1 Korente 14 - Mukanda wa Nzambi Dihungila Dikulukulu ne Dihungila Dihia-dihia 2003

Lungenyi lua kuambila bantu dî dia Nzambi ludi lutamba lungenyi lua kumanya miaku ya bungi

¹ Nulonde luse, nanukilai kukeba bihedi bia Nyuma, kadi nulambe kubikeba bua nuenu mimanye mua kuambila bantu dî dia Nzambi.

² Bualu bua muntu udi wakula muaku udi bantu kabai bamanye, kena wakula kudi bantu kadi udi wakula kudi Nzambi; bualu bua kakuena muntu udi unvua dî diandi; kadi mu nyuma wandi yeye udi wamba malu atshidi masokoka.

³ Kadi muntu udi wambila bantu dî dia Nzambi udi wakula nʼabo bua kubadiundisha, bua kubasamba, ne bua kubakolesha mitshima.

⁴ Muntu udi wambila bantu dî mu muaku udibo kabai bamanye udi udidiundisha; kadi muntu udi wambila bantu dî dia Nzambi udi udiundisha ekelesia.

⁵ Ndi musue buonso buenu numanye mua kuakula miaku, kadi ndi ntamba kusua bua nuenu numanye mua kuambila bantu dî dia Nzambi; muntu udi wambila bantu dî dia Nzambi udi utamba muntu udi ubambila dî mu muaku udibo kabai bamanye, bikaleye kai utujinguluila muaku, bua ekelesia adiundishibue.

⁶ Kadi bana betu, binalua kunudi ngakula miaku mudi kanui bamanye, nenukuatshishe munyi, bingikala tshî ngakula nʼenu malu adi masokolola, anyi a lungenyi, anyi a mayisha a baprofete, anyi a diyisha?

⁷ Kadi bintu bidi kabi ne muoyo ne bidi biakula, nasha lushiba nasha tshisanji, bikala muadi wabi kawi mutahuluke, nebamanye munyi, tshidibo bela anyi tshidibo bimba?

⁸ Bua biadila mpungi ne dî didi kadî dijinguluka, muntu kai wadilongolola bua kuluangana?

⁹ Nunku nuenu kabidi, binuikala kanui nuakula ne ludimi dî didi diunvuika bimpe, nebamanye dî diudi wakula munyi? Bualu bua nenuele mei mu luhehele.

¹⁰ Bumue mishindu ya bungi ya miaku idi ha buloba, ne kakuena umue udi kawi ne dijinguluka.

¹¹ Bingikala tshi mumanye dijingulula dia muaku, nengikale musenshi kudi mualu udi uwakula, ne yeye udi uwakula neikale musenshi kundi.

¹² Nunku nuenu kabidi, bualu bua nudi nutamba kunanukila kukeba bihedi bia Nyuma, nukebe mua kukumbanamu bualu bua kudiundisha kua ekelesia.

¹³ Nunku muntu udi wakula muaku udi bantu kabai bamanye, alombe Nzambi bua yeye amanye mua kubajinguluila muaku.

¹⁴ Binatendelela mu muaku undi tshî mumanye, nyuma wanyi udi utendelela, kadi meshi anyi kêna wenza bualu.

¹⁵ Nunku ntshinyi? Nentendelele ne nyuma, nentendelele ne meshi kabidi; nengimbe ne nyuma, nengimbe ne meshi kabidi.

¹⁶ Anyi, biwatendelela Nzambi anu ne nyuma, muntu udi munkatshi mua badi kabai ne bihedi bia Nyuma udi mumanye mua kuamba ne, Amen, munyi, hawasakidila Nzambi, hadiye kai mumanye dî diudi wamba?

¹⁷ Bua wewe udi usakidila Nzambi bimpe bulelela, kadi mukuabo kena udiundishibua.

¹⁸ Ndi nsakidila Nzambi; ndi nutamba buonso buenu kuakula miaku;

¹⁹ kadi mu ekelesia ndi ntamba kusua kuakula mei atanu ne meshi anyi, bua kuyisha bakuabo kabidi, ku mpala kua kuakula mei lubombo mu muaku udibo kabai bamanye.

