1 Bakalenga 20 - Mukanda wa Nzambi Dihungila Dikulukulu ne Dihungila Dihia-dihia 2003

Ahaba Udi Uhita Bena Sulia Bukole

¹ Bene-hadada, mukelenge wa Sulia, wakasangisha masalayi andi onso: bakelenge makumi asatu ne babidi bakadi nʼandi, ne tubalu ne makalu. Wakaya, wakatshintshimika musoko wa Samalea bua kûluisha.

² Wakatuma miloho kudi Ahaba, mukelenge wa Isalele, ku musoko, imuambila ne, Bene-hadada udi wamba ne,

³ Tshiamu tshiebe tshia argent ne tshiamu tshiebe tshia or mbanyi; ne bakashi bebe ne bana bebe badi batamba buakane mbanyi kabidi.

⁴ Mukelenge wa Isalele wakamukudimuna ne, Mukelenge wanyi, bualu ebu nebuikale anu bu mu dî diebe; ndi webe ne bintu bionso bindi nʼabi.

⁵ Miloho yakahingana kudiye kabidi, yakamba ne, Bene-hadada udi wamba ne, Nakatuma mukenji kûdi wamba ne, Bûdi nʼabu mbua kufila argent yebe ne or yebe ne bakashi bebe ne bana bebe kundi;

⁶ kadi nentume bantu banyi kûdi makelela ha diba edi mene, bobo nebadikebele mu nsubu webe ne mu nsubu ya bantu bebe, hashishe bintu bionso bidi bimpe ku mesu kuebe bobo nebabiangate mu bianza biabo, nebaye nʼabi.

⁷ Hashishe mukelenge wakabikila bakulu bonso ba mu buloba, wakabambila ne, Tangilai bu mudi muntu eu ukeba diyoyo; wakantumina mukenji bua kuangateye bakashi banyi ne bana banyi ne argent yanyi ne or yanyi; tshiakabenga nansha.

⁸ Bakulu bonso ne bantu bonso bakamuambila ne, Kunvu dî diandi nansha, kuitabushi nansha.

⁹ Nunku yeye wakambila miloho ya Bene-hadada ne, Nuambile mukelenge wanyi ne, Nengenze malu onso awakambila muntu webe diambedi, kadi tshiena ngenza bualu ebu. Miloho yakumuka, yakahingana kudiye kabidi ne ditaba edi.

¹⁰ Bene-hadada wakamuambila ne, Nzambi ya hatuhu itambe kungenzela malu onso bikala manza a dinfuenkenya dia buloba dia mu Samalea akumbana bu bungi bua bantu badi bandonda,

¹¹ Mukelenge wa Isalele wakamukudimuna ne, Numuambile ne, Muntu udi uluata bintu bia nvita kadifunyishi bu muntu udi ubivula.

¹² Hakunvua Bene-hadada dî edi, wakadi unua maluvu ne bakelenge bakadiye nʼabo mu nsubu, yeye wakambila bantu bandi ne, Nudilongolole. Bakadilongolola bua kuluanganabo ne bena musoko.

¹³ Muprofete wakalua kudi Ahaba, mukelenge wa Isalele, wamba ne, Yehowa udi ukonka ne, Wewe wakatangila tshisumbu etshi tshia bantu tshinene, anyi? Mona, nentshifile mu bianza biebe lelu, wewe neumanye ne, Meme ndi Yehowa.

¹⁴ Ahaba wakakonka ne, Ku bianza bia nganyi? Yeye wakamuambila ne, Yehowa udi wamba ne, Ku bianza bia bena mudimu ba banfumu ba mu buloba buebe. Wakakonka kabidi ne, Wabanga nvita nganyi? Wakamuambila ne, Wewe.

¹⁵ Hashishe wakasangisha bena mudimu ba banfumu ba mu buloba, bakadi nkama ibidi ne makumi asatu ne babidi; hashishe wakabikila Bena Isalele bonso bu binunu muanda mutekete.

¹⁶ Bakaluhuka munda munya; kadi Bene-hadada ne bakelenge makumi asatu ne babidi bakadiye nʼabo bakadi bakuatshike maluvu mu nsubu.

¹⁷ Bena mudimu ba banfumu ba mu buloba bakadianjila ku mpala; Bene-hadada wakatuma dî dia kukonka bualu ebu; bakamuambila ne, Bantu bakufuma ku Samalea.

¹⁸ Yeye wakamba ne, Biasuabo ditalala, nubakuate ne muoyo; biasuabo nvita, nubakuate ne muoyo kabidi.

¹⁹ Nunku bena mudimu aba bakaluhuka ku musoko, ne bena nvita bakadi babalonda.

²⁰ Muntu yonso wakashiha muntu wakadi uluangana nʼandi; Bena Sulia bakanyema, ne Bena Isalele bakabihata. Bene-hadada, mukelenge wa Sulia, wakabanda ha nyima ha kabalu, wakahanduka ne bantu bakuabo bakadi babanda ha tubalu.

²¹ Mukelenge wa Isalele wakaluhuka, wakashiha tubalu ne makalu ne Bena Sulia ne kushiha kukole.

²² Muprofete wakalua hehi ne mukelenge wa Isalele, wakamuambila ne, Ya biebe, udikoleshe, udimuke kabidi bua malu audi wenza; bualu bua halua tshidimu tshikuabo, mukelenge wa Sulia neahingane bua kuluangana nʼebe.

²³ Bantu ba mukelenge wa Sulia bakamuambila ne, Nzambi wabo udi nzambi wa ku mukuna, nunku bakatuhita bukole; kadi bitualuangana nʼabo mu mpata, tuetu netubahite bukole.

