1 Samuele 4 - Mukanda wa Nzambi Dihungila Dikulukulu ne Dihungila Dihia-dihia 2003

¹ Dî dia Samuele diakafika kudi Bena Isalele bonso. Bena Isalele bakaya bua kuluangana mata ne Bena Peleshete, bakatula tshitudilu tshiabo hehi ne Ebene-ezê; Bena Peleshete bakatula tshitudilu tshiabo mu Afeka.

Bena Peleshete Badi Banyenga Mushete wa Tshihungidi

² Bena Peleshete bakabanga kuluangana ne Bena Isalele; hakaluanganabo, Bena Isalele bakadi batambibue kudi Bena Peleshete, bakashiha bena nvita ba Bena Isalele bu binunu binai.

³ Kakahingana bantu ku tshitudilu, bakulu ba mu Isalele bakakonkangana ne, Yehowa wakatushiha lelu ku mesu kua Bena Peleshete bualu kai? Tuyai, tuangate mushete wa tshihungidi tshia mei a Yehowa ku Shilo, ulue munkatshi muetu bua kutusungilau ku tshianza tshia badi nʼetu lukuna.

⁴ Nunku bantu bakatuma dî ku Shilo, bakalua ne mushete wa tshihungidi tshia mei a Yehowa, utu washikama ku mutu kua bakeluba: bana ba balume babidi ba Eli, Hofeni ne Pinehasa bakadiku ne mushete wa tshihungidi tshia mei a Nzambi.

⁵ Hakalua mushete wa tshihungidi tshia mei a Yehowa mu tshitudilu, Bena Isalele bakela mbila bikole; nunku buloba buakamba kunyunga.

⁶ Hakunvua Bena Peleshete tshiona tshia mbila yabo, bobo bakakonkangana ne, Tshiona tshia mbila idi mu tshitudilu tshia Bena Ebelu ntshia tshinyi? Bakajingulula ne mushete wa tshihungidi tshia mei a Yehowa wakalua mu tshitudilu.

⁷ Bena Peleshete bakatshina, bakamba ne, Nzambi wakalua mu tshitudilu. Bakamba ne, Mulau wakutukuata! Kaluakadi ne bualu nunku diambedi.

⁸ Mulau wakutukuata! Nganyi watusungila mu bianza bia nzambi ei ya bakole? Ei nnzambi yakashiha Bena Ejipitu ne makenga makole mu tshihela.

⁹ Nuenu Bena Peleshete, koleshai mitshima, nutantamane bu balume mene, bua nuenu kanuikadi bahika ba Bena Ebelu bu muakadibo bahika benu; nutantamane bu balume mene, nuluangane bikole.

¹⁰ Bena Peleshete bakaluangana, bakahita Bena Isalele bukole: muntu yonso wakanyema lubilu ku ntenta wandi; ba bungi bakafua, bualu bua bakashiha Bena Isalele bakadi benda ku makasa binunu makumi asatu.

¹¹ Bakanyenga mushete wa Nzambi, bana ba balume babidi ba Eli, Hofeni ne Pinehasa, bakashihibua.

¹² Muena nvita wa mu tshisamba tshia Benyamina wakaya lubilu, Wakafika ku Shilo dituku adi mene ne bilulu biandi bionso bihandika ne buloba buela mu mutu.

¹³ Hakafikeye, Eli wakadi mushikame mu nkuasa kukala kua nshila, mutentekele; mutshima wandi wakadi ukanka bua mushete wa Nzambi. Hakafika muntu eu ku musoko, ne hakambeye bualu ebu, bena musoko bonso bakadila bikole.

¹⁴ Hakunyua Eli tshiona tshia madilu abo, wakakonka ne, Tshiona tshia madilu au ntshia tshinyi? Muntu wakalua lubilu, wakambila Eli.

¹⁵ Eli wakadi ne bidimu makumi tshitema ne muanda mukulu, mesu andi akavua bileshileshi, yeye kakadi mua kutangila bilengele.

¹⁶ Muntu eu wakambila Eli ne, Meme nyeye wakahanduka, wakanyema munkatshi mua bena nvita lelu. Eli wakamukonka ne, Bualu bishi mbuenjibue, muanʼanyi?

¹⁷ Muntu wakadi ulua ne lumu wakamuambila ne, Bena Isalele bakatshimuka ku mesu kua Bena Peleshete: bakashiha bantu ba bungi, ne bana bebe ba balume babidi, Hofeni ne Pinehasa, bakafua; bakanyenga mushete wa Nzambi kabidi.

¹⁸ Hashishe, hakambeye dî bua mushete wa Nzambi, Eli wakadishinda bualame ku mpenge kua tshibi, nshingu wandi waka tshihuka, wakafua, bualu bua yeye wakadi muntu mununu ne wa bujitu. Wakamana kulumbulula Bena Isalele bidimu makumi anai.

¹⁹ Mukashi wa muanʼandi Pinehasa wakadi ne difu, kulela kuandi kuakadi ha buihi. Hakunvueye lumu ne, Bakanyenga mushete wa Nzambi ne lua lufu lua tatuʼandi-muenu ne lua lufu lua bayandi kabidi, yeye wakatantamana, wakalela bualu bua kanyinganyinga kakamukuata.

²⁰ Hakambeye kufua, bakashi bakadi bimana ha buihi nʼandi bakamuambila ne, Kutshinyi, bualu bua wewe wakulela muana wa balume. Kadi yeye kakaha kudimuna dî, bakajingulula bualu ebu.

²¹ Wakidika muana dina ne, Ikaboda, wamba ne, Butumbi buakumuka kudi Bena Isalele; bualu bua bakanyenga mushete wa Nzambi ne bualu bua tatuʼandi-muenu ne bua bayandi kabidi.

²² Wakamba ne, Butumbi bua Bena Isalele buakabumuka: bualu bua mushete wa Nzambi udi munyengibue.