1 Samuele 24 - Mukanda wa Nzambi Dihungila Dikulukulu ne Dihungila Dihia-dihia 2003

Davidi Udi Ulama Muoyo wa Shaula ku Ene-gedi

¹ Hakahingana Shaula ku mata ya ku Bena Peleshete, bakamuambila ne, Mona, Davidi udi mu tshihela tshia Ene-gedi.

² Hashishe Shaula wakasungula bantu binunu bisatu munkatshi mua Bena Isalele bonso, bakaya kukeba Davidi ne bantu bandi munkatshi mua mabue akadi mbushi ya mu mpata yendelahu.

³ Yeye Wakafika ku mpangu ya mikoko yakadi mu nshila: lubuebue luakadiku, Shaula wakabuelamu bua kubuikileye makasa andi. Davidi ne bantu bandi bakadi basokome mu luseke lukuabo lua lubuebue elu.

⁴ Bantu ba Davidi bakamuambila ne, Mona, dituku diakakuambila Yehowa ne, Mona neufile muena lukuna webe mu tshianza tshiebe, diakufika; wewe umuenzele bu mûdi umona ne mbimpe. Hashishe Davidi wakajuka, wakakosa tshihesa tshia tshikowelu tshia Shaula mu musokoko.

⁵ Ku nyima mutshima wa Davidi wakanyingalala bualu bua yeye wakakosa tshihesa tshia tshikowelu tshia Shaula.

⁶ Davidi wakambila bantu bandi ne, Yehowa ampidishe tshienzedi mukelenge wanyi, wakela Yehowa manyi ha mutu, bualu ebu, tshiolodi tshianza tshianyi kudiye, bualu bua yeye udi muntu muedibue manyi kudi Yehowa.

⁷ Nunku Davidi wakahanda bantu bandi ne mei â; kakitabusha bua bobo kuluangana ne Shaula. Shaula wakabika, wakumuka mu lubuebue, wakaya mu nshila wandi.

⁸ Hashishe Davidi wakabika, wakaluhuka mu lubuebue, wakela dî kudi Shaula ne. Mukelenge wanyi. Hakatshunguluka Shaula, Davidi wakatua mpala wandi hanshi, wakamukukuila.

⁹ Davidi wakambila Shaula ne, Bualu kai wewe wakitabusha mei a bantu ne, Davidi udi ukeba kukuenzela bibi?

¹⁰ Mona, lelu mesu ebe adi amona bu mutu Yehowa mukufile mu tshianza tshianyi mu lubuebue; bakuabo bakungambila ne, Umushihe. Kadi nakamba ne, Tshiena ndenga mukelenge wanyi tshianza, bualu bua yeye udi muedibue manyi kudi Yehowa.

¹¹ Bualu bukuabo, tatu wanyi, tangila ne tshihesa tshia tshikowelu tshiebe tshidi mu tshianza tshianyi; bualu bua meme nakukosa tshikowelu tshiebe, tshiakukushiha, nunku umanye biebe ne, Kakuena bualu bubi mu tshianza tshianyi: tshiakukuenzela bibi, kadi wewe ngûdi ukeba muoyo wanyi bua kûnyenga.

¹² Yehowa atulumbuluishe hankatshi hetu nʼebe, Yehowa ansombuele bualu buebe, kadi tshianza tshianyi katshiena tshikala kudi.

¹³ Lusumuinu lua bankambua betu ludi luamba ne, Bualu bubi budi bufuma kudi bantu babi; katu tshianza tshianyi katshiena tshikulenga nansha.

¹⁴ Mukelenge wa Isalele udi ukeba nganyi? Wewe udi ulonda neanyi? Udi ukeba mbua mulue, anyi mukenya!

¹⁵ Nunku Yehowa ikale mulumbuluishi, akose tshilumbu tshidi hankatshi hetu nʼebe Yehowa atangile, akule bualu buanyi, ansungile mu tshianza tshiebe.

¹⁶ Hakashikisha Davidi kuambila Shaula mei â onso, Shaula wakakonka ne, Muanʼanyi Davidi, edi ndi diebe, anyi? Shaula wakabandisha dî diandi, wakadila.

¹⁷ Yeye wakambila Davidi ne, Wewe udi untambe meme buimpe: wewe wakungenzela anu malu mimpe, kadi meme nakukuenzela wewe malu mabi.

¹⁸ Wewe wakungambila bu muwakungenzela bimpe lelu, bualu bua hakuila Yehowa mu tshianza tshiebe, kuakunshiha nansha.

¹⁹ Basangana mundi muena lukuna wandi, neumulekele aye, anyi? Nunku Yehowa akufute bimpe bua bualu buwakungenzela lelu.

²⁰ Katataka ndi mumanye ne, Wewe newikale mukelenge bulelela ne bukelenge bua Isalele nebujadikibue mu tshianza tshiebe.

²¹ Nunku uditshihe kundi ku mesu kua Yehowa ne, Kuena ushiha bana banyi badi balonda ku nyima, ne kuena ujimisha dina dianyi munkatshi mua nsubu wa tatu wanyi.

²² Davidi wakaditshiha kudi Shaula. Shaula wakahingana kuandi, katu Davidi ne bantu bandi bakaya ku musoko wa lumbu.