²⁴ Wenze biebe bualu ebu: umushe bakelenge, muntu ne muntu mu muaba wandi, teka tupitene mu miaba yabo;

²⁵ usangishe masalayi bu muwakadi nʼau diambedi awakajimisha, tubalu bungi bumue, makalu bungi bumue; netuluangane nʼabo mu mpata, nembahite bukole bulelela. Yeye wakunyua dî diabo, wakenza nunku.

²⁶ Hakahita tshidimu tshikuabo, Bene-hadada wakasangisha Bena Sulia, bakaya ku Afeke bua kuluanganabo ne Bena Isalele.

²⁷ Bena Isalele bakadisangisha, bakangata bia kudia, bakaya bua kuluanganabo nʼabo. Bena Isalele bakasa bitudilu biabo, bakadi bu bisumbu bia bana ba mikoko bibidi ku mpala kuabo; kadi Bena Sulia bakûsha buloba tente.

²⁸ Muntu wa Nzambi wakasemena ha buihi, wakambila mukulenge wa Isalele ne, Yehowa udi wamba ne, Bualu bua Bena Sulia bakamba ne, Yehowa udi nzambi wa ku mikuna, kadi kena nzambi wa mu bibanda, ka meme nenfile tshisumbu etshi tshionso tshinene mu bianza biebe, ne wewe neumanye ne, Meme ndi Yehowa.

²⁹ Bakashikama mu bitudilu biabo matuku muanda mutekete; kadi mu dituku dia muanda mutekete bakabanga kuluangana; Bena Isalele bakashiha Bena Sulia bakadi benda hanshi binunu lukama mu dituku dimue.

³⁰ Kadi bakuabo bakanyemena mu musoko wa Afeke lumbu luakahukila bantu binunu makumi abidi ne muanda mutekete bakadi bashala. Bene-hadada wakanyemena mu musoko, wakabuela mu tshisokomenu munda mua nsubu.

³¹ Bantu bandi bakalua kudiye, bakamuambila ne, Mona, tuakunvua lumu ne, Bakelenge ba Bena Isalele badi bakelenge ba luse; tudi tukusengelela ne, Bimpe tuluate bilulu bikayabala mu bifuka bietu, tusuike mionshi ku mitu yetu, tulubuke kudi mukelenge wa Isalele; bumue neasungile muoyo webe.

³² Nunku bakaluata bilulu bikayabala mu bifuka biabo, bakasuika mionshi ku mitu yabo, bakalubuka kudi mukelenge wa Isalele, bakamuambila ne, Muntu webe Bene-hadada udi wamba ne Ndi nkusengelela ne, unshiye ne muoyo. Wakakonka ne, Yeye utshidi ne muoyo, anyi? Yeye udi muanʼetu.

³³ Bantu aba bakateleja matshu abo bimpe bua kujingululabo mei akambeye; nunku bakambilangana ne, E, muanʼenu, Bene-hadada. Hashishe yeye wakabambila ne, Yai, numubikile. Hashishe Bene-hadada wakalubuka kudiye; yeye wakamushikika mu dikalu diandi.

³⁴ Bene-hadada wakamuambila ne, Nenkuhingishile misoko yakanyenga tatu wanyi kuai tatu webe; wewe neudilongoluele misesu mu Damaseke, bu muakadilongoluela tatu wanyi mu Samalea. Ahaba wakamuambila ne, Nenkulekele bua tshihungidi etshi. Nunku wakahunga nʼandi tshihungidi, wakandekela.

³⁵ Muntu mukuabo wa bana ba balume ba baprofete wakambila mukuandi dî dia Yehowa ne, Ndi nkusengelela ne, Untute. Kadi muntu wakahidia kumututa.

³⁶ Hashishe yeye wakamuambila ne. Bualu bua wewe wakahidia dî dia Yehowa, mona, hawaya ha bule, nyama wa ntambue neakushihe. Hakumukeye kudiye, nyama wa ntambue wakasangila nʼandi, wakamushiha.

³⁷ Hashishe yeye wakasangila ne muntu mukuabo, wakamuambila ne, Ndi nkusengelela ne, Untute. Muntu wakamututa, wakamutaha mputa.

³⁸ Nunku muprofete au wakumuka, wakalamina mukelenge mu nshila, wakasuika tshilulu ku mesu andi, wakadifuanyikisha bu muntu mukuabo.

³⁹ Hakahita mukelenge, yeye wakadila kudi mukelenge, wakamba ne, Muntu webe wakaya munkatshi mua nvita; mona, muntu mukuabo wakalua kundi ne munga muntu, wakangambila ne, Ulame muntu eu; biajimineye, nebalombe muoyo webe ku muoyo wandi, anyi wewe neufute ntalanta wa argent.

⁴⁰ Hakadi muntu webe ne malu a bungi eku ne eku, yeye wakumuka. Mukelenge wa Isalele wakamuambila ne, Kulumbulula kuebe nekuikale nunku, wewe wakadikosela tshilumbu.

⁴¹ Nunku wakumusha tshilulu ku mesu andi lubilu, ne mukelenge wakamumanya ne, Udi wa baprofete.

⁴² Muprofete wakamuambila ne, Yehowa udi wamba ne, Bualu bua wewe wakalekela mu bianza biebe muntu unakasua kushiha, nunku nebalombe muoyo webe ku muoyo wandi ne bantu bebe ku bantu bandi.

⁴³ Mukelenge wa Isalele wakaya ku nsubu kuandi mubungame ne mutshima muneme bujitu, wakafika ku Samalea.