1 Bakalenga 17 - Mukanda wa Nzambi Dihungila Dikulukulu ne Dihungila Dihia-dihia 2003

Eliya Udi Wamba bua Munanga Ulualua

¹ Eliya, Muena Tishebe, wakadi usomba mu Gilada, wakambila Ahaba ne, Bu mudi Yehowa, Nzambi wa Isalele, ne muoyo, undi ngimana ku mpala kuandi, nansha mume nansha nvula kabiena bimueneka bidimu ebi anu ku dî dianyi.

² Di dia Yehowa diakalua kudi Eliya ne,

³ Umuke kunoko, uye ku esete, usokome hehi ne kasulu ka Kelita kadi ku mpala kua Yadene.

⁴ Udi mua kunua mai a mu kasulu aka; nakuelela bikololo mukenji bua kukudishabi kuinaku.

⁵ Nunku yeye wakaya, wakenza bu muakadi dî dia Yehowa; nunku wakaya, wakashikama ku kasulu ka Kelita kakadi ku mpala kua Yadene.

⁶ Bikololo biakalua kudiye ne dinda ne bidia ne munyinyi, biakalua habi kabidi dilolo; wakanua mai a mu kasulu.

⁷ Hakahita matuku makuabo, mai a mu kasulu akûma, bualu bua nvula kayakaloka ha buloba.

Eliya ne Mukashi wa mu Lufuila wa ku Salefata

⁸ Dî dia Yehowa diakalua kudiye ne,

⁹ Juka biebe, uye ku Salefata wa mu buloba bua Sidona, sombaku, bualu bua nakelela mukashi wa mu lufuila mukenji bua kukudisha kuinaku.

¹⁰ Nunku wakajuka, wakaya ku Salefata; hakafikeye ku tshibi tshia musoko, wakatangila mukashi wa mu lufuila wakadi wangula nkunyi; wakamubikila, wakamuambila ne, Ndi nkusengelela ne, Untuntshile tuima tukese mu dikoho, nnueku.

¹¹ Hakadiye uya bua kumutuntshila, yeye wakamubikila kabidi ne, Ndi nkusengelela ne, Untuadile tshikese tshia bidia mu tshianza tshiebe.

¹² Yeye wakamuambila ne, Bu mudi Yehowa, Nzambi webe, ne muoyo tshiena ne bidia, kadi ndi ne anu dianza tente dia bukula mu mulondo ne manyi tukese mu kasu; tangila, ndi ngangula tutshi tubidi bua meme kudilambila ne muana wanyi, hatuadia, netufue.

¹³ Eliya wakamuambila ne, Kutshinyi, ya, wenze bu muwakuamba, kadi udianjile kundambila meme bidia bikese, ulue nʼabi kundi, hashishe udilambile ne muana webe.

¹⁴ Bualu bua Yehowa, Nzambi wa Isalele, udi wamba ne, Bukula bua mu mulondo kabuena bushika, ne tuanyi tua mu kasu katuena tukeha tô ne ku dituku diatuma Yehowa nvula ha buloba.

¹⁵ Wakaya, wakenza bu mu dî dia Eliya; ne yeye ne mukashi ne bonso ba mu nsubu wandi bakabidia matuku a bungi.

¹⁶ Bukula abu kabuakashika ne tuanyi tua mu kasu katuakakeha bu muakadi dî dia Yehowa diakambeye mukana mua Eliya.

¹⁷ Ku nyima kua malu â, muana wa balume wa mukashi eu, muena nsubu, wakasama; disama edi diakamuhita bukole, kakadi ne muhuya munda muandi kabidi.

¹⁸ Mukashi wakakonka Eliya ne, Ndi nʼebe bualu kai, wewe muntu wa Nzambi? Wewe wakuluila bua kunvuluisha bua bubi buanyi ne bua kushiha muanʼanyi!

¹⁹ Yeye wakamuambila ne, Umpe muanʼebe mulume. Yeye wakamuangata mu tshiadi tshia mamu wandi, wakaya nʼandi mu nsubu muakadiye mulale, wakamuladika ha bulalu buandi.

²⁰ Yeye wakatendelela Yehowa, wakamba ne, Yehowa, Nzambi wanyi, wewe wakenzela mukashi wa mu lufuila undi mushikame nʼandi bibi bua kushiha muanʼandi mulume, anyi?

²¹ Yeye wakadiolola hamʼbidi ha muana misangu isatu, wakadila kudi Yehowa ne, Yehowa, Nzambi wanyi, ndi nkusengelela ne, Hingisha muoyo wa muana eu munda muandi kabidi.

²² Yehowa wakunyua dî dia Eliya, muoyo wa muana wakahingana munda muandi kabidi, yeye wakatuluka.

²³ Eliya wakangata muana, wakatuluka nʼandi mu muaba wandi, wakabuela nʼandi mu nsubu, wakaya nʼandi kudi mamu wandi; Eliya wakamuambila ne, Tangila, muana webe udi ne muoyo.

²⁴ Mukashi wakambila Eliya ne, Katataka ndi mumanye ne, Wewe udi muntu wa Nzambi ne dî dia Yehowa didi mukana muebe didi dilelela.