2 Bakalenga 12 - Mukanda wa Nzambi Dihungila Dikulukulu ne Dihungila Dihia-dihia 2003

Bukokeshi bua Yoasha

¹ Mu tshidimu tshia muanda mutekete tshia bukelenge bua Yehu, Yoasha wakabanga kukokesha; wakakokesha mu Yelushalema bidimu makumi anai: dina dia mamu wandi diakadi Sibeya wa mu Besheba.

² Yoasha wakenza malu mimpe ku mesu kua Yehowa matuku andi onso akadi Yehoyada, muakuidi wa Nzambi, umuyisha.

³ Kadi yeye kakumusha bitendelelu bia ku mikuna; bantu batshivua bafila milambu ya kuosha ha kahia, batshivua bosha musenga wa manananshi ha mutu ha mikuna.

⁴ Yoasha wakambila bakuidi ba Nzambi ne, Argent yonso ya bintu bidibo balua nʼabi mu nsubu wa Yehowa bua kumujidilabi, ne argent yonso idibo bangata kudi muntu yonso hamubalabo, ne argent yonso idi bantu basue kufila mu nsubu wa Yehowa bua mitshima yabo,

⁵ bakuidi bitabushe bintu ebi kudi bana babo, balongolole miaba ya mu nsubu wa Yehowa yakashimbuka hanshi.

⁶ Kadi hakahita bidimu makumi abidi ne bisatu bia bukelenge bua Yoasha, bakuidi kabakanza kulongolola miaba ei.

⁷ Hashishe mukelenge Yoasha wakabikila Yehoyada ne bakuidi bakuabo bakadi nʼandi, wakabebesha ne, Bualu kai kanuena nulongolola miaba ei mishimbuke mu nsubu wa Yehowa? Kanuitabushi argent mikuabo kudi bana benu, kadi nuyifile bua kulongolola miaba ei idi mishimbuke mu nsubu wa Yehowa.

⁸ Bakuidi bakitabusha ne, Katuena tuangata argent kudi bantu kabidi, kadi katuena tulongolola miaba mishimbuke ya mu nsubu wa Yehowa.

⁹ Kadi Yehoyada muakuidi wakangata mushete munene, wakela tubulu mu tshibuiku tshiau, wakauteka ha buihi ne tshioshelu ku tshianza tshia balume tshia ku tshibi tshia mu nsubu wa Yehowa; bakuidi bakadi balama tshibi bakatekamu argent yonso yakatuabo nʼai mu nsubu wa Yehowa.

¹⁰ Hakamanyabo ne argent ya bungi idi mu mushete, secrétaire wa mukelenge ne muakuidi munene bakatua ne bibombi, bakabala argent yakadi mu nsubu wa Yehowa.

¹¹ Bakafila argent yakabalabo mu bianza bia bena mudimu ne mu bianza bia bantu bakadi balama nsubu wa Yehowa; bakahita nʼai bena mabaya ne bibaki ba nsubu bakadi benza mudimu wa nsubu wa Yehowa,

¹² ne bena tushola ne basongi ba mabue; bakasumba nʼai mabaya ne mabue masonga ne bintu bionso bia kulongololabo nʼabi miaba mishimbuke mu nsubu wa Yehowa.

¹³ Kadi kabakenza nʼai makoho a argent ne bijimishi bia minda ne malonga ne mpungi; kabakenza tshintu tshia argent anyi tshia or ku argent yakaluabo nʼai mu nsubu wa Yehowa;

¹⁴ kadi bakayifila anu kudi bakenza mudimu ne bakalongolola nʼai nsubu wa Yehowa.

¹⁵ Kabakalonda dibala dia argent kudi bafutshi ba bena mudimu eu, bualu bua bakadi mua kueyemenyibua.

¹⁶ Kabakalua ne argent yakangatabo ku milambu ya bisambukidi ne ku milambu ya kubuikila nʼai mibi mu nsubu wa Yehowa; ei yakadi ya bakuidi.

¹⁷ Mu tshikondo atshi Hazaele, mukelenge wa Sulia, wakaya kuluangana ne bena musoko wa Gata, wakaunyenga; Hazaele wakatangila mpala wandi bua kuyeye ku Yelushalema.

¹⁸ Yoasha, mukelenge wa Yuda, wakangata bintu bia tshijila wakafila Yehoshafata ne Yeholama ne Ahazaya batatu bandi, bakelenge ba Yuda, mu nsubu wa Yehowa, ne bintu bionso biakajidileye ne biamu bia or bionso biakadi mu bibutshilu bia mu nsubu wa Yehowa ne bia mu nsubu wa mukelenge, wakabituma kudi Hazaele, mukelenge wa Sulia; nunku yeye wakumuka ku Yelushalema.

¹⁹ Bienzedi bia Yoasha bikuabo ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi?

²⁰ Bantu ba Yoasha bakabika, bakamuelela tshifufu, bakamutaha mputa ku nsubu wa Milo, wa mu nshila wa ku Sila.

²¹ Bualu bua Yozakâ, muana wa Shimeta, ne Yehozabada, muana wa Shomê, bantu bandi bakamutaha mputa; wakafua. Bakamujika ne bankambua bandi mu musoko wa Davidi; Amasaya, muanʼandi, wakakokesha mu muaba wandi.