Levi 16 - Tshwa Bible

A siku ga nzhiho.

¹ Jehova i lo wulawula ka Mosi anzhako ka kufa ka vana vambiri va Aroni, lava va ngafa a siku va nga tshinela mahlweni ka Jehova.

² Jehova i te ngalo ka Mosi; Byela nakuloni Aroni, lezaku a nga dzuki a enghena zontlhe zikhati lomu ka wutshamu ga kubasa, lomu nzeni ka nguwo leyi yi sirelako, a mahlweni ka xitshamu xa wuxinji lexi xi nga laha ka arke, a nga dzuka afa; hakuva nzi ta ti wonekelisa hi refu le hehla ka xitshamu xa wuxinji.

³ Aroni i ta enghena wutshanwini ga kubasa hi ndlela leyi: I ta teka a nkuzi ya muphahlelo wa kuonha, ni hamba ya muphahlelo wa kuhiswa.

⁴ I ta ambala a hembe go basa ga wukene, a ambala ni bhuluku ga wukene kasi ku fihla wumbyiri gakwe, a ti boha a bhandi ga wukene, a vekela a xihuku xa wukene laha hlokweni. Leti tinguwo to basa; hikwalaho i ta ranga hi ku hlamba lomu matini, zonake a ambala.

⁵ A hlengeletano wa vanana va ka Israeli va ta mu nyika timhongo timbiri ta muphahlelo wa kuonha ni hamba yinwe ya muphahlelo wa kuhiswa.

⁶ Aroni i ta humesa a nkuzi yakwe ya muphahlelo wa kuonha, a ti mahela a nzhiho zinwe ni ngango wakwe.

⁷ Zonake i ta teka a timhongo timbiri, a ti neha mahlweni ka Jehova laha nyangweni ya tabemakeli ga mutlhangano.

⁸ Zonake Aroni i ta hlahluvela a timhongo leti ta timbiri kasi ku tiva leyi yi ta ngava ya Jehova, ni leyi yi ta ngava ya Azazeli.

⁹ Zonake Aroni i ta neha a mhongo leyi yi khomilweko hi tihlolo akuva ya Jehova, a maha ha yona a muphahlelo wa kuonha.

¹⁰ Kanilezi a mhongo leyi yi khomilweko hi tihlolo a kuva ya Azazeli, yi ta nehiwa laha xikari mahlweni ka Jehova na yi hanya, ku mahiwa nzhiho ha yona, zonake va yi tsika yi famba xiwuleni, yi maha ya Azazeli.

¹¹ Na Aroni i ta neha a nkuzi ya muphahlelo wa kuonha, leyi yakwe wutsumbu, a ti mahela a nzhiho zinwe ni ngango wakwe; a yi tlhava a nkuzi yakwe ya muphahlo wa kuonha.

¹² Zonake i ta teka a njhalo lowu wu teleko hi makhala ya nzilo ma humako hi lomu alatini mahlweni ka Jehova, ni mandla mambiri ma teleko hi libani lo nuhela li kuyilweko; na yena i ta neha lezi zilo lomu nzeni ka nguwo ya xisirelo; Maheb. 9:7

¹³ Yena i ta chela a libani laha makhaleni mahlweni ka Jehova, kasi a refu ga musi wa libani gi fela ku fenengeta a xitshamu xa wuxinji lexi xi nga hehla ka Wumboni, kasi a ngafi.

¹⁴ Zonake i ta teka a nkhata wa nkuzi hi litiho lakwe a nwatsekela ha wona hehla ka xitshamu xa wuxinji, hi le Mutsuwuka-gambo; a nwatsekela ha wona ntlhanu wa zikhati ni zimbiri hi litiho, mahlweni ka xitshamu xa wuxinji. Maheb. 10:4

¹⁵ Zonake i ta tlhava a mhongo leyi yi lumbako a vanhu, a maha muphahlelo wa kuonha, ni ku neha a nkhata wa yona lomu nzeni ka nguwo ya xisirelo; na yena i ta maha hi nkhata lowu kota lezi a mahileko hi nkhata wa nkuzi; a nwatsekela ha wona le hehla ka xitshamu xa wuxinji ni mahlweni ka xona.

¹⁶ Na yena i ta mahela nzhiho a wutshamu gi basileko hi kota ya kungahlazeki ka vanana va ka Israeli, hi kota ya kuonha kabye. I ta maha lezo zilo kambe hi kota ya tabemakeli ga mutlhangano legi gi tshamako xikari ka lezi zi nga hlazekangiko ka vona;

¹⁷ ge ni munhu munwe a nga tava kona lomu ka tabemakeli ga mutlhangano a siku lego a enghenako ku maha muphahlo wa nzhiho lomu ka wutshamu ga kubasa, kala a huma. Lezo i ta ti mahela nzhiho zinwe ni ngango wakwe, ni ntlhangano wontihe wa ka Israeli.

