ne, Wangate kuha kudi muntu webe.

¹⁶ Kadi Elisha wakamuambila ne, Bu mudi Yehowa ne muoyo, undi ngimana ku mpala kuandi, tshiena mua kukuangata. Yeye wakamusengelela, kadi yeye wakabenga.

¹⁷ Nâmana wakamba ne, Biwabenga, ndi nkusengelela ne, Bahe muntu webe maloba bu majitu adi mpunda ibidi mua kuambula; bualu bua muntu webe kena ufila mulambu kudi nzambi mukuabo, anu kudi Yehowa.

¹⁸ Nunku Yehowa abuikile bubi bua muntu webe mu bualu ebu: haya mukelenge wanyi mu nsubu wa Limona bua kutendelelamu, yeye utu washindamena ku tshianza tshianyi ne meme kabidi ntu ngatua mpala wanyi hanshi mu nsubu wa Limona; hashishe hanalua mpala wanyi hanshi mu nsubu wa Limona, Yehowa abuikidile muntu webe bualu bubi ebu.

¹⁹ Yeye wakamuambila ne, Ya biebe talalâ. Wakaya mu nshila wandi tshituha.

²⁰ Kadi Gehazi, muena mudimu wa Elisha, muntu wa Nzambi, wakamba ne, Mukelenge wanyi wakafuka Nâmana, Muena Sulia, luse, hakabengeye kuangata bintu biakalueye nʼabi; bu mudi Yehowa ne muoyo, nemmulonde, nengangate bintu kudiye.

²¹ Nunku Gehazi wakalonda Nâmana. Hakatangila Nâmana muntu wakadi umulonda, wakatuluka mu dikalu diandi bua kusangakeneye nʼandi, wakamuebesha ne, Malu kai?

²² Yeye wakamuitaba ne, Malu mimpe. Mukelenge wanyi wakuntuma kûdi bua kukuambila ne, Anu katataka bansongalume babidi ba bana ba baprofete ba ku mikuna ya Efelayima bakafika kundi; ndi nkusengelela ne, Bimpe ubampele ntalanta wa argent ne bilulu bibidi bitambe buimpe.

²³ Nâmana wakamuambila ne, Bimpe wangate ntalanta ibidi. Wakamutendekena, wakateka ntalanta ya argent ibidi mu bibombi bibidi ne bilulu abi bibidi, wakabiteka ha maha a bantu bandi babidi, bobo bakabituala ku mpala kua Gehazi.

²⁴ Hakafikabo ku mukuna, yeye wakabiangata mu bianza biabo, wakabiteka mu nsubu, wakahingisha bantu aba, bakaya.

²⁵ Yeye wakabuela mu nsubu, wakimana ku mesu kua mukelenge wandi, Elisha wakamuebesha ne, Gehazi, udi mufume kudi kunyi? Wakamuitaba ne, Muntu webe kakuya kuntu.

²⁶ Yeye wakamuambila ne, Mutshima wanyi kawakaya nʼebe, hakatuluka muntu mu dikalu diandi bua kusangakeneye nʼebe, anyi? Etshi ntshikondo tshia kuangata argent ne bilulu ne madimi a olive ne a tumuma tukese ne mikoko ne ngombe ne bena mudimu balume ne bena mudimu bakashi, anyi?

²⁷ Nsudi yakadi nʼai Nâmana neyikukuate wewe ne bana bebe tshiendelele. Wakumuka ku mesu kuandi ne nsudi hamʼbidi handi mitoke tô bu neige.