Joxua 19 - Tshwa Bible

¹ A xiavelo xa wumbiri xi wa hi xa ka Simeoni, a lixaka la ka Simeoni hi mingango yabye: a tshomba yabye yi wa hi xikari ka tshomba ya vanana va ka Juda. Gen. 49:7

² Lomu ka tshomba yabye va na hi ni Bere-Xeba kutani Xeba, ni Molada;

³ ni Hazar-Xuali, ni Bala, ni Ezeme;

⁴ ni Eltoladi, ni Betuli, ni Horma;

⁵ ni Ziklagi, ni Betimarkabote, ni Hazarsusa;

⁶ ni Betiebaoti, ni Xaruheni; 13 wa miti ni zimitana za yona;

⁷ ni Aina, ni Rimoni, ni Etere, ni Axani; mune wa miti ni zimitana za yona;

⁸ ni zontlhe zimitana lezi zi renzetekelako a miti leyo kala le Baalatbeeri, lowu gi nga Rama ga le Dzongeni. Leyi hi tshomba ya lixaka la vanana va ka Simeoni hi mingango yabye.

⁹ A xiavelo xa vanana va ka Simeoni xi humele lomu ka xiavelo xa va ka Juda, hakuva a xiavelo xa vanana va ka Juda xi wa hunzeletile ku kula; hikwalaho a vanana va ka Simeoni va kumile a tshomba yabye lomu xikari ka tshomba ya ka Juda.

¹⁰ Xiavelo xa wunharu xi humile ka vanana va ka Zebuloni hi mingango yabye. A mbhingano wa tshomba yabye wu chikela le Saride.

¹¹ Wu kanziha hi le Muhlwa-gambo hi tlhelo ga Marala, kala wu chikela le Dabexete, wu ya chikela xicongwaneni lexi xi cuwukeneko ni le Jokeniame.

¹² Zonake wu suka le Saride wu kongoma Mutsuwuka-gambo hi le mbhinganweni wa Kisloti-Tabori, wu longoloka hi tlhelo ga Daberati, zonake wu kanziha le Jaha:

¹³ wu suka hi laho wu hunza hi le Mutsuwuka-gambo le Gat-Heferi ni le Et-Kazini, wuya le Rimoni, wu famba kala le Nea;

¹⁴ a mbhingano wu renzeleka hi le Nwalungu hi tlhelo ga le Hanatoni, zonake wu ya gumesa le nzhelelweni wa Iftaheli.

¹⁵ Kambe ku na ni Katati, ni Nahalali, ni Ximroni, ni Idala, ni Betlehema; 12 wa miti ni zimitana za yona.

¹⁶ Leyi hi tshomba ya vanana va ka Zebuloni hi mingango yabye: a miti leyo ni zimitana za yona.

¹⁷ Xiavelo xa wumune xi humile ka vanana va ka Isakari hi mingango yabye.

¹⁸ A mbhingano wabye wu wa hi le Jezreeli, ni Kesiloti, ni le Xunemu;

¹⁹ ni le Hafaraime, ni le Xioni, ni le Anaharati;

²⁰ ni le Rabiti, ni Kixoni, ni Ebezi;

²¹ ni Remeti, ni Enganimi, ni Enhada, ni Betpazaze;

²² a mbhingano wu famba kala wu chikela le Tabori, ni le Xahazima, ni le Betixemexe; zonake wu famba kala le Jordani: 16 wa miti ni zimitana za yona.

²³ Leyi hi tshomba ya lixaka la vanana va ka Isakari hi mingango yabye: hi yona miti leyo ni zimitana za yona.

²⁴ Xiavelo xa wuntlhanu xi humile ka lixaka la vanana va ka Axeri hi mingango yabye.

²⁵ A mbhingano wabye hi le Helkati, ni Kali, ni Betene, ni Akxafa;

²⁶ ni Alameleki, ni Amadi, ni Mixali; wona wu longoloka kala le Karmeli hi le Muhlwa-gambo ni Xihora-libnati;

²⁷ zonake wu tlhela hi le Mutsuwuka-gambo kusuhani na Beti-Dagoni, wu longoloka kala le Zebuloni ni le nzhelelweni wa Iftaheli, hi le Nwalungu wa Betemeka ni le Neieli, zonake wu ya huma hi laha kusuhani ka Kabule hi le Nwalungu.

