1 Bakalenga 15 - Mukanda wa Nzambi Dihungila Dikulukulu ne Dihungila Dihia-dihia 2003

Bukokeshi bua Abiyama

¹ Mu tshidimu tshia dikumi ne muanda mukulu tshia bukelenge bua Yalobama, muana wa Nebata, Abiyama wakabanga kukokesha mu Yuda.

² Wakakokesha mu Yelushalema bidimu bisatu; dina dia mamu wandi diakadi Mâka, muana wa bakashi wa Abashaloma.

³ Yeye wakenza malu mabi onso akenza tatu wandi ku mpala kuandi; mutshima wandi kawakadi muakane ku mesu kua Yehowa, Nzambi wandi, bu muakadi mutshima wa Davidi, tatu wandi.

⁴ Kadi bualu bua Yehowa, Nzambi wandi, wakavuluka Davidi, wakamuha muinda mu Yelushalema bua kuhingisha muanʼandi wa balume ku nyima kuandi, ne bua kujadikeye Yelushalema.

⁵ Bualu bua Davidi wakenza malu mimpe ku mesu kua Yehowa matuku onso a muoyo wandi; yeye kakasesuka mu dî diakamuambileye matuku andi onso anu bualu bua Uliya, Muena Hiti.

⁶ Lehabama ne Yalobama bakaluangana nvita matuku onso a muoyo wabo.

⁷ Bienzedi bia Abiyama bikuabo ne malu onso akenzeye kabiena bifunda mu mukanda wa kulondolola kua malu a bakelenge ba Yuda, anyi? Abiyama ne Yalobama bakaluangana nvita.

⁸ Abiyama wakalala tulu ne bankambua bandi; bakamujika mu musoko wa Davidi; Asa, muanʼandi wa balume, wakakokesha mu muaba wandi.

Bukokeshi bua Asa

⁹ Mu tshidimu tshia makumi abidi tshia bukelenge bua Yalobama, mukelenge wa Isalele, Asa wakabanga kukokesha mu Yuda.

¹⁰ Yeye wakakokesha mu Yelushalema bidimu makumi anai ne tshimue; dina dia mamu wandi diakadi Mâka, muana wa bakashi wa Abashaloma.

¹¹ Asa wakenza malu mimpe ku mesu kua Yehowa bu muakenza Davidi, tatu wandi.

¹² Yeye wakihata bena Sodoma mu buloba, wakumusha mpingu yonso yakenza batatuʼandi.

¹³ Yeye kabidi wakumusha Mâka, mamu wandi, mu nkuasa wa mukelenge mukashi, bualu bua yeye wakenzela Bashela luhingu lua bundu; Asa wakataha luhingu luandi, wakaluosha kahia hehi ne kasulu ka Kidilona.

¹⁴ Kadi kabakumusha bitendelelu bionso biakadi ku mutu kua mikuna; kadi mutshima wa Asa wakadi muakane kudi Yehowa matuku andi onso.

¹⁵ Yeye wakahingisha bintu biakajidila tatu wandi ne bintu biakajidileye kabidi, bintu bia argent ne bia or ne malonga makuabo mu nsubu wa Yehowa. (2 Kul. 16.1-14)

Tshihungidi tshia Asa ne Bene-hadada

¹⁶ Asa ne Bâsha, mukelenge wa Isalele, bakaluangana nvita matuku abo onso.

¹⁷ Bâsha, mukelenge wa Isalele, wakaluangana ne Bena Yuda, wakasa musoko wa Lama, bua muntu kabuedi, kaluhuki kudi Asa, mukelenge wa Yuda.

¹⁸ Hashishe Asa wakangata bintu bionso bia argent ne bia or biakadi bishale mu bibutshilu bia mu nsubu wa Yehowa ne mu nsubu wa mukelenge, wakabifila mu bianza bia bantu bandi; mukelenge Asa wakabatuma kudi Bene-hadada, muana wa Tabelimona, muana wa Hezeyona, mukelenge wa Sulia, wakadi ushikama mu Damaseke, bamba ne,

¹⁹ Tshihungidi tshikale hankatshi hetu nʼebe bu muakaditshi hankatshi ha tatu wanyi ne tatu webe; ndi nkutumina argent ne or; ya biebe, ushihe tshihungidi tshiwakahunga ne Bâsha, mukelenge wa Isalele, bua yeye Umuke kundi.

