1 Samuele 30 - Mukanda wa Nzambi Dihungila Dikulukulu ne Dihungila Dihia-dihia 2003

Davidi Udi Utamba Bena Amaleka Bukole

¹ Hakahita matuku asatu, Davidi ne bantu bandi bakafika ku Sikelaga; Bena Amaleka bakadi bafuma ku Sude, bahaula bintu, bakabutula Sikelaga, bakawosha ne kahia;

² bakakuata bakashi bu bahika ne bonso bakadimu, ne banene ne bakese; kabakashiha umue wabo, bakabatuala, bakaya nʼabo.

³ Nunku bakafika Davidi ne bantu bandi ku musoko, monai, musoko wakadi muoshibue ne kahia, ne bakadi bakuata bakashi babo ne bana babo balume ne bana babo bakashi bu bahika.

⁴ Hashishe Davidi ne bantu bandi bakabisha mei abo, bakadila tô ne hakahangabo mua kudila.

⁵ Bakashi babidi ba Davidi, Abinoama, Muena Yizelele, ne Abigayila, Muena Kâmele, wakadi mukashi wa Nabala diambedi, bakadi bakuatshibue bu bahika.

⁶ Davidi wakanyingalala bikole; bualu bua bantu bakadi bahunga dî bua kumukuma mabue; mitshima ya buonso buabo yakanyingalala bua bana babo balume ne bana babo bakashi; kadi Davidi wakadikolesha mu Yehowa, Nzambi wandi.

⁷ Davidi wakambila Ebeyatâ muakuidi, muana wa Ahimeleke ne, Ndi nkusengelela ne, Ulue kundi ne efoda. Ebeyatâ wakalua kudi Davidi ne efoda.

⁸ Davidi wakebesha Yehowa ne, Binalonda tshisumbu etshi mu nshila, nembahete, anyi? Yeye wakamukudimuna ne, Ubalonde, wewe neubahete, kuena uhanga kuhingisha bintu bionso.

⁹ Davidi wakaya, yeye ne bantu bandi nkama isambombo bakadi nʼandi tô ne hakafikabo ku kasulu ka Besô, kuakashala bantu bakuabo ku nyima.

¹⁰ Kadi Davidi ne bantu bandi nkama mai bakabalonda; kadi bantu bandi nkama ibidi bakashala ku nyima; bakatamba kuhanga, kabakamanya mua kusabuka kasulu ka Besô.

¹¹ Bakasangana Muena Ejipitu mu budimi, bakatua nʼandi kudi Davidi, bakamuha bintu bia kudia, wakadia; bakamunuisha mai;

¹² bakamuha tshisumbu tshia nfigi ne bisumbu bia tumuma tukese tume bibidi: hakadieye bintu ebi, muoyo wandi wakahingana kudiye, bualu bua kakadia tshintu, kakanua mai tô minya isatu ne matuku asatu.

¹³ Davidi wakamuebesha ne, Wewe udi muntu wa nganyi? Wakufuma kudi kunyi? Yeye wakamukudimuna dî ne, Ndi Muena Ejipitu, muhika wa Muena Amaleka; mukelenge wanyi wakashiya bualu bua disama diakankuata matuku asatu mahite.

¹⁴ Tuakahaula bintu ku luseke lua Sude lua Bena Kelete ne lua Bena Yuda ne lua Kaleba; luakosha Sikelaga ne kahia.

¹⁵ Davidi wakamukonka ne, Wewe neutulombole kudi tshisumbu etshi, anyi? Yeye wakamuambila ne, Biwaditshiha kundi mu dina dia Nzambi ne, Tshiena nkushiha, tshiena nkufila mu bianza bia mukelenge webe, nennulombole kudi tshisumbu etshi.

¹⁶ Hakalueye nʼabo kudibo, monai, bakadi bamuangalaka buloba buonso, bakadi badia bidia, bakadi banua, bakadi baja maja bualu bua bungi bua bintu biakahaulabo mu buloba bua Bena Peleshete ne mu buloba bua Bena Yuda.

¹⁷ Davidi wakabashiha ku dilolo adi tô ne ku dilolo dia dituku dikuabo; nansha umue wabo wakahanduka anu bansongalume nkama mai bakadi babanda ha nyima ha tumelo bakanyema.

¹⁸ Davidi wakasungila bintu bionso biakanyenga Bena Amaleka; wakasungila bakashi bandi babidi kabidi.

¹⁹ Kabakajimisha tshintu nansha tshinene nansha tshikese, nansha muana mulume nansha muana mukashi, nansha tshintu tshimue tshiakanyengabo; Davidi wakahingisha bionso.

²⁰ Davidi wakangata bisumbu bia mikoko ne bia ngombe biakahita ha mutu, wakamba ne. Ebi mbiakahaula Davidi.

²¹ Davidi Wakafika kudi bantu nkama ibidi bakadi bahanga ne kabakamanya mua kulonda Davidi bakasuabo ku kasulu ka Besô; bakajila kusangila ne Davidi ne bantu bakadiye nʼabo; bakafika Davidi ha buihi ne bantu, yeye wakabela muoyo.

²² Hashishe bena lukinu ne bena mampaka bonso ba bakadi baya ne Davidi bakamba ne, Bualu bua bantu aba kabakaya nʼetu, katuena tubaha nansha tshintu tshikese tshia bintu bi tuakanyenga anu kuhingashila muntu yonso mukashi wandi ne bana bandi bua yeye aye nʼabo, bumuke.

²³ Hashishe Davidi wakamba ne, Kanuena mua kuenza nunku, bana betu, ne bintu biakatuha Yehowa, wakatusungila, wakafila tshisumbu tshia bantu tshiakulua kutuluisha mu bianza bietu.

²⁴ Nganyi neunvuile mei enu ku bualu ebu? Bualu bua bu mudi tshituha tshia muntu wakaya mu nvita mbu mudi tshituha tshia muntu wakashala kulama bintu: nebabanyangane bintu muomumue.

²⁵ Nunku ku dituku adi wakajadika mei â bu mukenji mufunda ne mujalame kudi Bena Isalele tô ne ku dituku edi.

²⁶ Hakafika Davidi ku Sikelaga, yeye wakatuma tshituha tshia bintu biakanyengeye kudi bakulu ba mu Yuda ne kudi balunda bandi; wakabambila ne, Monai diha dienu dia mu biakanyengabo kudi bena lukuna ba Yehowa.

²⁷ Wakatuma bintu kudi bakadi mu Betele, ne bakadi mu Lamota lua ku Sude ne bakadi mu Yati,

²⁸ ne bakadi mu Aloê ne bakadi mu Sifemota ne bakadi mu Eshetemoa,

²⁹ ne bakadi mu Lakala ne bakadi mu misoko ya Bena Yelamela ne bakadi mu misoko ya Bena Kene,

³⁰ ne bakadi mu Hôma ne bakadi mu Bô-ashana ne bakadi mu Ataka,

³¹ ne bakadi mu Hebelone ne mu miaba yonso yakadi Davidi ne bantu bandi bashikamashikama.