1 Samuele 14 - Mukanda wa Nzambi Dihungila Dikulukulu ne Dihungila Dihia-dihia 2003

¹ Dituku dikuabo Yonatana, muana mulume wa Shaula, wakambila nsongalume, muambudi wa ngabu wandi ne, Lua, tuye bietu kudi masalayi a Bena Peleshete adi dishiya dia muamua. Kadi yeye kakambila tatu wandi nansha.

² Shaula wakadi mushikame kunfudilu kua buloba bua Gibea muinshi mua mutshi wa grenade udi mu Migelona: bantu bakadiye nʼabo bakadi bu balume nkama isambombo:

³ ne Ahiya, muana mulume wa Ahituba, muanʼabo ne Ikaboda, muana mulume wa Pinehasa, muana mulume wa Eli, muakuidi wa Yehowa wa mu Shilo, wakadi nʼandi muluate tshilulu tshia efoda. Bantu kabakamanya ne, Yonatana wakaya.

⁴ Yonatana wakasua kuya kudi masalayi a Bena Peleshete mu nshila mubumbakane, dibue disongoloka diakadi ku tshianza tshia balume, dikuabo disongoloka diakadi ku tshianza tshia bakashi: dina dia dikuabo diakadi Bosese, dina dia dinga diakadi Sene.

⁵ Dibue dikuabo diakadi ku node ku mpala kua Mikemasha, ne dinga dibue diakadi ku sude ku mpala kua Geba.

⁶ Yonatana wakambila nsongalume, muambudi wa ngabu wandi, ne, Lua, tuye bietu kudi masalayi au adi kâyi matengula, biasua Yehowa kutukuatshisha; bualu bua kakuena mukandu kudi Yehowa bua kusungila bantu kudi ba bungi anyi kudi bakese.

⁷ Muambudi wa ngabu wandi wakamuambila ne, Enze biebe malu onso adi mu mutshima webe; tuye bietu, mona, ndi nʼebe anu bua kukuenzela bu mudi mutshima webe musue.

⁸ Hashishe Yonatana wakamba ne, Mona, netuye kudi bantu aba, netudimueneshe kudibo.

⁹ Biatuambilabo ne, Anjai kuimana, netulue kunudi aku, hashishe netuimane anu ha wetu muaba, katuena tuya kudibo.

¹⁰ Kadi biatuambilabo ne, Luai kunoko, hashishe netuye bualu bua Yehowa wakamana kubafila mu bianza bietu; bualu ebu nebuikale bu tshimanyinu kutudi.

¹¹ Bubidi buabo bakadimuenesha kudi masalayi a Bena Peleshete; Bena Peleshete bakambilangana ne, Monai, Bena Ebelu bakuhatuka mu mena akadibo badisokoke.

¹² Masalayi akambila Yonatana ne muambudi wa ngabu wandi ne, Luai kunoko, neanuleshe bualu. Yonatana wakambila muambudi wa ngabu wandi ne, Lua, undonde, bualu bua Yehowa wakamana kubafila mu bianza bia Bena Isalele.

¹³ Yonatana wakabanda kudibo wenda ukalaba bianza ne makasa; muambudi wa ngabu wandi wakamulonda mu nyima; Bena Peleshete bakashihibua kudi Yonatana, ne muambudi wa ngabu wandi wakashiha bakuabo kabidi.

¹⁴ Mu nvita ya ku mpala Yonatana ne muambudi wa ngabu wandi bakashiha balume bu makumi abidi bakadi badisangisha kaba kamue kakadi bu bunene bua tshituha tshia hectare wa buloba.

¹⁵ Bantu bonso bakadi mu tshitudilu ne mu madimi kabidi bakazakala; ne masalayi ne bambudi ba bintu bakazakala; buloba buakakanka kabidi, nunku kukanka kunene kua buloba kuakadiku.

¹⁶ Batentekedi ba Shaula ba mu Gibea wa mu buloba bua Benyamina bakatangila, ne monai, tshisumbu tshia Bena Peleshete tshiakamuangalaka, bakaya eku ne eku.

¹⁷ Hashishe Shaula wakambila bantu bakadi nʼandi ne, Nubale, numone wakumuka kutudi. Hakabalabo nunku, monai, Yonatana ne muambudi wa ngabu wandi kabakadiku.

