1 Bakalenga 11 - Mukanda wa Nzambi Dihungila Dikulukulu ne Dihungila Dihia-dihia 2003

Solomo Udi Ulekela Yehowa; Bena Lukuna Bandi Badi Bumueneka

¹ Mukelenge Solomo wakananga bakashi ba bende ba bungi, basangisha ne muana mukashi wa Palô; bakashi ba Bena Moaba ne ba Bena Amona ne ba Bena Edome ne ba Bena Sidona ne ba Bena Hiti;

² bakadi ba mu bisamba bakambila Yehowa Bena Isalele ne, Kanubuelakanyi nʼabo, ne bobo kabalu kunudi nansha, bualu bua bobo nebakudimushe mitshima yenu bua kulonda nzambi yabo; Solomo wakalamata bakashi aba mu dinanga.

³ Wakadi ne bakashi nkama muanda mutekete, bana ba bakelenge ne bakashi bahika bakabakeye nkama isatu; bakashi bandi bakakudimusha mutshima wandi.

⁴ Bualu bua hakalua Solomo muntu mununu, bakashi bandi bakakudimusha mutshima wandi bua kulondeye nzambi mikuabo; mutshima wandi kawakadi muakane ku mesu kua Yehowa, Nzambi wandi, bu muakadi mutshima wa Davidi, tatu wandi.

⁵ Bualu bua Solomo wakalonda Bashetelota, nzambi mukashi wa Bena Sidona, ne Milekoma, bundu bua Bena Amona.

⁶ Solomo Wakenza malu mabi ku mesu kua Yehowa; yeye kakatamba kunanukila kulonda Yehowa bu muakenza Davidi, tatu wandi.

⁷ Hashishe, Solomo wakashila Kemosha, bundu bua Bena Moaba, tshitendelelu ha mutu ha mukuna udi ku mpala kua Yelushalema, ne tshia Moleke, bundu bua Bena Amona.

⁸ Wakenzela bakashi bandi ba bende diatshimue, bakadi boshila nzambi yabo musenga wa manananshi ne bakayishihela nyama kabidi.

⁹ Yehowa wakadi ne Solomo tshiji, bualu bua mutshima wandi wakumuka kudi Yehowa, Nzambi wa Isalele, nguakamueneka kudiye misangu ibidi,

¹⁰ nguakamuambila bualu ebu mene mene bua yeye kalondi nzambi mikuabo; kadi yeye kakenza muakamba Yehowa.

¹¹ Yehowa wakambila Solomo ne, Bualu bua wewe wakatamba kuenza nunku, kuakatumikila tshihungidi tshietu ne mei anyi binakukuambila, bulelela, nenunyenge bukelenge, nembuhe muntu webe.

¹² Kadi tshiena ngenza bualu ebu mu matuku ebe, bualu bua Davidi tatu webe; kadi nembunyenge mu bianza bia muanʼebe mulume.

¹³ Kadi tshiena nkunyenga bukelenge buonso nansha, nempe muana webe tshisamba tshimue bualu bua Davidi, muntu wanyi, ne bua Yelushalema unakusungula.

¹⁴ Yehowa wakabisha Solomo muena lukuna, dina diandi Hadada, Muena Edome: wakadi muana wa mukelenge wa Bena Edome.

¹⁵ Bualu bua hakadi Davidi mu Edome, ne hakaya Yoaba, kapitene ka masalayi, bua kujikeye bantu bafue, bakashihabo mulume yonso mu Edome

¹⁶ (bualu bua Yoaba ne Bena Isalele bonso bakashalaku ngondo isambombo bua kushihabo balume ba Bena Edome bonso);

¹⁷ kadi Hadada ne bantu bakuabo ba tatu wandi bakanyemena mu Ejipitu; Hadada wakatshidi muana mukese.

¹⁸ Bakahitshila mu buloba bua Midiyana, bakafika ku Palana; bakangata bantu ba mu Palana, bakafika nʼabo mu buloba bua Ejipitu ku mesu kua Palô, mukelenge wa Ejipitu; yeye wakamuha nsubu ne bintu bia kudia ne madimi.

¹⁹ Hadada wakasangana luse lunene ku mesu kua Palô, wakamuha bukonde buandi bu mukashi wandi, yeye wakadi muanʼabo ne Tapenese, mukelenge mukashi.

²⁰ Muanʼabo ne Tapenese wakamulelela muana mulume dina diandi Genubata; Tapenese wakamujidike mabele mu nsubu wa Palô; Genubata wakadi mu nsubu wa Palô munkatshi mua bana bandi ba balume.

²¹ Hakunvua Hadada lumu mu Ejipitu ne, Davidi wakalala tulu ne bankambua bandi, ne Yoaba, kapitene ka masalayi andi, wakafua, Hadada wakambila Palô ne, Witabushe bua meme kumuka bua kuhingana ku buloba buanyi.

²² Palô wakamuebesha ne, Wakadi ne tshintu kai bualu hawakashikama nʼanyi bua wewe udi musue kuhingana ku buloba buebe? Yeye wakamukudimuna ne, Nansha tshintu; kadi anji kuitabusha bua meme kuya.

