1 Samuele 17 - Mukanda wa Nzambi Dihungila Dikulukulu ne Dihungila Dihia-dihia 2003

Davidi Udi Ushiha Goleyata

¹ Bena Peleshete bakasangisha bena nvita babo bua kuluanganabo, bakadisangisha mu Soko, udi mu buloba bua Yuda: bakadi ne tshitudilu tshiabo hankatshi ha Soko ne Azeka mu Efese-damima.

² Shaula ne Bena Isalele bakadisangisha, bakadi ne tshitudilu tshiabo mu tshibanda tshia Ela; bakela mualu wa nvita ku mpala kua Bena Peleshete.

³ Bena Peleshete bakadi ku mutu kua mukuna ku luseke lumue ne Bena Isalele bakadi ku mutu kua mukuna ku luseke lukuabo, tshibanda tshiakadi hankatshi habo.

⁴ Tshilobo tshiakaluhuka mu tshitudilu tshia Bena Peleshete, dina diatshi Goleyata wa mu Gata, bule buandi buakadi coudées isambombo ne ntanta wa tshianza.

⁵ Wakadi ne tshifulu tshia tshiamu tshia mitaku ku mutu kuandi, wakatata tshikowelu tshia tshiamu tshia mitaku, bujitu buatshi buakadi bu nshekele ya tshiamu tshia mitaku binunu bitanu.

⁶ Wakadi ne nkete ya tshiamu tshia mitaku ku mikolo yandi, wakadi ne difuma dia tshiamu tshia mitaku ha diaha diandi.

⁷ Mutondo wa difuma wakadi bu mbungu wa mukumi wa bilulu; lusongo lua difuma luakadi ne bujitu bua nshekele ya tshiamu tshifike nkama isambombo; mutuadi wa ngabu wandi wakaya ku mpala kuandi.

⁸ Yeye wakimana biandi, wakela bena nvita ba Bena Isalele dî ne, Nuakuluhuka bua kuela mualu wenu wa nvita bishi? Meme tshiena Muena Peleshete, anyi? Nuenu kanuena bantu ba Shaula, anyi? Nusungule muntu wa munkatshi muenu, alue biandi kundi.

⁹ Biamanyeye mua kuluangana nʼanyi ne bua kunshiha, nunku tuetu netuikale bahika benu; kadi binamuhita bukole, binamushiha, nunku nuenu nenuikale bahika betu, nenutukuatshile mudimu.

¹⁰ Muena Peleshete wakamba ne, Ndi ntukisha bena nvita ba Bena Isalele lelu eu; bantumine mulume bua tuetu tuluangane.

¹¹ Kakunyua Shaula ne Bena Isalele bonso mei a Muena Peleshete, bakakema, bakatamba kutshina.

¹² Davidi wakadi muana wa balume wa Muena Efelata wa mu Beteleheme-yuda, dina diandi diakadi Yishai, wakadi ne bana ba balume muanda mukulu; mu matuku a Shaula yeye wakadi muntu mununu, mukoke munkatshi mua bantu.

¹³ Bakulu basatu ba Davidi bakadi baya ku nyima kua Shaula bua kuluanganabo nvita: mena a bana balume basatu ba Yishai bakaya ku nvita akadi Eliaba, muanʼa bute, ne Abinadaba wakamulonda, ne muisatu Shama.

¹⁴ Davidi wakadi muanʼa mukala; bakulu bandi basatu bakadi balonda Shaula.

¹⁵ Davidi wakadi Umuka kudi Shaula misangu mikuabo bua kudisheye mikoko ya tatu wandi mu Beteleheme.

¹⁶ Muena Peleshete au wakadi usemena ha buihi dinda ne dilolo wakamuenekamueneka matuku makumi anai.

¹⁷ Yishai wakambila muanʼandi Davidi ne, Angatshila bana benu epha wa blé mikanga ne mitanda ei ya bidia dikumi, uye nʼabi lubilu ku tshitudilu kudi bana benu;

¹⁸ uye ne fromage ei dikumi kudi kapitene kabo ka tshinunu; utangile bu mudi bana benu, uhingane ne dî diabo.

¹⁹ Shaula ne bobo ne Bena Isalele bonso bakadi mu tshibanda tshia Ela, baluangana ne Bena Peleshete.

²⁰ Hakatshiabu Davidi wakabika, wakashiya mikoko mu bianza bia mulami, wakangata bintu abi, wakaya bu muakamuambila Yishai; wakalua ku muaba wakadi makalu a nvita hakadi bena nvita baye ku nvita, hele mbila bua nvita.