¹⁸ Shaula wakambila Ahiya ne, Lua ne mushete wa Nzambi kundi. Bualu bua mushete wa Nzambi wakadi ne Bena Isalele tshikondo atshi.

¹⁹ Hakadi Shaula uyikila ne muakuidi, tshintompatompa tshiakadi mu tshitudilu tshia Bena Peleshete tshiakavulangana; Shaula wakambila muakuidi ne, Huekesha bianza biebe.

²⁰ Shaula ne bantu honso bakadi nʼandi bakunguila hamue, bakalua bua kuluangana nvita; ne monai, muntu ne muntu wakatuisha mukuandi, kuakadi tshintompatompa tshinene.

²¹ Bena Ebelu bakadi badisangisha ne Bena Peleshete, bakadi bafuma ku buloba buabo habuela nʼabo mu tshitudilu tshiabo, katataka bakakudimuka, bakadisangisha ne Bena Isalele bakadi ne Shaula ne Yonatana.

²² Bena Isalele bakuabo bakadi busokoma ku mikuna ya Efelayima, hakunvuabo lumu ne Bena Peleshete bakanyema, bobo mene bakalonda mu nvita.

²³ Nunku Yehowa wakasungila Bena Isalele dituku adi; bakaluangana nʼabo tô ne ku Bete-awena.

²⁴ Bantu ba mu Isalele bakadi ne ntatu dituku adi bualu bua Shaula wakakandisha bantu ne, Muntu udi udia tô ne ku dilolo diambedi tshiyi muanze kusombuela badi nʼanyi lukuna, udi ne mulau. Nunku bantu kabakalabula bia kudia.

²⁵ Bantu bonso bakabuela muitu, buitshi buakadi hanshi ha buloba.

²⁶ Hakabuela bantu muitu, monai, buitshi buakamata hanshi: nansha muntu wakela tshianza mukana muandi bualu bua bakatshina mutshihu.

²⁷ Kadi Yonatana kakunyua hakakandika tatu wandi bantu ne mutshihu: nunku yeye wakatua lusongo lua mulangala wakadi mu tshianza tshiandi mu dihula dia buitshi, wakela tshianza mukana muandi; mesu andi akatanduka.

²⁸ Hashishe umue wabo wakamba ne, Tatu webe wakukandika bantu ne mutshihu ne, Muntu udi udia lelu udi ne mulau. Bantu bakadi bahungile.

²⁹ Hashishe Yonatana wakamba ne, Tatu wanyi wakutatshisha buloba. Ndi nnusengelela ne, Tangilai bu mudi mesu anyi matanduke bualu bua meme nakumbula buitshi ebu bukese.

³⁰ Tuakadi kubahita misangu bungi munyi bu bantu badie lelu bintu bia bena lukuna biakasanganabo? Bualu bua katuena bashihe ba bungi ba munkatshi mua Bena Peleshete.

³¹ Bakashiha Bena Peleshete dituku adi ku Mikemasha tô ne ku Ayalona. Bantu bakadi batamba kuhungila;

³² bakaya bua kuhaula bintu bia Bena Peleshete, bakakuata mikoko ne ngombe ne bana ba ngombe, bakaushiha, bakayidia ne mashi ai.

³³ Bakambila Shaula ne, Mona, bantu badi benzela Yehowa bibi, bualu bua badi badia mashi. Yeye wakamba ne, Nuakuenza bualu bubi; bungulushai dibue dinene kundi eku.

³⁴ Shaula wakamba ne, Muangalalai munkatshi mua bantu, nubambile ne, Muntu yonso alue kundi ne ngombe wandi ne mukoko wandi, netushihe, netuyidie kunoko: katuenzedi Yehowa bibi bua kudia mashi. Bantu bonso bakalua ne ngombe yabo butuku abu, bakayishihaku.

³⁵ Shaula wakashila Yehowa tshioshelu; tshiakadi tshioshelu tshia diambedi tshiakashileye Yehowa.

