Deuteronome 31 - Tshwa Bible

¹ Mosi i loya hlawutela leti timhaka ka vontlhe va ka Israeli, aku:

² Inyamutlha mina nzi na ni 120 wa malembe a wukale; a nza ha zi koti ku mu rangela, ni kambe Jehova i te ngalo ka mina: Wena u nga ta tlhatuka loyi Jordani. Mitse. 20:12; 27:12

³ Jehova Nungungulu wa wena hi yena a ta nga famba mahlweni ka wena; hi yena a ta nga panzanya laya matiko mahlweni ka wena, kasi u fela ku ma fumela. Joxua i ta rangela mahlweni ka wena u tlhatuka, khwatsi hi lezi Jehova a wulileko.

⁴ Na Jehova i ta maha ka vona khwatsi hi lezi a mahileko ka Sihoni, na Ogi, a tihosi ta maAmori, ni matiko yabye lawa yena a ma lovisileko. Mitse. 21:24, 35

⁵ Jehova i ta va nyikela mandleni ya nwina, mu ta maha ka vona khwatsi hi lezi mu leleteleko.

⁶ Tiyani hlana, mu nga mbheli ntamu! Mu nga chavi, hambu ni ku dzukiswi ha vona, hakuva Jehova Nungungulu wa nwina i famba mahlweni ka nwina, cima a nga ta mu siya, hambu ni ku mu tsika. Jox. 1:5; Maheb. 13:5

⁷ Zonake Mosi i lo vitana Joxua mahlweni ka vontlhe va ka Israeli, aku kakwe: Tiya hlana, u nga mbheli ntamu; hakuva hi wena u ta nga enghena ni vanhu lava tikweni legi Jehova a hlambanyileko ka vararu vabye a ku va nyika gona, wena hi wena u ta nga va nyika gona va gi fumela,

⁸ Jehova i ta famba mahlweni ka wena, ava zinwe na wena; cima a nga ta ku tsika, hambu ni ku ku siya; hikwalaho u nga chavi u mbhela ntamu.

⁹ Mosi i lo tsala a nayo lowu a wu nyika ka vapristi, a vana va ka Levi, lava va rwalako a nghaxa ya xivumelwano xa Jehova, ni ka wontihe masingalakati ya ka Israeli.

¹⁰ Mosi i lo va leletela, aku: Hi nzhako ka ntlhanu wa malembe ni mambiri, hi xikhati xa lembe ga kutlhatlheka, hi ka mubuzo wa mixaxa,

¹¹ laha vontlhe va ka Israeli va tako ku ta ti wonekelisa mahlweni ka Jehova Nungungulu wa wena, a ka wutshamu lego a ta nga gi hlawula, wena u ta gonza lowu nayo mahlweni ka vontlhe va ka Israeli, vazwa. Neh. 8:1

¹² U tsombanyisa vanhu, a vavanuna, ni vavasati, ni vanana, ni valuveli va wena lava va nga mutini wa wena, kasi va fela kuzwa va gonza ku chava Jehova Nungungulu wa nwina, va chivirika ku hlayisa timhaka tontlhe ta lowu nayo;

¹³ kasi a vana vabye lava va nga wu tiviko nayo, va wuzwa, va gonza ku chava Jehova Nungungulu wa nwina ka masiku wontihe lawa va ta nga hanya laha tikweni legi mu yako ka gona, ku ya gi fumela le tlhatukweni wa Jordani.

Nungungulu a wulawula ka Mosi na Joxua.

¹⁴ Jehova i te ngalo ka Mosi: A masiku ya wena ya kufa ma tshinele kusuhani! Vitana Joxua, uta naye lomu ka tenda ga mutlhangano, nzi ta ta mu wumbela lomo. Zonake Mosi na Joxua va lo ya yima lomu ka tenda ga mutlhangano.

¹⁵ Jehova i lo woneka lomu tendeni hi mhinga ya refu laha nyangweni ya tenda.