¹⁸ Makunu loku a humile, i taya lomu ka alati legi gi nga mahlweni ka Jehova, aya gi mahela a nzhiho; a teka a nkhata wa nkuzi, ni nkhata wa mhongo, a wu tota matlhelo wontihe ya timhonzo ta alati.

¹⁹ Zonake i ta gi nwatsekela hi nkhata hi litiho ntlhanu wa zikhati ni zimbiri; a gi maha gi hlazeka ni ku gi basisa hi kota ya kungahlazeki ka vanana va ka Israeli.

²⁰ Loku a mbhetile ku maha a nzhiho wa wutshamu ga kubasa, ni wa tabernakeli ga mutlhangano, ni wa alati, zonake i ta neha a mhongo leyi yi hanyako.

²¹ Aroni i ta tlhateka mandla yakwe laha hlokweni ya mhongo leyi yi hanyako, zonake i ta wulela hehla ka yona zontlhe zionho za vanana va ka Israeli, ni milanzu yabye yontlhe, hambu ni xihi xihambuko i ta xi veka hlokweni ya mhongo, zonake yi ta heleketwa le xiwuleni hi munhu loyi a yimiselweko ntiro lowo.

²² A mhongo yi ta rwala hehla ka yona zontlhe zionho zabye yi famba nazo le xiwuleni; zonake a munhu loye i taya tsika a mhongo le xiwuleni.

²³ Anzhako ka lezo Aroni i ta enghena lomu ka tabemakeli ga mutlhangano, a susa a tinguwo leti ta wukene a nga wa ambele kuengheneni kakwe lomu ka wutshamu ga kubasa, a ti veka lomo.

²⁴ Zonake i ta hlamba miri lomu ka wutshamu ga kubasa, a ambala a tinguwo takwe, a huma; zonake a nyikela muphahlelo wa kuhiswa wa wutsumbu gakwe ni wa vanhu, a ti mahela a nzhiho zinwe ni vanhu;

²⁵ zonake i ta hisa a mafura ya muphahlelo wa kuonha laha alatini.

²⁶ Kasike inaloyi a nga heleketa a mhongo ya Azazeli, i ta hlaza a tinguwo takwe, a hlamba miri wakwe lomu matini, zonake a ta enghena lomu wugovelweni.

²⁷ A nkuzi ni mhongo, lezi za muphahlelo wa kuonha, lezi a nkhata wa zona wu nga yiswa lomu ka wutshamu ga kubasa a kuya mahiwa nzhiho, zi ta yiswa lahandle ka wugovelo; a mabhebhe ya kona ni nyama ya kona ni swanyi wa kona zi ta hiswa laha nzilweni.

²⁸ Loye a toya zi hisa i ta hlaza tinguwo takwe, a hlamba miri wakwe lomu matini, zonake a wuya a ta enghena lomu wugovelweni.

²⁹ Lowu wu tava nayo wa kala kupinzuka a ka nwina: Hi hweti ya wuntlhanu ni timbiri, ka siku ga wukhume ga hweti, nwina mu ta va ni hlo mulo, mu nga tiri ni ntiro munwe, hambu ni wa ka nwina, hambu ni wamatiko loyi a luvelako xikari ka nwina.

³⁰ Hakuva ka legi siku mu ta mahelwa a nzhiho kasi mu basiswa; mu ta basiswa zionho za nwina zontlhe mahlweni ka Jehova.

³¹ Gi tava siku ga kuhumula xikari ka nwina, na mu kari mu hi ni hlomulo; lexi xileletelo xa kala kupinzuka.

³² A muphahlelo wu ta mahiwa hi mupristi loyi a totilweko kasi ku teka xikhundla xa raru wakwe; na yena i ta ambala a tinguwo to basa ta wukene.

³³ I ta maha a nzhiho wa wutshamu ga kubasa, a maha ni nzhiho wa tabemakeli ga mutlhangano, ni nzhiho wa alati; a maha ni nzhiho wa vapristi ni wa vanhu vontlhe va hlengeletano.

³⁴ Lexi xi tava xileletelo xa nwina xa kala kupinzuka, lezaku a vana va ka Israeli va mahelwa a nzhiho kanwe hi lembe, kasi va fela ku ruliwa zontlhe zionho zabye. Yena i lo maha khwatsi hi lezi Jehova a leleteleko Mosi.