Deuteronome 26 - Tshwa Bible

¹ Laha u ta nga chikela a tikweni legi Jehova Nungungulu wa wena a ku nyikileko lezaku gi maha tshomba ya wena, ni loku u gi khozisile, na u akile ka gona,

² u ta teka mihanzu yo ranga yontlhe leyi u yi kumileko lomu tikweni legi Jehova Nungungulu wa wena a ku nyikileko gona, u yi chela lomu xirunzwini, u famba nayo ka wutshamu lego Jehova Nungungulu wa wena a ta nga gi hlawula ku aka a vito gakwe laho.

³ U taya ka mupristi loye a ta ngava kona ka lawo masiku, u yaku: Inyamutlha nza ti bika ka Jehova Nungungulu wa wena, lezaku nzi chikele lomu tikweni legi Jehova a hlambanyileko ka vararu va hina ku hi nyika gona.

⁴ Ni mupristi i ta teka xirunzu mandleni ya wena, a xi veka mahlweni ka alati ga Jehova Nungungulu wa wena.

⁵ Zonake wena u ta wulawula mahlweni ka Jehova Nungungulu wa wena, uku: Dadani i wa hi muAramea loyi a nga lava kufa, kanilezi i loya Gipite ni tsengo wutsongwani wa vanhu, a tshama kona na hi muluveli; na yena i mahile a tiko ga hombe ga ntamu, ga vanhu vo tala. Gen. 11:31; 46:5

⁶ Ni vaGipite va lo hi xanisa, va hi tsimbeketa, va hi rwexa mikhinyavezo.

⁷ Kanilezi hi lo rila ka Jehova Nungungulu wa vadadani va hina, zonake Jehova i lozwa a gezu ga hina, a wona kutsimbeketwa ka hina, ni mitiro ya hina, ni kuxaniseka ka hina.

⁸ Na Jehova i lo hi humesa le Gipite hi canja ga ntamu na hi woko gi nawulutilweko, ni xichabyo xa hombe, zinwe ni ziwoniso ni masingita.

⁹ Makunu i hi chiketile ka legi wutshamu, ni ku hi nyika a tiko legi gi khulungako masi ni wulombe.

¹⁰ Makunu nza neha a mihanzu yo ranga ya tiko legi u nzi nyikileko. O Jehova! Zonake u ta yi veka mahlweni ka Jehova Nungungulu wa wena, u khizama mahlweni ka Jehova Nungungulu wa wena.

¹¹ U ti tsakela zinwe ni muLevi, ni muluveli loyi a ta ngava xikari ka wena, u ti tsakela hi wontihe malongo lawa Jehova Nungungulu wa wena a ku nyikileko wona zinwe ni ngango wa wena.

¹² Loku u mbhetile ku susa zontlhe zawukhume za kuhula ka wena lomu ka lembe ga wunharu, gi nga gona a lembe ga zawukhume, u ta nyika muLevi, ni muluveli, ni xisiwana, ni noni, kasi vona va fela kuga va xura laha mutini wa wena; Levi 27:30

¹³ zonake u ta wulawula mahlweni ka Jehova Nungungulu wa wena, uku: Mina nzi humesile lomu ndlwini ya mina a zilo lezi zi basileko, nzi zi nyikele ka muLevi, ni muluveli, ni xisiwana, ni noni khwatsi hi lezi u nzi leleteleko; mina a nzi hambunyetangi ni wunwe nayo wa wena, hambu ni ku wu rivala.

¹⁴ Mina a nzi gangi ha zona lomu hlomulweni wa mina, mina a nzi hungulangi nchumu na nzi hi loye a nga basangiko, hambu ni ku nyikela nchumu xa zona hi kota ya vafileko. Nzi ingisile a gezu ga Jehova Nungungulu wa mina, ni kambe nzi mahile zontlhe khwatsi hi lezi u nzi leleteleko.

¹⁵ Cuwuka na u hi kwaleyo tilweni wutshanwini ga wena ga kubasa, u katekisa vanhu va wena va Israeli, ni misava leyi u hi nyikileko yona, yi maha tiko legi gi khulungako masi ni wulombe, khwatsi hi lezi u hlambanyileko ka vararu va hina.

¹⁶ Inyamutlha Jehova Nungungulu wa wena i ku leletela ku maha milayo leyi ni zileletelo lezi. U zi hlayisa ni ku zi maha hi mbilu ya wena yontlhe, ni muhefemulo wa wena wontihe.

¹⁷ Inyamutlha u tiyisile lezaku Jehova i Nungungulu wa wena, ni lezaku u ta famba hi tindlela takwe, ni ku hlayisa timhaka takwe, ni zileletelo zakwe, ni milayo yakwe, ni ku ingisa a gezu gakwe.

¹⁸ Jehova i tiyisile nyamutlha lezaku mu vanhu vakwe wutsumbu, khwatsi hi lezi a ku tsumbisileko loku u kari u ingisa yontlhe milayo yakwe;

¹⁹ lezaku yena i ta ku tlakusa hehla ka matiko wontihe lawa a ma mahileko, a ku nyika wudumo, ni vito, ni wudzunzo, muva vanhu va basileko va Jehova Nungungulu wa wena, khwatsi hi lezi a wulileko. Jer. 13:11; 33:9; Zef. 3:19