¹⁶ Jehova i te ngalo ka Mosi: Wena U ta etlela zinwe ni vararu va wena; kanilezi lava vanhu va ta ya hlakana hi wuoswi ni vanwani vanungungulu va tiko lego va yako ka gona; va ta nzi tsika va hambunyeta xivumelwano lexi nzi mahileko zinwe na vona.

¹⁷ Kanilezi a zanga ya mina yi ta vura hi lego siku, nzi va tsika, nzi fihla a nghohe ya mina ka vona, va lobyiswa, a makhombo ya ku tala ni hlomulo zi tata hehla kabye, zonake va ta ku ngalo: Kasi lawa makhombo ma tako hehla ka hina, a hi lezi Nungungulu wa hina a nga hiko kona xikari ka hina ke?

¹⁸ Mina hakunene nzi ta fihla a nghohe ya mina lego siku, hi kota ya zontlhe zo biha lezi va ta nga zi maha, hakuva va ta hunzulukela ka vanwani vanungungulu.

¹⁹ Makunu lezi ti tsaleleni lisimu leli, u li gonzisa a vanana va ka Israeli, u li enghenisa lomu milonwini yabye, kasi leli lisimu li maha kustumunyu wa mina xikari ka vanana va ka Israeli.

²⁰ Hakuva nzi ta va chiketa tikweni legi nzi hlambanyileko ka vararu vabye a ku va nyika, a tiko gi khulungako masi ni wulombe; laha va ta ngaga va xura, va kuluka, va ta sangula ku hunzulukela vanwani vanungungulu va va khozela, va nyenya mina, va hambunyeta xivumelwano xa mina.

²¹ Ni loku makhombo lawa yo tala ni zikarato zita hehla kabye, zonake leli lisimu li ta maha wukustumunyu mahlweni ka vona; hakuva lona li nga ta rivaliwa milonwini ya zizukulwana zabye. Hakuva mina nza tiva maalakanyo ya timbilu tabye legi siku, na nzi nga se nga va chiketa a tikweni legi nzi hlambanyileko ku va nyika gona.

²² Zonake Mosi i lo tsala leli lisimu gwalego siku, ni kuva li gonziswa a vanana va ka Israeli.

²³ Jehova i lo wumbela Joxua nʼwana Nuni, aku: Tiya hlana, u nga mbheli ntamu, hakuva hi wena u ta nga chiketa a vanana va ka Israeli ka tiko legi nzi hlambanyileko ku va nyika gona; na mina nzi tava zinwe na wena.

A lisimu la Mosi.

²⁴ Zonake Mosi loku a mbhetile ku tsala timhaka ta lowu nayo lomu bhukwini,

²⁵ i lo leletela a va ka Levi, lava va rwalako a nghaxa ya xivumelwano xa Jehova, aku:

²⁶ Tekani a bhuku legi ga nayo mu gi veka lomu xikari hi tlhelo ga nghaxa ya xivumelwano xa Jehova Nungungulu wa nwina, kasi gi fela ku maha kustumunyu mahlweni ka nwina. 2 Tih. 22:8

²⁷ Hakuva nza tiva kuhluwuka ka wena ni kunonoha ka nhamu ya wena; hambu na nza ha hanya xikari ka nwina, ma ha simamisako ku hluwuka ka Jehova, ku ta kuyini laha nzi ta ngafa ke?

²⁸ Tsombanyisani ka mina wontihe masingalakati ya tinyangwa ta nwina, ni tinduna ta nwina; nzi ta hlawutela leti timhaka lomu tindleveni tabye, nzi ta vitana matilo ni misava, a kuva vakustumunyu mahlweni kabye.

²⁹ Hakuva nza zi tiva lezaku loku nzi file, mu ta ti bihisa futsi, mu hambuka ndleleni leyi nzi mu leleteleko yona; ni makhombo ma ta mu chikelela hi zikhati za ha tako; hakuva nwina mu ta maha kubiha mahlweni ka Jehova; mu ta mu zangarisa hi mitiro ya mandla ya nwina.

³⁰ Zonake Mosi i lo hlawutela ka tlhangano wontihe wa va ka Israeli a timhaka ta leli lisimu kala li mbhela.