²⁸ Ni kusuhani ni le Ebroni, ni Rehobi, ni Hamoni, ni Kana, kala wu chikela le Sidoni wa hombe;

²⁹ a mbhingano wu tlhela wuya le Rama, wu kala wu chikela le mutini wa khokhola ga Tire; zonake a mbhingano wu tlhelela le Hosa wu ya gumesa le bimbini, kusukela le Helebi kala le Akziba.

³⁰ Va nyikiwa ni Uma, ni Afeka, ni Rehoba: 22 wa miti ni zimitana za yona,

³¹ leyi hi tshomba ya lixaka la vanana va ka Axeri hi mingango yabye: a miti leyo ni zimitana za yona.

³² Xiavelo xa wuntlhanu ni xinwe xi humile ka vanana va ka Naftali hi mingango yabye.

³³ A mbhingano wabye wu sukela le Helefi, kusukela le ka terebinte wa kusuhani ni le Zaananima, wu hunza hi le Adami-Nekeba, ni Jabneeli, kala Lakuma, zonake wu gumesa le Jordani.

³⁴ A mbhingano wu tlhela wu cuwuka Muhlwa-gambo hi le Azno-Tabora, wu longoloka wu ya humela le Hukoki, kala le Zebuloni hi le Dzongeni wu kala wu chikela le Axeri hi le Muhlwa-gambo, ni ka Juda ni Jordani hi le Mutsuwuka-gambo.

³⁵ Ku wa hi ni miti ya makhokhola: Zidima, ni Zera, ni Hamati, ni Rakati, ni Kineroti;

³⁶ ni Adama, ni Rama, ni Hazori;

³⁷ ni Kedexi, ni Edrei, ni En-Hazora;

³⁸ ni Ironi, ni Migdalela, ni Horema, ni Bet-Anati, ni Bet-Xemexe; 19 wa miti ni zimitana za yona.

³⁹ Leyi hi tshomba ya lixaka la vanana va ka Naftali hi mingango yabye; a miti leyo ni zimitana za yona.

⁴⁰ Xiavelo xa wuntlhanu ni zimbiri xi lo huma ka lixaka la vanana va ka Dani hi mingango yabye.

⁴¹ A mbhingano wa tshomba yabye hi le Zora, ni Eztaoli, ni Irxemexe;

⁴² ni Xalabini, ni Ajaloni, ni Ithla;

⁴³ ni Eloni, ni Timna, ni Ekroni;

⁴⁴ ni Elteke, ni Gibetoni, ni Baalate;

⁴⁵ ni Jehuda, ni Bene-Beraki, ni Gati-Rimoni;

⁴⁶ ni Me-Jarkoni, ni Rakoni, ni tikwana gi nga mahlweni ka Jopa.

⁴⁷ A mbhingano wa vanana va ka Dani wu lo huma lahandle ka vona vontlhe va ka kabye, hakuva a vanana va ka Dani va lo huma va ya hlasela le Lexema, va wu khozisa, va wu hlasela hi matlhari, zonake wu maha wabye, va aka lomo; kala va ku chula vito ga Lexema ka Dani, hi vito ga Dani a raru wabye. Vala. 1:34; 18:27

⁴⁸ Leyi hi tshomba ya lixaka la vanana va ka Dani hi mingango yabye: a miti leyo ni zimitana ya zona.

⁴⁹ Makunu laha va nga wa mbhetile ku avela tiko hi mimbhingano ya gona, a vanana va ka Israeli va lo nyika ka Joxua nʼwana Nuni a xiavelo xa tshomba xikari kabye.

⁵⁰ Kota kuleletela ka Jehova, vona va lo mu nyika a muti wa Timnati-Sera wa le xitsungeni xa va ka Efraime, lowu a nga wa wu kombelile, yena i lo aka muti a tshama kona.

⁵¹ Leti hi titshomba leti ti avelweko hi Eliazari mupristi na Joxua nʼwana Nuni, ni tihosana leti ti nga vararu va tixaka ta vanana va ka Israeli, ti avelweko hi kuhlahluva le Xilo mahlweni ka Jehova, laha nyangweni ya tenda ga mutlhangano: zinghaho va lo mbheta a ku avela a tiko.