Malaki 4 - Tshwa Bible

¹ Hakuva langutani, a siku gata, legi gi to vura ku fana ni pingo ga nzilo. Vontlhe a vamatshanza ni vontlhe a vamahi va kubiha va ta fanana ni byanyi gi womileko. A siku legi gi tako gi ta va hisa, ku wula Jehova wa tiyimpi, gi nga ta va siyela mutsu hambu liravi.

² Kanilezi nwina lava mu chavako vito ga mina mu ta tsuwukelwa hi gambo ga kululama, na gi hi ni kuhanyisa tipapeni ta gona. Mu ta huma mu khana ku fanana ni marole ma tlhatlhekileko rangeni.

³ Mu ta kanzihela a vakubiha, hakuva va ta fanana ni khuma lahasi ka mikonzo ya nwina, a sikwini legi nzi ta nga tira a ntiro wa mina, ku wula Jehova wa tiyimpi.

⁴ Alakanya a nayo wa Mosi a nanza ga mina, lowu nzi wu leleteleko ka vontlhe va ka Israeli ha yena le Horebe, zi nga zilayelo ni zileletelo. Ekso. 20:1; Deut. 6:1; Maheb. 3:5

⁵ Langutani, nzi ta mu rumela muprofeti Elija hi mahlweni na gi nga se kuta a siku ga Jehova, leʼga hombe gi chavisekako. Mat. 11:14; Mar. 9:11; Lu. 1:17

⁶ I ta tlhelisa a timbilu ta vadadani ka vanana vabye, ni timbilu ta vanana ka vadadani vabye, kasi nzi ngati nzi ta ba a tiko hi nzhukano. Mika 7:6