1 Samuele 7 - Mukanda wa Nzambi Dihungila Dikulukulu ne Dihungila Dihia-dihia 2003

¹ Bena Kîyata-yalima bakatua, bakangata mushete wa Yehowa, bakaya nʼau ku nsubu wa Abinadaba ku mukuna: bakajidila Eleazâ, muanʼandi mulume, bua kulameye mushete wa Yehowa.

² Mushete wa Yehowa wakashala mu Kîyata-yalima tô musangu mule bu bidimu makumi abidi; Bena Isalele bonso bakadila muadi kudi Yehowa.

Samuele, Mulumbuluishi wa Bena Isalele

³ Samuele wakambila Bena Isalele bonso ne, Binuasua kuhingana kudi Yehowa ne mitshima yenu yonso, nunku numushe nzambi ya bende ne ya Bashela munkatshi muenu, kudimunai mitshima yenu kudi Yehowa, numukuatshile yeye nkayandi mudimu; ne yeye neanusungile mu bianza bia Bena Peleshete.

⁴ Nunku Bena Isalele bakumusha nzambi ya Babâla ne ya Bashela munkatshi muabo, bakakuatshila anu Yehowa mudimu.

⁵ Samuele wakamba ne, Bena Isalele bonso badisangishile ku Misepa, meme nennulombele Yehowa.

⁶ Bakadisangisha ku Misepa, bakasuna mai, bakâhongolola ku mesu kua Yehowa, bakajila bia kudia dituku adi, bakamba ne, Tuakuenzela Yehowa bibi. Samuele wakalumbulula Bena Isalele mu Misepa.

⁷ Hakunvua Bena Peleshete ne Bena Isalele bakadisangisha mu Misepa, bakelenge ba Bena Peleshete bakaya kuluisha Bena Isalele. Hakunvua Bena Isalele lumu elu, bakatshina Bena Peleshete.

⁸ Bena Isalele bakambila Samuele ne, Kulekedi kutulombela Yehowa, Nzambi wetu, bua yeye atusungile mu bianza bia Bena Peleshete.

⁹ Samuele wakangata muana wa mukoko utshivua wamua mabele, wakamufila bu mulambu wa kuosha mujima ha kahia kudi Yehowa; Samuele wakalombela Bena Isalele Yehowa bikole; Yehowa wakamunvuila.

¹⁰ Hakatshidi Samuele ufila mulambu wa kuosha, Bena Peleshete bakafika ha buihi bua kuluanganabo ne Bena Isalele; Yehowa wakakunguishila Bena Peleshete mikungulu mikole, wakabatatshisha dituku adi, nunku bakashihibua kudi Bena Isalele.

¹¹ Bena Isalele bakumuka ku Misepa, bakalonda Bena Peleshete, bakabashiha tô ne hakafikabo ku Bete-kâ.

¹² Hashishe, Samuele wakangata dibue, wakadimanyika hankatshi ha Misepa ne Shene, wakaditeka dina ne, Ebene-ezê, Wamba ne, Yehowa wakaluatshisha tô ne lelu.

¹³ Nunku Bena Peleshete bakadi batambibue bukole, kabakahitshila ku mikalu ya Bena Isalele kabidi; tshianza tshia Yehowa tshiakaluisha Bena Peleshete matuku onso a Samuele.

¹⁴ Bena Peleshete bakahingishila Bena Isalele misoko yabo yakanyengabo ku Ekelona tô ne ku Gata; Bena Isalele bakumusha mikalu yabo mu bianza bia Bena Peleshete. Ditalala diakadi hankatshi ha Bena Isalele ne Bena Amole.

¹⁵ Samuele wakalumbulula Bena Isalele matuku onso a muoyo wandi.

¹⁶ Ku tshidimu ku tshidimu yeye wakendakana ku luseke alu ku Betele ne Gilegala ne Misepa: wakalumbulula Bena Isalele mu misoko ei yonso.

¹⁷ Wakadi uhingana ku Lama bualu bua nsubu wandi wakadiku: wakalumbululaku Bena Isalele, wakashilaku Yehowa tshioshelu.