Deuteronome 6 - Tshwa Bible

¹ Makunu lowu hi wona a nayo ni timhaka ni zileletelo lezi Jehova Nungungulu wa nwina a leleteleko ku mu gonzisa zona, kasi mu zi maha a tikweni legi mu ta nga ya enghena ka gona mu gi fumela;

² kasi u fela ku chava Jehova Nungungulu wa wena, na u kari u hlayisa yontlhe milayo yakwe, ni zileletelo zakwe lezi nzi ku byelako; u ta zi hlayisa wontihe masiku ya wutomi ga wena, wena ni nʼwana wa wena, ni zukulu wa wena, kasi masiku ya wena ma ta anza.

³ Zwana, O Israeli! u chivirika a ku maha lezi zilo, kasi wa tshameka, mu anza nguvu lomu tikweni legi gi khulungako masi ni wulombe, kota lezi Jehova Nungungulu wa vararu va wena a ku byelileko.

⁴ Ingisa, Israeli! Jehova Nungungulu wa hina i Jehova munwe. Mar. 12:29; 1 Kor. 8:4; Gal. 3:20

⁵ U ta ranza Jehova Nungungulu wa wena hi mbilu yontlhe ya wena, ni muhefemulo wontihe wa wena, ni ntamu wontihe wa wena. Lu. 10:27

⁶ A milayo leyi nzi ku layako ha yona nyamutlha yi tava mbilwini ya wena.

⁷ U ta yi gonzisa ka vanana va wena, u wulawula ha yona lomu ndlwini ka wena, ni lomu kuenzeni ka wena, ni kuetleleni ka wena, ni kuvukeni ka wena.

⁸ U ta yi boha lomu wokweni ga wena, xiva xialakanyiso xa wena, ni xikombiso a xikari ka mahlo ya wena.

⁹ U ta yi tsala lomu timhanzeni ta yindlu ya wena, ni lomu tinyangweni ta wena.

¹⁰ Laha ku ta ngaku Jehova Nungungulu wa wena a ku enghenisile ka tiko legi a hlambanyileko ka vararu va wena, Abrahama, na Isaka, na Jakobe, a ku ku nyika gona (yi nga miti leyi ya hombe, yo saseka, yi nga akwangiko hi wena,

¹¹ ni tiyindlu leti ti teleko hi tshomba, ti nga tatwangiko hi wena, ni tihlowo ti nga kelwangiko hi wena, ni zivina ni maoliva yi nga byalwangiko hi wena), lezo loku muga mu xura,

¹² chela kota lezaku u nga rivali Jehova loyi a ku humesileko tikweni ga le Gipite, lomu ndlwini ya wukhumbi.

¹³ U ta chava Jehova Nungungulu wa wena, u mu khozela, u hlambanya hi vito gakwe. Jer. 4:2; Mat. 4:10; Lu. 4:8

¹⁴ Mu nga dzuki mu lanzela vanwani vanungungulu, lava va nga xikari ka vanungungulu va matiko lawa ma mu ranzeleko.

¹⁵ Hakuva Jehova Nungungulu wa wena, loyi a nga xikari ka nwina, i Nungungulu wo pinyama. Ku nga taku a zanga ya Jehova Nungungulu wa wena yi ku vindlukela, zonake a ku lovisa laha misaveni.

¹⁶ Mu nga ringi Jehova Nungungulu wa nwina, kota lezi mu nga mu ringa le Masa.

¹⁷ Kanilezi mu ta hlayisa khwatsi a milayo ya Jehova Nungungulu wa nwina, ni wukustumunyu gakwe, ni zileletelo zakwe lezi a mu leleteleko zona.

¹⁸ U ta maha kululama ni zinene mahlweni ka Jehova kasi u tshameka, u kala uya enghena ka tiko lego go saseka, legi Jehova a hlambanyileko ka vararu va wena a kuva u ya gi fumela,

¹⁹ ni ku hlongola vontlhe valala va wena mahlweni ka wena, khwatsi hi lezi Jehova a wulileko.

²⁰ Laha a nʼwana wa wena a ta ngata ku wutisa ka zikhati za ha tako, aku: Xana wukustumunyu legi, ni milayo leyi, ni zileletelo lezi Jehova Nungungulu wa hina a nga mu leletela, zi wula yini ke?

²¹ Zonake u ta byela nʼwana wa wena ku ngalo: Hina hi wa hi tikhumbi ta Faro le tikweni ga Gipite, kanilezi Jehova i hi tlhatlhisile hi canja ga ntamu.

²² Na Jehova i wonisile ka hina a zikombiso ni zihlamaliso za hombe zo tshisa, lezi a zi mahileko ka vanhu va le Gipite ni ka Faro, ni yontlhe yindlu yakwe.

²³ Zonake a hi humesa a hi neha lomu, ni ku hi nyika a tiko legi a hlambanyileko ka vararu va hina.

²⁴ Na Jehova i hi leletele ku hlayisa yontlhe milayo leyi ni ku yi maha, na hi kari hi chava Jehova Nungungulu wa hina, kasi hi fela ku tshameka xontlhe xikhati, kasi wa fela ku hi hlayisa hi hanya kala nyamutlha lezi.

²⁵ Ku tava kululama ka hina loku hi hlayisa hi kuchivirika yontlhe leyi milayo mahlweni ka Jehova Nungungulu wa hina, kota lezi a leleteleko.