1 Bakalenga 6 - Mukanda wa Nzambi Dihungila Dikulukulu ne Dihungila Dihia-dihia 2003

Solomo Udi Wibaka Nsubu wa Yehowa

¹ Hakahita bidimu nkama inai ne makumi muanda mukulu ku nyima kua dihatuka dia Bena Isalele mu buloba bua Ejipitu, mu tshidimu tshinai tshia bukokeshi bua Solomo ha mutu ha Bena Isalele, mu ngondo wa Ziwa, udi ngondo muibidi, yeye wakabanga kuibaka nsubu wa Yehowa.

² Bunene bua nsubu wakibakila mukelenge Solomo Yehowa buakadi ne bule bua coudées makumi asambombo, butshiama buandi buakadi coudées makumi abidi, bute buandi bua mulu buakadi coudées makumi asatu.

³ Bule bua mbalanda wakadi ku mpala kua nsubu buakadi coudées makumi abidi bu butshiama bua nsubu; butshiama buandi buakadi coudées dikumi.

⁴ Wakenza bibi bia ha masoso a nsubu ne tubaya tutshiamakane.

⁵ Wakasa nsubu milungakashe mu lumbu luakadi lunyunguluke ntempelo ne muaba wa tshijila kabidi; wakenza nsubu ku nseke yonso.

⁶ Butshiama bua nsubu yakadi kuinshi buakadi coudées itanu, butshiama bua nsubu yakadi hankatshi buakadi coudées isambombo, butshiama bua nsubu yakadi ha mutu buakadi coudées muanda mutekete; wakenza mbalanda minyunguluke bimanu bionso bia nsubu bua makunshi kamueneki mu bimanu bia nsubu.

⁷ Nsubu wakibakibua ne mabue akasongabo ku muaba wakadi mabue; nunku kabakunvua mikumu ya marteau anyi tshisui anyi tshiamu tshikuabo mu nsubu hakatshidibo bibaka nsubu.

⁸ Tshibuelelu tshia ku nsubu ya munkatshi tshiakadi ku tshianza tshia balume; bakasa tshibandilu tshikonyangala ku nsubu wa hanshi, tshiakaya ku nsubu ya kulu; tshibandilu tshikuabo tshikonyangala tshiakaya ku nsubu ya ha mutu.

⁹ Bakibaka nsubu nunku, bakamumana; bakateka mikamba minene ne mabaya a cèdre ku tshisasa tshia nsubu.

¹⁰ Bakalungakasha nsubu mukuabo ha mutu, bule buandi bua mulu buakadi coudées itanu; bakateka mabaya a cèdre ku musaka wa nsubu.

¹¹ Dî dia Yehowa diakalua kudi Solomo ne,

¹² Bua nsubu eu ûdi wibaka, biwenda mu nshila yanyi, biwenza mei anyi, biwatumikila mikenji yanyi yonso, nunku nenjadike dî dianyi kûdi, diakambila Davidi, tatu webe.

¹³ Nenshikame munkatshi mua Bena Isalele, tshiena ndekela bantu banyi, Bena Isalele.

¹⁴ Nunku Solomo wakibaka nsubu, wakamumana.

¹⁵ Wakateka mabaya a cèdre ku bimanu bionso bia munda mua nsubu hanshi tô ne ku mutu; wakabibuikila munda ne mabaya a mitshi; wakabuikila hanshi ha tshiendedi ne mabaya a cyprès.

¹⁶ Kuinshi kua nsubu wakenzaku nsubu mukuabo ne mabaya a cèdre, bunene buandi buakadi coudées makumi abidi: wakenza nsubu eu wa muaba wa tshijila.

¹⁷ Bule bua nsubu eu buakadi coudées makumi anai.

¹⁸ Munda mua nsubu muakadi mabaya a cèdre masonga ne maoshi ne bilongo, onso akadi a cèdre, nansha dibue dimue diakamueneka ku mesu.

¹⁹ Wakalongolola muaba wa tshijila munda mua nsubu, bua kutekamu mushete wa tshihungidi tshia mei a Yehowa.

²⁰ Bule bua muaba eu buakadi coudées makumi abidi, butshiama buau buakadi coudées makumi abidi, ne bule buau bua mulu buakadi coudées makumi abidi: wakateka tshiamu tshia or ku nseke yonso; wakateka mabaya a cèdre ha nyima ha tshioshelu kabidi.

²¹ Nunku Solomo wakateka tshiamu tshia or ku nseke yonso munda mua nsubu, wakateka nkanu ya or ku mpala kua muaba wa tshijila; wakateka tshiamu tshia or ha nyima hatshi.

²² Wakateka tshiamu tshia or ku nseke yonso munda mua nsubu; wakateka tshiamu tshia or ha nyima ha tshioshelu tshionso tshiakadi mu muaba wa tshijila.

²³ Mu muaba wa tshijila wakenza bakeluba babidi ne mitshi ya olive, bule buabo bua mulu buakadi coudées dikumi.

²⁴ Bule bua mahuahua abo buakadi coudées itanu: ku lusongo lua dihuahua dimue tô ne dinga kuakadi coudées dikumi.

²⁵ Bule bua mukeluba mukuabo buakadi coudées dikumi: bakeluba aba babidi bakadi bunene bumue, ne mushindu umue.

²⁶ Bule bua mukeluba umue buakadi coudées dikumi, ne bule bua mukuabo buakadi muomumue.

²⁷ Wakateka bakeluba munda mua muaba eu: mahuahua a bakeluba akadi malehe, nunku lusongo lua dihuahua dimue diakalua ku tshimanu tshimue tshia nsubu, ne dinga diakatua ku tshimanu tshikuabo: nsongo ya mahuahua abo akatuangana munda mua nsubu.

²⁸ Wakalamika tshiamu tshia or hamʼbidi ha bakeluba bonso.

²⁹ Bakasonga bakeluba ne mabue a ngashi ne bilongo ku bimanu bionso bia nsubu munda ne ha nyima.

³⁰ Bakalamika tshiamu tshia or hanshi munda mua nsubu ne ha mbelu.

³¹ Bakenza bibi bia mitshi ya olive ku mbelu kua muaba wa tshijila; biluwa bia ku mbelu biakadi bunene bua tshituha tshitanu tshia tshimanu tshia nsubu.

³² Bakenza bibi bibidi bia mitshi ya olive, bakabisonga ne bakeluba ne mabue a ngashi ne bilongo, bakalamika tshiamu tshia or ha nyima habi bionso; bakalamika or ha bakeluba ne ha mabue a ngashi kabidi.

³³ Bakenza biluwa bia ku mbelu kua ntempelo ku mitshi ya olive; bunene buabi buakadi bu tshituha tshinai tshia tshimanu tshia nsubu;

³⁴ bakenza bibi bibidi bia mitshi ya cyprès; bakenza tshibi tshimue ne mabaya abidi ne tshikuabo ne mabaya abidi.

³⁵ Bakasongahu bakeluba ne mabue a ngashi ne bilongo; bakalamika tshiamu tshia or ha mutu habi.

³⁶ Bakenza tshiendedi munda mua nsubu, bakatshienza ne mabue masonga ne mitshi ya cèdre.

³⁷ Bakajadika makunshi a nsubu wa Yehowa mu tshidimu tshinai tshia bukelenge, mu ngondo wa Ziwa.

³⁸ Bakamana nsubu mu tshidimu tshia dikumi ne tshimue tshia bukelenge, mu ngondo wa Bula, udi ngondo wa muanda mukulu. Nunku bakamana nsubu mu bidimu muanda mutekete.