Joba 31 - Tshwa Bible

¹ Mina nzi mahile xivumelwano zinwe ni mahlo ya mina; Lezaku nzi nga dzuki nzi cuwuka a nhwana. Mat. 5:28

² Hakuva nzi wa ta wona a xiavelo muni ka Nungungulu le hehla ke? Nzi wa ta wona a tshomba muni le hehla ka Nyamintamu ke?

³ A kulobyiswa a ku yimiselwangi a vakubiha ke? Ni hlomulo ka vatiri va kugoha ke?

⁴ Yena a nga ti woni tindlela ta mina ke? A nga hlayi a zikanzihelo za mina zontlhe ke? 2 Kro. 16:9; Jer. 32:19

⁵ Loku nzi fambile hi ku hemba mawunwa, Ni loku a nkonzo wa mina wu hatlisile wuya kukhohliseni;

⁶ Ngha mina nzi vekiwa lomu xikalwini xi lulamileko; Kasi Nungungulu a ta zi tiva lezaku a nzi na nanzu.

⁷ Loku a nkonzo wa mina wu hambukile ndleleni, Ni loku a mbilu ya mina yi lanzela mahlo ya mina, Ni loku a bawa gi namarele mandleni ya mina;

⁸ Zonake nzi ta byala, zi giwa hi munwani; Ina, ngha a pfuno wa mina wu tsuwulelwa. Levi 26:16; Deut. 28:38

⁹ Loku a mbilu ya mina yi khohlisilwe hi wasati, Lezaku nzi xiyamele livatini la muakelane wa mina,

¹⁰ Zonake a sati wa mina ngha a gayela munwani, A vanwani va etlela naye.

¹¹ Hakuva lexo xionho xa hombe; Ina, kubiha loku ku faneleko ku tsayiswa hi valamuli. Deut. 22:22

¹² Hakuva kona i nzilo loʼwu hisako wu lovisa; Wu wa ta heta kontlhe kuanza ka mina.

¹³ Loku nzi onhile a nanza ga mina ga xinuna kutani ga xisati, Laha vona va nga wa kanetisana na mina;

¹⁴ Nzi ta kuyini laha Nungungulu a ta nga nzi vukela? Ni loku a nzi ranisa nzi ta hlamula yini?

¹⁵ Loyi a mahileko mina rumbyini ga mamani, a hi yena a va mahileko ke? A hi munwe ntsena a hi mahileko lomu rumbyini ke? Efe. 6:9

¹⁶ Loku nzi alele zisiwana kuxuva ka zona, Nzi cuwuka a wasati wa noni a kala a karala mahlo;

¹⁷ Kutani nzi gile kuga ka mina nzoce, Nzi nga phameli xisiwana,

¹⁸ Kasi kusukela wusweni ga mina nzi kulile zinwe naxo, Nzi ku khwatsi nzi dadani ka xona, Ni noni nzi yi rangele kusukela rumbyini ga mamani;

¹⁹ Loku nzi wonile a munhu a lova hi ku vumala tinguwo, Kutani xisiwana na xi nga hi na xifenengelo;

²⁰ Loku a xiwunu xakwe xi nga nzi katekisangi, Ni loku a nga kufumetiwangi hi woya ga tiyivu ta mina;

²¹ Loku nzi tlakusile a canja ga mina nzi vukela loyi a nga hiko na dadani, Hilezi nzi nga yimelwe le hubyeni;

²² Zonake ngha a woko ga mina giwa, gi suka laha katleni; Ni rambu ga woko ga mina a gi tshoveke.

²³ Hakuva nza chava a ku tsayiswa hi Nungungulu, A nzi zi koti ku yima mahlweni ka kutlakuka kakwe.

²⁴ Loku nzi mahile nzalama a kutsumba ka mina, Kutani ku wula ka nzalama yi hlutilweko; Wena u kutsumba ka mina; Mar. 10:24; 1 Tim. 6:17

²⁵ Loku nzi tsakile hi kufuma ka mina ka hombe, Ni hakuva a canja ga mina gi kumileko zinyingi;

²⁶ Loku mina nzi cuwukile a gambo laha gi ngangamelako, Kutani a hweti laha yi fambako kuhatimeni,

²⁷ Kasi a mbilu ya mina yi xengiwa ha zona xihundleni, Kutani a canja ga mina gi khomile a nomu wa mina hi ku zi khesa;

²⁸ Loko kambe kubiha ku faneleko ku tsayiswa hi mulamuli; Hakuva ngha nzi wa kanetile Nungungulu loyi a nga le hehla. Deut. 17:3

²⁹ Xana mina nzi tsakile hi kulobyiswa ka loyi a nzi vengako, Ni ku bhuma laha yena a welweko hi khombo?

³⁰ Ge, a nzi vumelangi a nomu wa mina a ku onha, Hi ku alakanyela nzhukano hehla ka muhefemulo wakwe.

³¹ Loku a vanhu va tenda ga mina va wa nga wuli, vaku: Himani loyi a nga xuriko hi tinyama takwe?

³² A muenzi a nga etlelangi lomu maphangweni; Hakuva nzi lo vululela a vafambi a livati la mina. Maheb. 13:2; 1 Ped. 4:9

³³ Nzi khubhunyetile kugoha ka mina kota matirela ya vanhu, Nzi fihla milanzu ya mina xifuveni xa mina ke?

³⁴ Nzi wa chava a xidlemo xa vanhu, Nzi dzukiswa hi xixanzo xa mingango, Lezaku nzi rutisa, nzi nga humi lahandle ke? Ekso. 23:2

³⁵ Mayiwako ku khwatsi a ngava kona a nzi zwako! Langutani, a mixuvo ya mina hi leyi: Lezaku Nyamintamu a nzi hlamula, Nzi wona a keco yi tsalilweko hi nala wa mina yo komba a nanzu wa mina.

³⁶ Hizinene nzi wa ta yi rwala katleni ga mina, Nzi yi boha kota xidlodlo hlokweni ya mina.

³⁷ Nzi wa ta ti hlamulela ka yena a tsengo wa zikanzihelo za mina, Nzi wa ta mu tshinelela khwatsi nzi hosana.

³⁸ Loku a simu ga mina gi rila gi nzi vukela, Ni loku a tinzima ta gona ti rila mihloti hi kota ya mina,

³⁹ Loku nzi gile mihanzu ya gona na nzi nga gi xavangi, Ni loku nzi mahile a venyi va gona va lahlekelwa hi wutomi,

⁴⁰ Ngha gi mila mizwa wutshanwini ga mavele; Ni byanyi wutshanwini ga sevada. Kugumesa ka timhaka ta Joba.