Deuteronome 24 - Tshwa Bible

¹ Loku munhu a tekile sati, zonake a kuma lezaku a nga mu tsakisi hi kota ya xilo xo nyenyeza ka yena, loku a mu tsalela a papilo ga kuhambana a mu nyika canjeni gakwe, a mu hlongola lomu ndlwini yakwe, Mat. 5:31; 19:7; Mar. 10:4

² loku a humile ka yena, zonake aya tekiwa hi munwani wanuna,

³ ni nuna wa wumbiri a mu vengawo, a mu tsalela papilo yenawu ga kuhambana a mu nyika canjeni gakwe, ni ku mu hlongola lomu ndlwini yakwe; zonake loku a nuna loye wa wumbiri afa,

⁴ a nuna loyi wo ranga, loyi a mu tsikileko a nga ha mu teki kambe, hi lezi a ti nyenyezisileko, hakuva lezo manyala mahlweni ka Jehova; u nga bihisa a tiko legi Jehova Nungungulu wa wena a ku nyikileko lezaku gi maha tshomba ya wena.

⁵ Loku munhu a ha ku teka sati, a nga hlomi matlhari aya yimpini, ni kambe ku nga vekiwi ni wihi ntiro hehla ka yena. Yena i ta tlhatlheka a lembe ginwe hi kota ya ngango wakwe, i ta tshama kaya a tangalisa a sati wakwe loyi a mu tekileko.

⁶ A munhu ngha a nga teki maribye mambiri ya xigayo a zima seve ha wona, kutani i ribye ga le hehla, hakuva ku teka wutomi ga munhu a zima seve ha gona.

⁷ Loku munhu a yiva munhu wa vamakabye vakwe a xikari ka vanana va ka Israeli, a mu maha khumbi yakwe, kutani a mu xavisa, a khamba lego gi tafa; kasi wa fela ku susa kubiha xikari ka wena. Ekso. 21:16; 1 Tim. 1:10

⁸ Ti wonele ka nghumbe ya hlokonho, u ingisa khwatsi ni ku maha zontlhe kota lezi mu ta nga leletelwa hi vapristi va vaLevi; mu maha kota lezi nzi va leleteleko.

⁹ Alakanya lezi Jehova Nungungulu wa wena a mahileko ka Miriamu, laha ndleleni na muta hi le Gipite.

¹⁰ Loku u pembisa a xilo ka wakelane wa wena, u ngayi le ndlwini yakwe u lanza xo zima ha xona a seve wakwe,

¹¹ u taya yima hi lahandle, zonake loyi a ku pembileko i ta ku nehela a seve wakwe lahandle.

¹² Loku xi hi xisiwana, u nga kali uya kuetleleni ni nkumba lowu a nga zima seve ha wona.

¹³ Hakunene u ta mu tlhelisela a seve wakwe na gambo gi nga se pela; kasi yena wa fela ku etlela ka tinguwo takwe, a ku katekisa, zonake u tava u lulamileko mahlweni ka Jehova Nungungulu wa wena.

¹⁴ U nga kalaveli xitiri loyi a nga muvumali xikari ka vamakabye va wena, kutani xikari ka valuveli lava va akileko lomu tikweni ga wena ni lomu mitini ya wena; Levi 19:13; Mal. 3:5

¹⁵ u ta mu nyika hakhelo yakwe gona siku lego ga kuhaka kakwe, a gambo gi nga peli na u nga se ku mu hakhisa, hilezi xisiwana, i navela nguvu hakhelo yakwe, ku nga taku a rila ha wena ka Jehova zonake u kuma nanzu.

¹⁶ A vapswali va nga ta dawa hi kota ya vanana, ni vanana va nga ta dawa hi kota ya vapswali; munhu ni munhu i ta dawa hi kota ya nanzu wakwe yena nwinyi.

¹⁷ U nga hambukisi a nongameto wa muluveli ni wa xisiwana, ni kambe u nga teki a nguwo ya noni u maha yo zima ha yona seve. Isa. 1:17; Jer. 5:28; Ezek. 22:29

¹⁸ Kanilezi u ta alakanya lezaku wenawu u wa hi khumbi le Gipite, ni lezaku Jehova Nungungulu wa wena i ku tlhatlhisile ka gona, hi kota ya lezo mina nza ku leletela ku maha lezo zilo.

¹⁹ Loku u tshovela le masinwini ya wena, u rivala a numbi leyo, u nga tlheli u ya wu teka; wu tava wa muluveli ni xisiwana ni noni, kasi Jehova Nungungulu wa wena a fela ku ku katekisa mitirweni yontlhe ya mandla ya wena.

²⁰ Ni laha u jujako mioliva ya wena, u nga dzombeteli kambe lomu maravini ya kona, hakuva lezo zi tava za muluveli, ni za xisiwana, ni za noni.

²¹ Ni laha u jujako mihanzu ya mauva ya wena, u nga dzombeteli kambe le nzhako ka wena; hakuva lezo zi tava za muluveli, ni za xisiwana, ni za noni.

²² Na wena u ta alakanya lezaku wenawu u wa hi khumbi le tikweni ga le Gipite; hikwalaho mina nza ku leletela ku maha lezo zilo.