²¹ Bena Isalele ne Bena Peleshete bakela mualu wa nvita, mulongo ne mulongo.

²² Davidi wakashiya bintu biandi mu bianza bia mulami wa makalu, wakaya lubilu kudi bena nvita, wakela bana babo muoyo.

²³ Hakadi Davidi uyikila nʼabo, mona, tshilobo, Muena Peleshete wa mu Gata, dina diatshi Goleyata, tshiakumuka munkatshi mua Bena Peleshete, tshiamba mei bu muakuambatshi diambedi; ne Davidi wakûnvua.

²⁴ Hakatangila Bena Isalele bonso muntu au, bakamunyema, bakatamba kutshina.

²⁵ Bena Isalele bakamba ne, Wakatangila muntu au wakulua, anyi? Bulelela, yeye wakulua bua kufuna bulobo ku mpala kua Bena Isalele: muntu wamushiha, mukelenge neanumushe mubanji munene, neamuhe muana wandi mukashi, neahe ba mu nsubu wa tatu wandi budishikaminyi mu Isalele.

²⁶ Davidi wakakonka bantu bakadi bimana ha buihi nʼandi ne, Nebenzele muntu washiha Muena Peleshete eu ne wumusha bundu ku mesu kua Bena Isalele tshinyi? Muena Peleshete eu udi kayi mutengula, udi nganyi bua kufuneye bulobo ku mpala kua bena mata ba Nzambi wa muoyo?

²⁷ Bantu bakamukudimuna dî ne, Nebenzele muntu nunku biamushiyeye.

²⁸ Eliaba mukuluʼandi wakunyua hakambileye bantu nunku, Eliaba wakakuatshila Davidi tshiji, wakamba ne, Wewe wakuluila kunoko tshinyi? Wakashiya mikoko ai mikese mu tshihela kudi nganyi? Ndi mumanye kudisua kuebe ne kudibandisha kua mutshima webe: wewe wakuluila anu bualu bua kutangila mata.

²⁹ Davidi wakamba ne, Nakuenza tshinyi? Nakuamba anu dî nansha?

³⁰ Wakamukuma nyima, wakebesha mukuabo; bantu bakamuambila kabidi anu muomumue.

³¹ Hakunvuabo mei akamba Davidi, bakâmbila Shaula, ne yeye wakamubikila.

³² Davidi wakambila Shaula ne, Mitshima ya bantu kayihampakanyi bualu buandi; meme muntu webe, nenye kuluangana ne Muena Peleshete eu.

³³ Shaula wakambila Davidi ne, Wewe kuena mua kuya bua kuluangana ne Muena Peleshete eu bualu bua wewe utshidi nsongalume ne yeye wakadi muena mata ku bunsongalume buandi tô ne katataka.

³⁴ Davidi wakambila Shaula ne, Muntu webe wakadi ulama mikoko ya tatu wandi: ne hakaha nansha nyama wa ntambue nansha nkashama bua kukuata muana wa mukoko,

³⁵ nakamulonda, nakamushiha, nakasungila muana wa mukoko mukana muandi; hakabikeye bua kunduisha, meme nakamukuata ku buoya buandi, nakamutaha, nakamushiha.

³⁶ Muntu webe wakashiha nyama wa ntambue ne nkashama; ne Muena Peleshete eu udi kayi mutengula neikale nʼai diatshimue bualu bua yeye wakafuna bulobo ku mpala kua bena nvita ba Nzambi wa muoyo.

³⁷ Davidi wakamba ne, Yehowa, nguakansungila ku dikama dia nyama wa ntambue ne dia nkashama, neansungile mu tshianza tshia Muena Peleshete eu. Shaula wakambila Davidi ne, Ya biebe, Yehowa ikale nʼebe.

³⁸ Shaula wakaluatshisha Davidi bintu biandi bia mata, wakateka tshifulu tshia tshiamu tshia mitaku ku mutu kuandi, wakamuluatshisha tshikowelu tshia mata.

³⁹ Davidi wakabisha muele wandi wa nvita ku mukaba wandi, wakakeba kuya, kadi yeye kakanza kubadisha. Davidi wakambila Shaula ne, Tshiena mumanye mua kuya ne bintu ebi, bualu bua tshiena muanze kubadisha. Davidi wakabivula.

⁴⁰ Davidi wakangata tshibangu tshiandi mu tshianza tshiandi, wakasungula mabue atanu a busenu mu kasulu, wakaela mu mpaya wandi wa bulami bua mikoko wakadiye nʼandi, mu kabombi kandi mene; tshieledi tshiandi tshia mabue tshiakadi mu tshianza tshiandi; wakasemena ha buihi ne Muena Peleshete.