²⁰ Bana betu, lekelai kuikala bana mu meshi enu, kadi nuikale tuana tukese mu malu mabi, nuikale bantu bakole mu meshi enu.

²¹ Bakafunda mu mikenshi ne, Nengakule ne bantu aba mu miaku ya bende ne ku mishiku ya bantu ba bende; kadi Mukelenge udi wamba ne, Bua malu â mene, kabena bangunvuila.

²² Nunku miaku idi bu tshimanyinu, kenkudi badi bitabusha, kadi kudi badi kabai bena ditabusha; kadi mayisha a baprofete adi bu tshimanyinu, kenkudi badi kabai bena ditabusha, kadi kudi badi bitabusha.

²³ Nunku biadisangisha bena ekelesia bonso mu muaba umue, ne biakulabo buonso buabo mu miaku mikuabo, ne biabuela bantu badi kabai bamanye miaku anyi badi kabai bena ditabusha, bobo kabena bamba ne, Badi bahale, anyi?

²⁴ Kadi biamba buonso buabo dî dia Nzambi, ne biabuela muntu udi kai muena ditabusha anyi udi kai mumanye miaku, yeye udi ubedibua kudi buonso buabo, udi ulumbuluishibua kudi buonso buabo;

²⁵ ne malu adi masokoka mu mutshima wandi neikale masokolola; ne yeye neatue mpala hanshi, neakukuile Nzambi, neambe ne, Nzambi udi munkatshi muabo bulelela.

Paulo udi ubamanyisha mua kulongolola masangisha abo

²⁶ Nunku ntshinyi, bana betu? Hanuadisangisha, muntu ne muntu udi ne musambu, udi ne diyisha, udi ne bualu buakabuluibua kudiye, udi ne muaku udibo kabai bamanye, udi ne kujingulula kua muaku. Malu onso enjibue bua kunudiundisha.

²⁷ Biakula muntu muaku unudi kanui bamanye, bakule nunka kudi babidi, kabahitshi ha basatu, balondangane muntu ne muntu, ne umue wenu abajinguluile muaku

²⁸ kadi bikalaku kakui mubajinguluidi, muena muaku ahue biandi mu ekelesia, adiakuile munda munda, akule kudi Nzambi kabidi.

²⁹ Baprofete babidi anyi basatu bakule, ne bakuabo bajingulule mei abo.

³⁰ Kadi bikala bualu bubuluibua kudi mukuabo udi ushikamamu, muntu wa kumudilu ahue biandi.

³¹ Bualu bua buonso buenu nudi bamanye mua kuamba dî dia Nzambi ku muntu ku muntu, bua buonso buenu nuyile, ne bua buonso buenu nusambibue.

³² Nyuma ya baprofete idi ikokeshibua kudi baprofete;

³³ bualu bua Nzambi kena Nzambi wa malu mabuelakane, kadi udi Nzambi wa ditalala. Bu mudi bualu mu ekelesia yonso ya basanto,

³⁴ bakashi bahue mu ekelesia; bualu bua kabena bitabusha bua bakashi bakulemu, kadi bikale ku nyima kua balume bu mudi mikenshi yamba.

³⁵ Biasuabo kuyila bualu, bakonke balume babo ku nsubu yabo; bua budi bualu bua bundu bua mukashi kuakula mu ekelesia.

³⁶ Dî dia Nzambi diakafuma kunudi, anyi? Anyi, dî dia Nzambi diakafika kunudi nkayenu, anyi?

³⁷ Biela muntu meshi ne, Meme ndi muprofete, anyi, Meme ndi muena bihedi bia Nyuma, amanye mei andi nufundila ne, Adi mukenshi wa Mukelenge.

³⁸ Bikala muntu mujibale, ashale biandi mujibale.

³⁹ Nunku, bana betu, nunanukile kukeba tshihedi tshia kuamba kua dî dia Nzambi, ne kanubidi kuakula kua miaku.

⁴⁰ Kadi malu onso enjibue bilengele, ne alondangane biakane.