1 Samuele 21 - Mukanda wa Nzambi Dihungila Dikulukulu ne Dihungila Dihia-dihia 2003

Davidi Udi Unyema Shaula

¹ Davidi wakaya ku Nobo kudi Ahimeleke, muakuidi wa Nzambi. Ahimeleke wakalua kuakidila Davidi, wenda uzakala; wakamuebesha ne, Muwakulua mukuabo kayi nʼebe mmunyi?

² Davidi wakambila Ahimeleke muakuidi ne, Mukelenge wakuntuma bua mudimu wandi: yeye wakungambila ne, Kumanyishi muntu bua mudimu unakakutumina anyi bua mei anakakuambila; nakamana kutuma bantu ku muaba ne ku muaba.

³ Udi ne tshinyi mu tshianza tshiebe? Umpe mitanda ya bidia itanu mu tshianza tshianyi, anyi bintu bikuabo biudi nʼabi.

⁴ Muakuidi wakambila Davidi ne, Kakuena bidia bia hatuhu mu tshianza tshianyi, kadi anu bidia bia tshijila, bikala bantu aha kabayi basangile ne bakashi.

⁵ Davidi wakambila muakuidi ne, Bulelela, katuena basangile ne bakashi tô matuku asatu; hanakumuka ku musoko, bintu bia bantu aba biakadi bijidika, nebitambe kujidibua tô ne lelu nansha?

⁶ Nunku muakuidi wakamuha bidia bia tshijila, bidia bikuabo kabiyiku anu bidia bia tshijila biakumushabo ku mesu kua Yehowa hakatekabo bidia bihia-bihia ku dituku ku dituku.

⁷ Muena mudimu wa Shaula wakadiku dituku adi, mukandibue ku mesu kua Yehowa, dina diandi Doege, Muena Edome, kahita ka balami ba mikoko ya Shaula.

⁸ Davidi wakebesha Ahimeleke ne, Udi ne difuma anyi muele wa nvita mu tshianza tshiebe, anyi? Tshiakalua ne muele anyi bintu bianyi bia nvita bikuabo, bualu bua mudimu wa mukelenge udi bualu bua lubilu.

⁹ Muakuidi wakamuambila ne, Muele wa nvita wa Goleyata, Muena Peleshete, uwakashiha mu tshibanda tshia Ela, udiku, udi mujingila mu tshilulu ku nyima kua efoda; biwasua kuwangata, uwangate, bualu bua kakuena muele mukuabo kunoko. Davidi wakamba ne, Kakuena mukuabo bu au, ûmpe.

¹⁰ Davidi wakajuka dituku adi, wakanyema bualu bua ditshina dia Shaula, wakaya kudi Akisha, mukelenge wa mu Gata.

¹¹ Bantu ba Akisha bakamuebesha ne, Eu ke nDavidi, mukelenge wa buloba, anyi? Kabakamuimbila musambu hakadibo baja maja dituku dikuabo hakambabo ne, Shaula wakashiha binunu bia bantu, Davidi wakashiha binunu makumi bia bantu, anyi?

¹² Davidi wakateka mei au onso mu mutshima wandi, wakatamba kutshina Akisha, mukelenge wa mu Gata.

¹³ Yeye wakakudimuna bienzedi biandi ku mpala kuabo, wakadingisha bu muhale mu bianza biabo: wakafunda tshifundafunda ku bibi bia musoko, lute luandi luakahueka ku muedi wandi.

¹⁴ Hashishe Akisha wakambila bantu bandi ne, Monai, muntu eu udi muhale, nuakalua nʼandi kundi munyi?

¹⁵ Meme ndi nkengela bahale bua nuenu nuakalua ne muntu eu bua kuenzeye bu muhale ku mesu kuanyi, anyi? Muntu eu nealue mu nsubu wanyi, anyi?