1 Samuele 9 - Mukanda wa Nzambi Dihungila Dikulukulu ne Dihungila Dihia-dihia 2003

Shaula Udi Usungudibua Mukelenge

¹ Muena Benyamina wakadiku dina diandi Kishi, muana wa Abiele, muana wa Selô, muana wa Bekolata, muana wa Afia, muana wa Muena Benyamina, wakadi biandi muntu mukole mene mene.

² Wakadi ne muana wa balume, dina diandi Shaula, wakadi nsongalume muakane; munkatshi mua Bena Isalele kamuakadi muntu mukuabo wakamuhita bulengele; wakahia bantu bakuabo bule ku makaya andi ne ku mutu.

³ Nyama ya mpunda ya Kishi, tatu wa Shaula, yakajimina. Kishi wakambila muanʼandi Shaula ne, Wangate umue wa bena mudimu, aye nʼebe: jukai, nuye kukeba nyama ya mpunda.

⁴ Bakendakana ku mikuna ya Efelayima, bakahitshila ku buloba bua Shalisha, kadi kabakayimona; bakahitshila ku buloba bua Shâlima, kadi kayakadiku; bakahitshila ku buloba bua Benyamina, kadi kabakayimona.

⁵ Hakafikabo ku buloba bua Sufa, Shaula wakambila muena mudimu wandi wakadi nʼandi ne, Lua, tuhingane, tatu nealekele kunyingalasha mutshima bualu bua nyama ya mpunda, neabange kunyingalasha mutshima bualu buetu.

⁶ Yeye wakamuambila ne, Mona, mu musoko eu mudi muntu wa Nzambi, bantu bonso badi bamutumbisha; malu onso adiye wamba adi alua malelela; tuye bietu kudiye, yeye atujinguluile ku luendu kutuyaya.

⁷ Shaula wakambila muena mudimu wandi ne, Mona, bituaya, netutuadile muntu au tshinyi? Bualu bua bidia bionso bia mu mishete yetu biakashika, katuena ne matabisha a kuha muntu wa Nzambi; tudi ne tshintu kai?

⁸ Muena mudimu wakambila Shaula ne, Mona, ndi ne tshituha tshinai tshia nshekele wa argent mu tshianza tshianyi; nentshihe muntu wa Nzambi bua kutumanyisheye nshila wetu.

⁹ (Kale kale mu Isalele hakaya muntu bua kukonkeye Nzambi bualu, wakadi wamba ne, Tuye bietu kudi mumonyi wa malu: bualu bua udibo babikila muprofete katataka, diambedimbedi bakadi bamubikila mumonyi wa malu.)

¹⁰ Shaula wakambila muena mudimu wandi ne, Mbimpe, lua, tuye; bakabuela mu musoko muakadi muntu wa Nzambi.

¹¹ Hakadibo babanda mu mukuna wa ku musoko, bakasangila ne bansongakashi baye kusuna mai, bakabakonka ne, Mumonyi wa malu udiku, anyi?

¹² Bakabakudimuna di ne, E, udiku; monai, udi ku mpala kuenu, endeshai mpindiu, bualu bua yeye wakalua ku musoko anu lelu; bantu badi ne bualu bua kufilabo milambu lelu ku mutu kua mukuna.

¹³ Hanuabuela mu musoko, hashishe numukebe diambedi yeye kayi muanze kuya ku mukuna bua kudieye bidia: bualu bua bantu kabena badia bidia diambedi yeye kayi muanze kulua, bualu bua yeye udi uvudishila milambu yabo disanka, hashishe bantu bakabikilabo badi badia bidia. Nunku nuye bienu bualu bua nenumusangane ha diba edi.

¹⁴ Nunku bakaya ku musoko: hakambabo kubuela mu musoko, Samuele wakasungila nʼabo bua kuyeye ku mutu kua mukuna.

¹⁵ Yehowa wakamana kusokoluela Samuele dituku dia ku mpala kua Shaula kayi muanze kulua, wamba ne,

¹⁶ Makelela ha diba edi mene nenkutumine muntu mufume ku buloba bua Benyamina ne wewe neumuele manyi ha mutu handi bua kuikaleye mukelenge wa bantu banyi Bena Isalele; yeye neasungile bantu banyi mu bianza bia Bena Peleshete; bua nakatangila bantu banyi bualu bua muadi wabo wakufika kundi.

¹⁷ Hakatangila Samuele Shaula, Yehowa wakamuambila ne, Mona muntu unakukuambila, kayeye au! Yeye mene neakokeshe bantu banyi.

¹⁸ Hashishe Shaula wakasemena ha buihi ne Samuele ku tshibi, wakamuebesha ne, Ndi nkusengelela ne, Ungambile kudi nsubu kua mumonyi wa malu.

¹⁹ Samuele wakakudimuna Shaula dî ne, Meme ndi mumonyi wa malu; ya ku mpala kuanyi ku mukuna bualu bua bûdi nʼabu mbua kudia nʼanyi bidia lelu; kadi hatshiabu nenkutume, nenkuambile malu onso adi mu mutshima webe.

²⁰ Kadi kunyingalashi mutshima bualu bua nyama ya mpunda yakadi mijimine matuku asatu ahitshi, bualu bua hakamana kuyisangana. Mitshima ya Bena Isalele bonso idi kudi nganyi? Kenkûdi ne kudi bonso ba mu nsubu wa tatu webe, anyi?

²¹ Shaula wakamukudimuna dî ne, Meme tshiena Muena Benyamina, tshisamba tshidi tshihita bisamba bionso bia Bena Isalele bukese, anyi? Diku dianyi kadiena dihita meku onso a tshisamba tshia Benyamina bubale, anyi? Udi ungambila meme malu au munyi?

²² Samuele wakangata Shaula ne muena mudimu wandi, wakaya nʼabo mu nsubu wa tshiala benyi, wakabashiha mu miaba ya butumbi munkatshi mua bantu bonso bakabikilabo bua kudia, bakadi bantu makumi asatu.

²³ Samuele wakambila mulambi ne, Lua ne tshituha tshinakukuha, tshinakukuambila ne, Utshiteke.

²⁴ Mulambi wakangata tshibelu ne biakadihu, wakatshiteka ku mesu kua Shaula. Samuele wakamuambila ne, Mona, tshintu tshiakakushilabo, utshiteke ku mesu kuebe, utshidi; tshiakadi tshikutekela tô ne ku diba edi, bualu bua meme nakamba ne, Nakabikila bantu. Nunku Shaula wakadia ne Samuele dituku adi.

²⁵ Hakafumabo ku mutu kua mukuna, bakahingana ku musoko, yeye wakasomba ne Shaula ha mutu ha nsubu.

²⁶ Bakabika hatshiatshia honso: hakatshiabu, Samuele wakabikila Shaula ha mutu ha nsubu, wamba ne, Juka, bua meme nkutume. Shaula wakajuka, bubidi buabo bakahatuka, yeye ne Samuele.

²⁷ Hakambabo kufika kunfudilu kua musoko, Samuele wakambila Shaula ne, Ambile muena mudimu webe ahite ku mpala kuetu (ne yeye wakahita), kadi wimane biebe bua meme kutunyuisha mei a Nzambi.