²³ Nzambi wakalambishila muena lukuna mukuabo, dina diandi Lesona, muana wa Eliada, wakanyema kudi mukelenge wandi Hadadezê, mukelenge wa mu Soba.

²⁴ Yeye wakadisangisha bantu kudiye, wakalua kapitene kabo, bakabashiha Davidi mu Soha; hashishe, bakaya ku Damaseke, bakashikamamu, ne yeye wakakokesha mu Damaseke.

²⁵ Yeye wakadi muena lukuna wa Bena Isalele matuku onso a Solomo; wakabenzela malu mabi ba mutu ha malu akabenzela Hadada; yeye wakalengulula Bena Isalele, wakakokesha mu Sulia.

²⁶ Yalobama, muana wa Nebata, Muena Efelayima wa mu Zeleda, wakadi muntu wa Solomo, ne mamu wandi wakadi Seluya, mukashi wa mu lufuila, wakatombokela mukelenge kabidi.

²⁷ Ebu mbualu buakatombokeleye mukelenge: Solomo wakasa musoko wa Milo, wakalongolola lumbu lua ku musoko wa Davidi, tatu wandi.

²⁸ Muntu eu Yalobama wakadi muntu mukole wa bukitu; Solomo wakatangila ne, Nsongalume eu udi unanukila mu mudimu wandi, nunku wakamuteka ku mutu kua bena mudimu bonso ba mu Bena Yosefe.

²⁹ Mu matuku äu hakumuka Yalobama mu Yelushalema, Ahiya muprofete, Muena Shilo, wakamusangana mu nshila; Ahiya wakadi muluate tshilulu tshihia-tshihia; bubidi buabo bakadi ha nkayabo mu tshisuku.

³⁰ Ahiya wakangata tshilulu tshihia-tshihia tshiakadiye nʼatshi, wakatshihandulula bihese dikumi ne tubidi.

³¹ Yeye wakambila Yalobama ne, Angata bihese dikumi, bualu bua Yehowa, Nzambi wa Isalele, udi wamba ne, Mona, nenyenge bukelenge mu bianza bia Solomo, nenkuhe wewe bisamba dikumi

³² (kadi yeye neikale ne tshisamba tshimue bualu bua Davidi, muntu wanyi, ne tshikuabo bua Yelushalema, musoko unakasungula munkatshi mua bisamba bionso bia Bena Isalele),

³³ bualu bua bobo bakundekela, bakutendelela Bashetoleta, nzambi mukashi wa Bena Sidona, ne Kemosha, nzambi wa Bena Moaba, ne Milekoma, nzambi wa Bena Amona; kabakuenda mu nshila yanyi, bua kuenzabo malu adi mimpe ku mesu kuanyi ne bua kutumikilabo mei anyi ne mikenji yanyi bu muakenza Davidi tatu wandi.

³⁴ Kadi tshiena nyenga bukelenge buonso mu bianza biandi: nemmuvuishe mukelenge matuku andi onso bualu bua Davidi, muntu wanyi unakasungula, nuakatumikila mikenji yanyi ne mei anyi;

³⁵ kadi nenyenge bukelenge mu bianza bia muanʼandi mulume, nembufile kûdi, mbisamba dikumi mene mene.

³⁶ Nempe muanʼandi tshisamba tshimue, bua Davidi, muntu wanyi ikale ne muinda utema ku mesu kuanyi mu Yelushalema matuku onso, musoko unakasungula bua kutekamu dina dianyi.

³⁷ Nenkusungile, bua wewe kukokesha bantu bu mudi mutshima webe musue; wewe newikale mukelenge wa Isalele.

³⁸ Biunvua mei onso andi nkuambila, biwenda mu nshila yanyi bua kuenza malu adi mimpe ku mesu kuanyi, ne hua kutumikila mei anyi ne mikenji yanyi bu muakenza muntu wanyi Davidi, nengikale nʼebe, nenjadike tshiota tshiebe bulelela, bu munakajadika tshiota tshia Davidi; nenkuhe wewe Bena Isalele.

³⁹ Bua bualu ebu nenkengeshe bana ba Davidi; kadi tshiena mbakengesha tshiendelele.

⁴⁰ Solomo wakakeba mua kushiha Yalobama, kadi Yalobama wakumuka ne wakanyemena mu Ejipitu kudi Shishaka, mukelenge wa Ejipitu; wakashala mu Ejipitu tô ne hakafua Solomo.

Lufu Lua Solomo

⁴¹ Bienzedi bikuabo bia Solomo ne malu onso akenzeye ne meji andi kabiena bifunda mu mukanda wa bienzedi bia Solomo, anyi?

⁴² Solomo wakakokesha Bena Isalele bonso mu Yelushalema bidimu makumi anai.

⁴³ Solomo wakalala tulu ne bankambua bandi, wakajikibua mu musoko wa Davidi, tatu wandi; Lehabama, muanʼandi wa balume, wakakokesha mu muaba wandi.