⁴¹ Muena Peleshete wakasemena ha buihi ne Davidi: mutuadi wa ngabu wandi wakaya ku mpala kuandi.

⁴² Muena Peleshete wakakenzakana, hakatangileye Davidi, wakamulengulula bualu bua yeye wakatshidi nsongalume, wakadi ne mpala lukunjila-kunjila, wakadi ne mpala muimpe.

⁴³ Muena Peleshete wakambila Davidi ne, Meme ndi mbua bua wewe udi ulua kundi ne bibangu, anyi? Muena Peleshete wakela Davidi mulau mu mena a nzambi yandi.

⁴⁴ Muena Peleshete wakambila Davidi ne, Lua kundi, nendishe nyunyu ya mulu ne nyama ya mu tshisuku munyinyi webe.

⁴⁵ Hashishe Davidi wakambila Muena Peleshete ne, Wewe udi ulua kundi ne muele wa nvita ne difuma ne difuma dia kabenda, kadi meme ndualua kudi mu dina dia Yehowa, Nzambi wa bena nvita ba Bena Isalele uwakafunyina bulobo ku mpala kuandi.

⁴⁶ Yehowa neakufile mu tshianza tshianyi lelu eu: nenkushihe, nenkutule mutu webe; nendishe nyunyu ya mulu ne nyama ya mu tshisuku bitalu bia bena nvita ba Bena Peleshete lelu; bantu bonso ba ha buloba nebamanye ne, Nzambi udi munkatshi mua Bena Isalele bulelela;

⁴⁷ ne bantu bonso ba mu tshisumbu etshi nebamanye ne, Yehowa kena Usungila bantu bua muele wa nvita ne bua difuma, bualu bua nvita idi mu bianza bia Yehowa, yeye nennufile mu bianza bietu.

⁴⁸ Bakabika Muena Peleshete, hakasemeneye ha buihi bua kusangakeneye ne Davidi, hashishe Davidi wakabika lukasa, wakalumbila lubilu kudi bena nvita bua kusangakeneye ne Muena Peleshete.

⁴⁹ Davidi wakabuesha tshianza tshiandi mu mpaya wandi, wakambula dibue, wakadiela, wakataha Muena Peleshete mu mpala wandi; dibue diakajika mu mpala wandi, yeye wakadishinda mutue mpala hanshi.

⁵⁰ Nunku Davidi wakalota Muena Peleshete bukole ku tshieledi ne dibue; wakataha Muena Peleshete, wakamushiha; kadi Davidi kakadi ne muele wa nvita mu tshianza tshiandi.

⁵¹ Hashishe Davidi wakambila lubilu, wakimana hamʼbidi ha Muena Peleshete, wakahatula muele wandi wa nvita mu luhuhu, wakamutaha, wakatula nʼau mutu wandi. Hakatangila Bena Peleshete ne, Tshilobo tshietu tshiakadia, bakanyema.

⁵² Bena Isalele ne Bena Yuda bakajuka, bakela mbila, bakihata Bena Peleshete tô ne ku Gata ne ku bibi bia Ekelona. Nunku batahike ba Bena Peleshete bakahona mu nshila wa ku Shâlayima tô ne ku Gata ne ku Ekelona.

⁵³ Bena Isalele bakalekela kuihata Bena Peleshete bakalukila, bakahaula tshitudilu tshiabo.

⁵⁴ Davidi wakangata mutu wa Muena Peleshete, wakalua nʼau ku Yelushalema, kadi wakateka bintu biandi bia nvita mu ntenta wandi.

⁵⁵ Hakatangila Shaula Davidi uya bua kuluangana ne Muena Peleshete, yeye wakakonka Abinê, kapitene ka masalayi andi, ne, Abinê, eu mmuana wa nganyi? Abinê wakamukudimuna dî ne, Bu mudi mutshima webe ne muoyo, mukelenge, tshiena mumanye.

⁵⁶ Mukelenge wakamba ne, Ukonke bantu muena muana eu.

⁵⁷ Hakadi Davidi ufuma kuakashiheye Muena Peleshete, Abinê wakamuangata, wakaya nʼandi kudi Shaula muambule mutu wa Muena Peleshete mu tshianza tshiandi.

⁵⁸ Shaula wakamukonka ne, Wewe nsongalume, udi muana wa nganyi? Davidi wakamukudimuna ne, Ndi muana wa muntu webe Yishai, Muena Beteleheme.