2 Bakalenga 22 - Mukanda wa Nzambi Dihungila Dikulukulu ne Dihungila Dihia-dihia 2003

Bukokeshi bua Yoshiya

¹ Yoshiya wakadi ne bidimu muanda mukulu hakabangeye kukokesha; wakakokesha mu Yelushalema bidimu makumi asatu ne tshimue. Dina dia mamu wandi diakadi Yedida, muana wa Adaya wa mu Bosakata.

² Wakenza malu mimpe ku mesu kua Yehowa, wakenda mu nshila yonso ya Davidi, nkambua wandi; kakasesuka ku tshianza tshia balume anyi ku tshianza tshia bakashi.

Badi Basangana Mukanda wa Mikenji

³ Mu tshidimu tshia dikumi ne muanda mukulu tshia bukelenge bua mukelenge Yoshiya, mukelenge wakatuma Shafana, muana wa Asalaya, muana wa Meshulama secrétaire mu nsubu wa Yehowa wamba ne,

⁴ Ya biebe kudi Hilekiya, muakuidi munene, bua yeye a bale argent yakafilabo mu nsubu wa Yehowa, yakasangisha balami ba ku mbelu kudi bantu;

⁵ bayifile mu bianza bia badi ku mutu kua mudimu wa mu nsubu wa Yehowa; bobo bayifile mu bianza bia bena mudimu badi balongolola miaba minya nguke mu nsubu wa Yehowa.

⁶ Bayifile kudi bena mabaya ne bibaki ba nsubu ne bahandi ba mabue, ne bua kusumba nʼai mabaya ne mabue masonga a kulongolola nʼau nsubu.

⁷ Kadi kababadi nʼabo argent yakafilabo mu bianza biabo, bualu bua bobo badi beyemenyibue.

⁸ Hilekiya muakuidi munene wakambila Shafana secrétaire ne, Nakusangana mukanda wa mikenji ya Mose mu nsubu wa Yehowa. Hilekiya wakafila mukanda mu bianza bia Shafana; yeye wakaubala.

⁹ Shafana secrétaire wakahingana kudi mukelenge, wakalua ne dî kudi mukelenge ne, Bantu bebe bakangata argent yakadi mu nsubu wa Yehowa, bakayifila mu bianza bia badi ku mutu kua bena mudimu mu nsubu wa Yehowa.

¹⁰ Shafana secrétaire wakambila mukelenge ne, Hilekiya, muakuidi munene, wakumpesha mukanda. Shafana wakaubala ku mpala kua mukelenge.

¹¹ Hashishe, hakunvua mukelenge mei a mu mukandu wa mikenji, yeye wakadihanda bilulu biandi.

¹² Mukelenge wakambila Hilekiya, muakuidi munene, ne Ahikama, muana wa Shafana, ne Akabo, muana wa Mikaya, ne Shafana secrétaire ne Asaya, muena mudimu wa mukelenge, ne,

¹³ Yai bienu, nutuebeshile ne Bena Yuda bonso Yehowa bua malu onso adi mafunda mu mukanda wakasanganabo; bualu bua Yehowa wakakuatshila tshiji tshikole bualu bua bankambua betu kabakatumikila mei adi mu mukanda eu bua kuenzabo malu onso adi mafunda bua bualu buetu.

¹⁴ Nunku Hilekiya, muakuidi munene, ne Ahikama ne Akabo ne Shafana ne Asaya bakaya kudi Huleda, muprofete mukashi, wakadi mukashi wa Shaluma, muana wa Tikewa, muana wa Hâhasa, mulami wa bilulu bia mukelenge; (yeye wakadi mushikame mu luseke luibidi lua mu Yelushalema); bakasomba nʼandi.

¹⁵ Yeye wakabambila ne, Yehowa, Nzambi wa Isalele, udi wamba ne, Nuambile muntu wakantuma kundi ne,

¹⁶ Yehowa udi wamba ne, Monai, meme nentume malu makole ku muaba eu ne kudi bena buloba abu bu mudi mei onso adi mafunda mu mukanda eu wakabala mukelenge wa Yuda.

¹⁷ Bualu bua bobo bakundekela, bakuoshila nzambi mikuabo musenga wa manananshi bua kunfuishabo tshiji ku bienzedi bia bianza biabo; nunku tshiji tshianyi netshikale, katshiena tshijima ku muaba eu nansha.

¹⁸ Kadi nuambile mukelenge wa Yuda wakanutuma bua nuenu kuebesha Yehowa ne, Yehowa, Nzambi wa Isalele, udi wamba ne, Bualu bua mei awakunvua,

¹⁹ wewe wakalekesha mutshima webe, wakadihuekesha ku mpala kua Yehowa; hawakunvua mei anakamba bua muaba eu ne bua bena muaba eu bua bobo balue bu bantu badi bedibue mulau ne badi babutudibue, wewe wakadihanda bilulu biebe, wakadila ku mpala kuanyi; nunku Yehowa udi wamba ne, Nakukunvuila.

²⁰ Nunku nenkusangishe ne bankambua bebe, wewe neubuele mu lukita luebe talalâ; mesu ebe kaena atangila malu mabi onso andi ngenzela muaba eu. Bakamanyisha mukelenge mei au.