²⁰ Bene-hadada wakunvua dî dia mukelenge Asa; wakatuma tupitene tua masalayi andi bua kuluanganabo ne misoko ya Bena Isalele; yeye wakahana Iyona ne Dana ne Abele-bete-mâka, ne buloba buonso bua Kinelota ne buloba buonso bua Nafatale.

²¹ Hakunvua Bâsha lumu elu, yeye wakalekela kuasa Lama, wakashikama mu Tîsa.

²² Hashishe mukelenge Asa wakela dî kudi Bena Yuda bonso, nansha muntu umue kashadi. Bakangata mabue a ku Lama ne mabaya akadi Bâsha wasa nʼau; mukelenge Asa wakasa nʼau Geba wa mu Benyamina ne Misepa.

²³ Bienzedi bia Asa bikuabo biakenzeye ne bukole buandi buonso ne malu onso akenzeye ne misoko yakaseye kabiena bifunda mu mukanda wa kulondolola kua malu a bakelenge ba Yuda, anyi? Hakadiye muntu mununu, disama diakamukuata ku makasa andi.

²⁴ Asa wakalala tulu ne bankambua bandi, bakamujika mu lukita lua batatu bandi mu musoko wa Davidi, tatu wandi. Yehoshafata, muanʼandi wa balume, wakakokesha mu muaba wandi.

Bukokeshi hua Nadaba

²⁵ Nadaba, muana wa Yalobama, wakabanga kukokesha mu Isalele mu tshidimu tshibidi tshia bukelenge bua Asa, mukelenge wa Yuda; yeye wakakokesha mu Isalele bidimu bibidi.

²⁶ Wakenza malu mabi ku mesu kua Yehowa, wakenda mu nshila wa tatu wandi ne mu malu mabi andi akenzesheye Bena Isalele.

²⁷ Bâsha, muana wa Ahiya, wa mu tshisamba tshia Yisakâ, wakamuelela tshifufu. Bâsha wakamushiha ku musoko wa Gibetona mu buloba bua Bena Peleshete, bualu bua Nadaba ne Bena Isalele bonso bakatshintshimika musoko wa Gibetona.

²⁸ Mu tshidimu tshisatu tshia bukelenge bua Asa, mukelenge wa Yuda, Bâsha wakamushiha, wakakokesha mu muaba wandi.

²⁹ Hakahinganeye mu bukelenge, yeye wakashiha bonso ba mu nsubu wa Yalobama; yeye kakashila Yalobama muntu umue ne muoyo; yeye wakabashiha bonso bu mu dî dia Yehowa diakambeye mukana mua muntu wandi Ahiya, Muena Shilo;

³⁰ bualu bua malu mabi akenza Yalobama ne akenzesheye Bena Isalele ne bua tshiji tshiakafuisheye Yehowa, Nzambi wa Isalele.

³¹ Bienzedi bia Nadaba bikuabo ne malu onso akenzeye kabiena bifunda mu mukanda wa kulondolola kua malu a bakelenge ba Isalele, anyi?

³² Asa ne Bâsha, mukelenge wa Isalele, bakaluangana nvita matuku onso a muoyo wabo.

Bukokeshi bua Bâsha

³³ Mu tshidimu tshisatu tshia bukelenge bua Asa, mukelenge wa Yuda, Bâsha, muana wa Ahiya, wakabanga kukokesha Bena Isalele mu Tîsa; wakabakokesha bidimu makumi abidi ne binai.

³⁴ Wakenza malu mabi ku mesu kua Yehowa; wakenda mu nshila wa Yalobama ne mu malu mabi akenzesheye Bena Isalele.