³⁶ Shaula wakamba ne, Tuyai, tulonde Bena Peleshete butuku ebu, tukuate bintu biabo tô ne hatshiabu: katubashidi nansha muntu wabo umue. Bakamba ne, Wenze tshionso tshidi tshimpe ku mesu kuebe. Hashishe muakuidi wakamba ne, Tusemenai ha buihi ne Nzambi.

³⁷ Shaula wakakonka Yehowa lungenyi ne, Nenye kulonda Bena Peleshete, anyi? Wewe neubafile mu bianza bia Bena Isalele, anyi? Kadi Yehowa bakamukudimuna dî dituku adi.

³⁸ Shaula wakamba ne, Nuenu bukelenge ba bantu, Semenai ha buihi, tumanye bietu, tujingulule bilengele kuakafuma bualu ebu bubi lelu eu.

³⁹ Bu mudi Yehowa ne muoyo, udi usungila Bena Isalele, biafuma bualu ebu kudi Yonatana, muanʼanyi mulume, yeye neafue biandi bulelela. Kadi kakuakadi muntu wa munkatshi mua bantu bonso wakamuandamuna.

⁴⁰ Hashishe yeye wakambila Bena Isalele ne, Nuenu nuikale ku luseke lumue, meme ne Yonatana, muanʼanyi mulume netuikale ku luseke lukuabo. Bantu bakambila Shaula ne, Wenze tshidi tshimpe ku mesu kuebe.

⁴¹ Nunku Shaula wakambila Yehowa, Nzambi wa Isalele, ne, Utumanyishe bualu bulelela. Nshobo yakakuata Yonatana ne Shaula, kadi bantu bakabinga.

⁴² Shaula wakamba ne, Batuelele ne Yonatana, muanʼanyi mulume nshobo. Nshobo yakakuata Yonatana.

⁴³ Hashishe Shaula wakambila Yonatana ne, Ungambile tshiwakuenza. Yonatana wakamukudimuna dî ne, Bulelela, nakalabula buitshi bukese buakadi ku lusongo lua mulangala wakadi mu tshianza tshianyi; mona, bundi nʼabu mbua kufua.

⁴⁴ Shaula wakamba ne, Nzambi angenzele bualu ebu ne bukuabo ha mutu, bualu bua wewe Yonatana neufue bulelela.

⁴⁵ Bantu bakambila Shaula ne, Yonatana, nguakadi Usungila Bena Isalele ne luhandu elu lunene, neafue biandi, anyi? Nansha, bualu ebu kabuikadiku; bu mudi Yehowa ne muoyo, lusuki lumue lua ku mutu kuandi kalumatshi hanshi; bualu bua wakamatshisha ngana ne Nzambi mudimu lelu eu. Nunku bantu bakasungila Yonatana, kakafua nansha.

⁴⁶ Hashishe Shaula wakalekela kulonda Bena Peleshete; Bena Peleshete bakaya ku muaba wabo.

⁴⁷ Hakabuela Shaula mu bukelenge bua Isalele, yeye wakaluangana nvita ne bena lukuna bandi bonso ba ku nseke yonso: wakaluangana ne Bena Moaba ne Bena Amona ne Bena Edome ne bakalenge ba mu Seba ne Bena Peleshete; ku miaba yonso yakayeye, yeye wakabahita bukole.

⁴⁸ Wakadi ne dikima dikole: wakashiha Bena Amaleka, wakasungila Bena Isalele mu bianza bia bakadi bahaula.

⁴⁹ Bana ba balume ba Shaula bakadi Yonatana ne Yishewi ne Malekishua; au mmena a bana bandi ba bakashi babidi: dina dia muanʼa bute wandi diakadi Melaba, ne dina dia muana muakunyi diakadi Mikalu.

⁵⁰ Dina dia mukashi wa Shaula diakadi Abinoama, muana mukashi wa Ahimasa. Dina dia kamanda ka masalayi andi diakadi Abinê, muana mulume wa Nê, tatu mukuabo wa Shaula.

⁵¹ Kishi wakadi tatu wa Shaula; ne Nê, tatu wa Abinê, wakadi muana mulume wa Abiele.

⁵² Shaula wakaluangana nvita mikole ne Bena Peleshete matuku andi onso; bakatangila Shaula muntu mukole anyi muntu wa bukitu, yeye wakamuangata bu muntu wandi.